LƐSIN 11

Aw Yu Go Rili Bɛnifit We Yu De Rid di Baybul?

PLE

Yu dɔn ɛva want fɔ stat wan big projɛkt bɔt yu si se di wok bɔku fɔ du? Sɔntɛm fɔ mek am izi, yu disayd fɔ du am smɔl smɔl. Na di sem tin fɔ du we i kam pan Baybul ridin. Bɔt sɔntɛm yu go de wɔnda, ‘Usay fɔ stat?’ Insay dis lɛsin, wi go tɔk bɔt sɔm simpul simpul tin dɛn we yu go du we go ɛp yu fɔ ɛnjɔy we yu de rid ɛn stɔdi di Baybul.

1. Wetin mek wi fɔ rid di Baybul ɔltɛm?

Pɔsin we de rid di Baybul ɔ “PAPA GƆD [“Jiova,” NWT] in wɔd” ɔltɛm, go gladi ɛn bɛtɛ go fala am. (Rid Sam 1:1-3) Fɔ bigin, tray fɔ rid fɔ sɔm minit ɛvride. Di mɔ we yu de ɔndastand wetin de na Gɔd in Wɔd, na di mɔ yu go ɛnjɔy yu Baybul ridin.

2. Wetin go ɛp yu fɔ bɛnifit we yu de rid di Baybul?

Fɔ mek wi go bɛnifit we yu de rid di Baybul, wi nid fɔ pɔz ɛn tink bɔt wetin wi de rid. Wi fɔ rid ɛn “tek tɛm tink gud gud wan bɔt” wetin wi dɔn rid. (Jɔshwa 1:8, NWT) As yu de rid, aks yusɛf dɛn kwɛstyɔn dɛn ya: ‘Wetin dis de tɛl mi bɔt Jiova? Aw a go aplay wetin a dɔn rid na mi layf? Aw a go yuz wetin de na dɛn vas dɛn ya fɔ ɛp ɔda pɔsin?’

3. Aw yu go mek tɛm fɔ rid di Baybul?

Yu tink se i nɔ kin izi fɔ yu fɔ fɛn tɛm fɔ rid di Baybul? Nɔto yu wan dat kin apin to, i kin apin to bɔku pan wi. Tray fɔ “yuz [yu] tɛm di bɛst we.” (Ɛfishians 5:16) Yu kin du dat bay we yu sɛt patikyula tɛm fɔ rid di Baybul ɛvride. Sɔm pipul dɛn kin mek tɛm fɔ rid di Baybul ali mɔnin. Ɔda wan dɛn kin disayd fɔ du dat leta insay di de, lɛk di tɛm we dɛn gɛt lɔnch. Ɔda wan dɛn kin rid di Baybul na nɛt bifo dɛn slip. Ustɛm mɔ go fayn fɔ yu?

LAN MƆ

Lan mɔ bɔt wetin yu go du fɔ mek yu ɛnjɔy yu Baybul ridin. Ɛn lan bak bɔt aw yu go pripia fayn fɔ mek yu go ɛnjɔy yu Baybul stɔdi.

Jɔs lɛk aw wi go lan fɔ lɛk difrɛn it dɛn, na so wi go lan fɔ ɛnjɔy fɔ rid di Baybul

4. Lan aw fɔ ɛnjɔy yu Baybul ridin

I nɔ kin izi fɔ bigin rid di Baybul. Bɔt wi kin lan fɔ gɛt “apitayt” fɔ du dat jɔs lɛk aw pɔsin kin lan fɔ bigin it nyu it. Rid 1 Pita 2:2, dɔn una tɔk bɔt dis kwɛstyɔn:

If yu bigin rid di Baybul ɛvride, yu tink se yu go ɛnjɔy fɔ rid am? Yu go want fɔ kɔntinyu fɔ du dat?

Ple di VIDIO fɔ si wetin bin ɛp sɔm pipul dɛn fɔ stat fɔ ɛnjɔy dɛn Baybul ridin. Dɔn una tɔk bɔt di kwɛstyɔn dɛn we de dɔŋ.

VIDIO: Yɔŋ Wan dɛn De Lan fɔ Lɛk Gɔd in Wɔd (5:33)

Insay di vidio, wetin nɔ bin izi fɔ di yɔŋ pipul dɛn bifo dɛn bigin rid di Baybul?
Wetin bin ɛp dɛn fɔ kɔntinyu fɔ rid di Baybul ɛvride?
Wetin dɛn bin du fɔ mek dɛn ɛnjɔy dɛn Baybul ridin?

Sɔm tin dɛn we go ɛp yu:

Fɛn Baybul transleshɔn we kɔrɛkt ɛn izi fɔ rid. Tray di New World Translation if i de insay yu langwej.
Bigin fɔ rid di say dɛn we yu rili lɛk. Fɔ no aw fɔ du dat, rid di chat we nem “Stat fɔ Rid di Baybul.”
Mak di say dɛn we yu dɔn ɔlrɛdi rid. Yuz di chat we nem “Mak Usay Yu Dɔn Rid” we de insay dis buk.
Yuz di JW Library^®ap. If yu yuz da ap de, yu go ebul fɔ yuz yu fon, kɔmpyuta, ɔ tablɛt fɔ rid ɛn lisin to di Baybul ɛnisay we yu de.
Yuz di apɛndiks dɛn we de na di New World Translation. Dɛn gɛt map dɛn, chat dɛn, ɛn Baybul wɔd dɛn minin we go mek yu ɛnjɔy yu Baybul ridin mɔ.

5. Pripia fɔ yu Baybul stɔdi

Rid Sam 119:34, dɔn una tɔk bɔt dis kwɛstyɔn:

Wetin mek i fayn fɔ pre bifo yu rid di Baybul ɔ pripia fɔ yu Baybul stɔdi?

Wetin go ɛp yu fɔ ɛnjɔy yu Baybul stɔdi? We yu de pripia ɛni lɛsin insay dis buk, tray fɔ fala dɛn stɛp dɛn ya:

Rid di paregraf dɛn we de bifo di say we se “Lan Mɔ.”
Rid di skripchɔ dɛn ɛn tray fɔ ɔndastand aw dɛn kɔnɛkt wit wetin yu de stɔdi.
Ɔndalayn di men wɔd dɛn we go mek yu mɛmba di ansa fɔ ɛni kwɛstyɔn; dis go ɛp yu we yu ɛn yu ticha de stɔdi.

Yu bin no?

Jiova Witnɛs dɛn dɔn de yuz difrɛn Baybul transleshɔn dɛn. Bɔt wi rili lɛk di New World Translation of the Holy Scriptures bikɔs i kɔrɛkt, i klia, ɛn i gɛt Gɔd in nem.—Rid di atikul na di wɛbsayt we gɛt di taytul, “Jiova Witnɛs dɛn Gɛt Dɛn Yon Baybul?”

SƆM PIPUL DƐN KIN SE: “Di Baybul at fɔ stɔdi, a nɔ gɛt tɛm ɛn trɛnk fɔ dat.”