LƐSIN 03
Yu Biliv se Wetin di Baybul Tɔk Na Tru?
Di Baybul gɛt bɔku prɔmis dɛn ɛn i gi bɔku advays dɛn. I go bi se yu want fɔ lan wetin di Baybul de tich, bɔt sɔntɛm yu de dawt if wetin de na di Baybul na tru. Yu tink se yu fɔ biliv di prɔmis ɛn advays dɛn we de insay dis ol buk? Yu go rili biliv wetin di Baybul se bɔt aw fɔ ɛnjɔy layf naw ɛn tumara bambay? Bɔku pipul dɛn biliv. I go fayn fɔ mek yu lan fɔ yusɛf.
1. Yu tink se di tin dɛn we di Baybul tɔk bɔt na tru?
Di Baybul gɛt tin dɛn we kɔrɛkt ɛn “tru.” (Ɛkliziastis 12:10) I tɔk bɔt tru tru tin dɛn we apin to rial pipul dɛn. (Rid Lyuk 1:3; 3:1, 2.) Bɔku pipul dɛn we de rayt istri ɛn we de stɔdi bɔt aw pipul dɛn bin de du tin trade trade, dɔn gri se sɔm impɔtant det dɛn, pipul dɛn, ples dɛn, ɛn tin dɛn we bin apin we di Baybul tɔk bɔt, na tin dɛn we kɔrɛkt.
2. Wetin mek wi go se di Baybul de bɛnifit wi pan ɔl we i dɔn ol?
Bɔku tɛm, di Baybul dɔn tɔk bɔt tin dɛn we pipul dɛn nɔ bin no bɔt di tɛm we dɛn bin rayt am. Fɔ ɛgzampul, i tɔk bɔt tin dɛn we gɛt fɔ du wit sayɛns. Di tɛm we dɛn bin de rayt di Baybul, bɔku pipul dɛn nɔ bin biliv wetin di Baybul se bɔt dɛn tɔpik dɛn de. Bɔt sayɛnsman dɛn insay wi yon tɛm dɔn pruv se wetin di Baybul tɔk na tru. Na buk we wi kin “abop pan . . . [naw ɛn] . . . sote go.”—Sam 111:7, 8.
3. Wetin mek wi fɔ biliv wetin di Baybul se bɔt tumara bambay?
Di Baybul tɔk bɔt “tin [dɛn] we nɔ bi yet.” (Ayzaya 46:10) I bin dɔn tɔk kɔrɛkt wan bɔt bɔku tin dɛn lɔng tɛm bifo dɛn apin. I bin dɔn tɔk bak bɔt tin dɛn we de apin na di wɔl tide. Insay dis lɛsin, wi go tɔk bɔt sɔm tin dɛn we di Baybul bin dɔn tɔk bɔt. Ɛn di we aw dɛn kɔrɛkt rili wɔndaful!
LAN MƆ
Lan bɔt aw sayɛns gri wit wetin di Baybul se, ɛn lan bak bɔt sɔm fayn fayn tin dɛn we di Baybul bin dɔn tɔk bɔt.
4. Sayɛns gri wit wetin di Baybul se
Trade trade, bɔku pipul dɛn bin biliv se di wɔl ɛŋ pan sɔntin. Ple di VIDIO.
Notis wetin dɛn bin dɔn rayt na di Baybul buk we nem Job fɔ lɛk 3,500 ia we dɔn pas. Rid Job 26:7, dɔn una tɔk bɔt dis kwɛstyɔn:
-
Wetin mek pipul dɛn sɔprayz we di Baybul se di wɔl “nɔ ɛŋ . . . pan natin”?
Di wɔl in wata saykul na we di san de wam di wata we de na di si ɛn mek i go ɔp na di skay, dɔn i fɔdɔm as ren ɛn go bak na di si. Na lɛk 200 ia dɔn pas we pipul dɛn kam fɔ ɔndastand di wɔl in wata saykul gud gud wan. Bɔt notis wetin di Baybul bin dɔn tɔk lɛk 3,500 ia we dɔn pas. Rid Job 36:27, 28, dɔn una tɔk bɔt dɛn kwɛstyɔn dɛn ya:
-
Wetin yu lɛk bɔt aw di Baybul tɔk bɔt di wata saykul?
-
Di skripchɔ dɛn we yu jɔs dɔn rid ɛp yu fɔ biliv di Baybul mɔ?
5. Di Baybul bin dɔn tɔk bɔt impɔtant tin dɛn we go apin
Rid Ayzaya 44:27–45:2, dɔn una tɔk bɔt dis kwɛstyɔn:
-
Wetin di Baybul bin tɔk bɔt 200 ia bifo dɛn dɔnawe wit Babilɔn?
Istri dɔn sho se na Kiŋ Sayrɔs, we bin de na Pashia, ɛn in sojaman dɛn bin dɔnawe wit Babilɔn insay di ia 539 bifo Krays Dɛn mek ɔda rod fɔ di wata we bin de protɛkt di siti. Di siti in get bin opin, so di sojaman dɛn bin go insay ɛn kapchɔ di siti ɛn dɛn nɔ bin ivin fɛt. Tide, i dɔn pas 2,500 ia, Babilɔn stil pwɛl pwɛl. Naw lɛ wi tɔk bɔt wetin di Baybul bin dɔn se go apin.
Rid Ayzaya 13:19, 20, dɔn una tɔk bɔt dis kwɛstyɔn:
-
Aw di tin we di Baybul bin dɔn tɔk bɔt Babilɔn bin apin?
Di we aw Babilɔn de naw na Irak
6. Di Baybul bin dɔn tɔk bɔt tin dɛn we wi de si tide
Di Baybul tɛl wi se wi de na di “las dez.” (2 Timoti 3:1) Notis wetin di Baybul bin dɔn tɔk bɔt di las dez:
Rid Matyu 24:6, 7, dɔn una tɔk bɔt dis kwɛstyɔn:
-
Wetin di Baybul bin dɔn tɔk se go apin insay di las dez?
Rid 2 Timoti 3:1-5, dɔn una tɔk bɔt dɛn kwɛstyɔn dɛn ya:
-
Wetin di Baybul tɔk bɔt aw pipul dɛn go biev insay di las dez?
-
Uswan pan dɛn we dɛn ya yu de si pipul dɛn de biev tide?
SƆM PIPUL DƐN KIN SE: “Di Baybul na buk we ful-ɔp wit lay lay stori dɛn.”
-
Wetin mek yu rili biliv se di Baybul na buk we wi kin abop pan?
WETIN YU DƆN LAN?
Istri, sayɛns, ɛn di tin dɛn we di Baybul bin dɔn tɔk se go apin ɔl de sho se yu kin abop pan di Baybul.
Rivyu
-
Yu tink se di tin dɛn we di Baybul de tɔk na tru ɔ na jɔs stori?
-
Wetin na sɔm tin dɛn we di Baybul tɔk we gri wit sayɛns?
-
Yu tink se di Baybul ebul fɔ tɛl wi wetin go apin tumara bambay? Wetin mek yu tink so, ɔ wetin mek yu nɔ tink so?
DU MƆ RISACH
Yu tink se sɔntin de we di Baybul tɔk bɔt sayɛns we nɔ kɔrɛkt?
“Yu Tink se Sayɛns Gri wit di Baybul?” (Atikul na di wɛbsayt)
Wetin sho se wi de na “di las dez”?
“6 Baybul Prɔfɛsi dɛn we De Apin Naw” (Di Wachtawa, Me 1, 2011)
Lan bɔt aw wetin di Baybul bin dɔn tɔk bɔt di Grik Ɛmpaya bin kam tru.
“Wetin Dɛn Prɔfɛt dɛn Bin Dɔn Tɔk” Ɛp Wi fɔ Biliv Mɔ ɛn Mɔ (5:22)
Lan bɔt aw di tin dɛn we di Baybul bin dɔn tɔk se go apin bin chenj aw wan man de tink bɔt di Baybul.
You May Also Like
KWƐSTYƆN DƐN WE PIPUL DƐN KIN AKS ƆLTƐM
Wetin na Baybul Stɔdi?
Lan di ansa dɛn to kwɛstyɔn dɛn we gɛt fɔ du wit wi Baybul stɔdi program.
