Sam 68:1-35
To di wan we de dayrɛkt. Devid in siŋ.
68 Lɛ Gɔd grap, lɛ in ɛnimi dɛn skata,Ɛn lɛ di wan dɛn we et am rɔnawe bifo am.
2 Drɛb dɛn lɛk aw briz de kɛr smok;Lɛ wikɛd pipul dɛn day bifo Gɔd,Lɛk aw waks* de mɛlt nia faya.
3 Bɔt lɛ di wan dɛn we de du wetin rayt gladi;Lɛ dɛn rili gladi bifo Gɔd;Lɛ dɛn gladi pasmak!
4 Una siŋ to Gɔd; una siŋ fɔ prez* in nem.
Siŋ to di wan we de rayd na dɛzat.*
In nem na Ja!* Una gladi bifo am!
5 We Gɔd de na di oli say we i de,In na papa fɔ di wan dɛn we nɔ gɛt papa
Ɛn na in de protɛkt* uman dɛn we dɛn man dɔn day.
6 Gɔd de gi os to di wan dɛn we nɔ gɛt nɔbɔdi;I de mek prizina dɛn fri, ɛn i de mek bɛtɛ fala dɛn.
Bɔt di wan dɛn we trangayes go liv na say we wata nɔ de.
7 E Gɔd, we yu bin de lid yu pipul dɛn,We yu bin de waka na di dɛzat, (Sila)
8 Di wɔl shek;Ren kɔmɔt na ɛvin bikɔs ɔf Gɔd;Dis Saynay shek bikɔs ɔf Gɔd, di Izrɛlayt dɛn Gɔd.
9 E Gɔd, yu mek ɛvi ɛvi ren kam;Yu mek yu pipul dɛn we dɔn taya gɛt trɛnk bak.
10 Dɛn de na yu kamp we gɛt tɛnt dɛn;E Gɔd, yu gi tin dɛn to di wan dɛn we po bikɔs yu gud.
11 Jiova kɔmand in pipul dɛn;Di uman dɛn we de tɔk di gud nyuz na big ami.
12 Di kiŋ dɛn we de lid di ami dɛn rɔnawe, dɛn rɔnawe!
Di uman dɛn we lɛf na os gɛt pan di tin dɛn we dɛn tek na di ɛnimi dɛn an.
13 Pan ɔl we una di man dɛn ledɔm bitwin di faya dɛn na di kamp,*Dɔv wiŋ dɛn we kɔva wit silva,Ɛn fɛda dɛn we kɔva wit fayn gold go de de.
14 We di Ɔlmayti skata di kiŋ dɛn na di land,Sno fɔdɔm na Zalmɔn.*
15 Di mawntin na Beshan na Gɔd in mawntin;*Di mawntin na Beshan gɛt bɔku ples dɛn we ay.
16 Una dɛn mawntin dɛn we gɛt ay ay ples dɛn,Wetin mek una de jɛlɔs di mawntin we Gɔd dɔn pik* as ples usay i go de?
Fɔ tru, Jiova go de de sote go.
17 Gɔd in wɔ chariɔt dɛn so bɔku dat pɔsin nɔ de ebul kɔnt dɛn. Dɛn pas ɔmɔs tawzin.
Jiova dɔn kɔmɔt na Saynay ɛn kam na in oli ples.
18 Yu go ɔp;Yu kɛr sɔm pipul dɛn we yu kapchɔ;Yu tek sɔm man dɛn as gift,E Ja, wi Gɔd, yu ivin tek di trangayes wan dɛn fɔ de wit dɛn.
19 Lɛ Jiova we de tot wi lod ɛvride gɛt prez,Na in na di tru Gɔd we de sev wi. (Sila)
20 Di tru Gɔd na Gɔd we de sev wi;Ɛn Jiova di Masta We De Rul Ɔlman de mek wi rɔnawe pan day.
21 Fɔ tru, Gɔd go nyamanyama in ɛnimi dɛn ed dɛn,Ɛnibɔdi we kɔntinyu fɔ sin, i go nyamanyama in ed.
22 Jiova dɔn se: “A go pul dɛn na Beshan ɛn kam wit dɛn bak;A go pul dɛn ɔnda di si ɛn kam wit dɛn bak,
23 So dat yu go waka pan yu ɛnimi dɛn blɔdƐn yu dɔg dɛn go lik dɛn blɔd.”
24 E Gɔd, dɛn si yu pipul dɛn de waka,Dɛn si mi Gɔd ɛn mi Kiŋ in pipul dɛn de waka fɔ go na in oli ples.
25 Di wan dɛn we bin de siŋ bin de bifo,Di yɔŋuman dɛn we bin de ple tamborin bin de biɛn dɛn,
Di myuzishian dɛn we bin de ple myuzik instrumɛnt dɛn we gɛt string bin de afta dɛn.
26 Prez Gɔd usay bɔku pipul dɛn de;Una we gɛt layf frɔm Izrɛl in papa, una prez Jiova.
27 Na da ples de Bɛnjamin we na di las wan de win dɛn.Dɔn bak di prins dɛn na Juda wit dɛn krawd we de mek nɔys de win dɛn.Di prins dɛn na Zɛbyulɔn ɛn di prins dɛn na Naftalay dɛnsɛf de win dɛn.
28 Yu Gɔd dɔn tɔk se yu go gɛt trɛnk.
E Gɔd, yu we dɔn du sɔntin fɔ wi, sho yu trɛnk.
29 Bikɔs ɔf yu tɛmpul na Jerusɛlɛm,Kiŋ dɛn go kam wit gift dɛn fɔ yu.
30 Tɔk pan di wayl animal dɛn we de usay gras dɛn de,Tɔk pan di man kaw dɛn we gɛda ɛn dɛn pikin dɛn,Te di pipul dɛn butu ɛn kam wit* tin dɛn we dɛn mek wit silva.
Bɔt i skata di pipul dɛn we lɛk wɔ.
31 Dɛn go pul tin dɛn we dɛn mek wit brɔnz* na Ijipt;Kush go mekes fɔ gi gift dɛn to Gɔd.
32 E pipul dɛn we de na di kiŋdɔm dɛn na di wɔl, una siŋ fɔ Gɔd,Una siŋ fɔ prez* Jiova, (Sila)
33 Siŋ to di wan we de rayd na di ɛvin dɛn we bin dɔn de frɔm trade trade.
Luk! In pawaful vɔys tan lɛk tɛnda.
34 Prez Gɔd bikɔs i gɛt trɛnk.
I de rul Izrɛl,Ɛn in trɛnk de na di skay.*
35 Pipul dɛn de fred ɛn rɛspɛkt Gɔd we i de na in* oli ples.
In na Izrɛl in Gɔd,We de gi trɛnk ɛn pawa to di pipul dɛn.
Una prez Gɔd.
Futnot Dɛn
^ Dis waks na ya na sɔntin we ɔni dɛn kin mek we izi fɔ mɛlt ɛn na de dɛn kin kip dɛn ɔni.
^ Ɔ “una mek myuzik fɔ.”
^ Ɔ i kin bi, “na di klawd.”
^ “Ja” na di shɔt we fɔ kɔl Jiova.
^ Insay Ibru, “Ɛn na in na di jɔj fɔ.”
^ Ɔ i kin bi, “ledɔm usay di ship dɛn de.”
^ Ɔ “I tan lɛk se sno fɔdɔm na Zalmɔn.”
^ Ɔ “na big mawntin.”
^ Ɔ “Gɔd want.”
^ Ɔ i kin bi, “ɛn mas mas.”
^ Ɔ i kin bi, “Ambasedɔ dɛn go kɔmɔt.”
^ Ɔ “Una mek myuzik fɔ.”
^ Insay Ibru, “klawd.”
^ Insay Ibru, “yu.”
