Sam 86:1-17
Devid in prea.
86 E Jiova, pe atɛnshɔn* ɛn ansa mi,Bikɔs a de sɔfa ɛn a po.
2 Protɛkt mi layf, bikɔs a nɔ de kɔmɔt biɛn yu.
Sev yu savant we abop pan yu,Bikɔs yu na mi Gɔd.
3 E Jiova, du gud to mi,Bikɔs a de kɔl yu ol de.
4 E Jiova, mek yu savant gladi,Bikɔs na to yu a tɔn.
5 E Jiova, yu gud ɛn yu rɛdi fɔ fɔgiv;Yu de rili sho lɔv we nɔ de chenj to ɔl di wan dɛn we de kɔl yu.
6 E Jiova, lisin to mi prea;Ɛn pe atɛnshɔn we a de beg yu fɔ ɛp mi.
7 A de kɔl yu di de we a gɛt prɔblɛm,Bikɔs yu go ansa mi.
8 E Jiova, no gɔd nɔ de we tan lɛk yu,Nɔbɔdi nɔ ebul du di tin dɛn we yu de du.
9 E Jiova, ɔl di neshɔn dɛn we yu mekGo kam butu bifo yu,Ɛn dɛn go mek yu nem gɛt glori.
10 Yu gret ɛn yu de du wɔndaful tin dɛn;Na yu wangren na Gɔd.
11 E Jiova, tich mi bɔt aw yu de du tin.
A go du di tin dɛn we yu de tɛl mi we na tru.
Mek a fred yu nem wit ɔl mi at.
12 E Jiova, mi Gɔd, a de prez yu wit ɔl mi at,Ɛn a go gi glori to yu nem sote go,
13 Bikɔs yu dɔn sho mi yu lɔv we nɔ de chenj pasmak wan,Ɛn yu dɔn sev mi layf so dat a nɔ go go insay Grev.*
14 E Gɔd, man dɛn we de du tin dɛn we dɛn nɔ gɛt rayt fɔ du de agens mi;Man dɛn we nɔ gɛt sɔri-at want fɔ kil mi,Ɛn dɛn nɔ gɛt wan rɛspɛkt fɔ yu.
15 E Jiova, bɔt yu na Gɔd we de sho masi ɛn yu gɛt sɔri-at,Yu nɔ de vɛks kwik, yu rili gɛt lɔv we nɔ de chenj, ɛn yu fetful.*
16 Tɔn to mi ɛn du mi gud.
Gi yu savant yu trɛnk,Ɛn sev yu slev gal in bɔypikin.
17 Sho mi sayn se yu gud,So dat di wan dɛn we et mi go si am ɛn shem,
Bikɔs na yu de ɛp mi ɛn na yu de kɔrej mi, E Jiova.
Futnot Dɛn
^ Ɔ “butu ɛn lisin.”
^ Ɔ “Shiol.” Dis tinap fɔ di ples usay dayman dɛn de. Dis nɔto tru tru ples. Rid Baybul Wɔd dɛn Minin.
^ Ɔ “ɛn yu de tɔk tru.”
