Sam 96:1-13
96 Siŋ wan nyu siŋ to Jiova.
Lɛ ɔlman na di wɔl siŋ to Jiova!
2 Siŋ to Jiova, prez in nem.
Ɛvride, tɔk bɔt di gud nyuz bɔt aw i de sev.
3 Tɔk bɔt in glori na di neshɔn dɛn,Tɔk bɔt di wɔndaful tin dɛn we i de du to ɔl di pipul dɛn.
4 Jiova gret ɛn i fit fɔ mek dɛn prez am.
I fit fɔ mek dɛn fred ɛn rɛspɛkt am pas ɔl ɔda gɔd dɛn.
5 Ɔl di ɔda pipul dɛn gɔd dɛn nɔ gɛt wan valyu,Bɔt na Jiova mek ɛvin.
6 Rɛspɛkt ɛn glori de usay i de;Gɔd in oli ples rili fayn ɛn in trɛnk de de.
7 Lɛ ɔl di famili dɛn na di wɔl, gi Jiova wetin i fit fɔ gɛt,Lɛ dɛn gi Jiova wetin i fit fɔ gɛt bikɔs ɔf in glori ɛn trɛnk.
8 Una gi Jiova di glori we in nem fit fɔ gɛt;Una kam wit gift ɛn kam insay in kɔmpawn dɛn.
9 Una butu bifo* Jiova wit una oli klos;*Lɛ ɔlman na di wɔl trimbul bifo am!
10 Tɛl di neshɔn dɛn se: “Jiova dɔn bi Kiŋ!
Di wɔl* tinap tranga wan, natin nɔ ebul muv* am.
I go jɔj di pipul dɛn fia wan.”
11 Lɛ di ɛvin gladi ɛn mek di wɔl gɛt gladi-at;Lɛ di si ɛn ɔl wetin de insay de mek lawd lawd sawnd.
12 Lɛ di dray land ɛn ɔltin we de de gladi.
Da sem tɛm de, lɛ di stik dɛn na di fɔrɛst ala wit gladi-at
13 Bifo Jiova bikɔs i de kam;*I de kam fɔ jɔj di wɔl.
I go jɔj di pipul dɛn we de na di wɔl* di rayt we,Ɛn i go jɔj di pipul dɛn fetful wan.
Futnot Dɛn
^ Ɔ “wɔship.”
^ Ɔ i kin bi, “bikɔs i fayn ɛn oli.”
^ Ɔ “grɔn.”
^ Ɔ “shek.”
^ Ɔ “i dɔn kam.”
^ Ɔ “grɔn.”
