LƐSIN 46

Wetin Mek Yu Fɔ Gi Yu Layf to Gɔd ɛn Baptayz?

PLE

Yu go gi yu layf to Jiova bay we yu pre to am ɛn prɔmis am se yu go wɔship in wan ɛn na wetin i want yu go put fɔs na yu layf. (Sam 40:8) Afta dat, yu go baptayz. We yu du dat, yu go sho ɔda pipul dɛn se yu dɔn gi yu layf to Gɔd. Di disayd we wi de disayd fɔ gi wi layf to Jiova, na di tin we impɔtant pas ɛni ɔda tin we wi go ɛva du. Dis na impɔtant tin we yu go du we go chenj yu layf. Wetin go mek yu disayd fɔ gi yu layf to Jiova?

1. Wetin de mek pɔsin gi in layf to Jiova?

Na lɔv de mek wi gi wi layf to Jiova. (1 Jɔn 4:10, 19) Di Baybul se: “Lɛk Jiova we na yu Gɔd wit ɔl yu at, wit ɔl yu layf, wit ɔl yu maynd, ɛn wit ɔl yu trɛnk.” (Mak 12:30) Wi nɔ jɔs de sho se wi lɛk Gɔd bay wetin wi de se, bɔt wi de sho bak bay wetin wi de du. Jɔs lɛk aw man ɛn uman we lɛk dɛnsɛf de mared, na so di lɛk we wi lɛk Jiova de mek wi gi wi layf to am ɛn baptayz.

2. Us blɛsin Jiova de gi to in savant dɛn we dɔn baptayz?

We yu baptayz, yu de jɔyn Jiova in famili we gɛt pipul dɛn we gladi. Da tɛm de, yu go si bɔku we dɛn aw Jiova de sho se i lɛk yu, ɛn yu go kam nia am mɔ ɛn mɔ pas aw yu de naw. (Rid Malakay 3:16-18.) Apat frɔm we yu go gɛt Jiova as yu Papa, yu go gɛt brɔda ɛn sista dɛn bak ɔlsay na di wɔl we lɛk am ɛn we lɛk yu. (Rid Mak 10:29, 30.) Bɔt yu nid fɔ du sɔm tin dɛn bifo yu baptayz. Yu nid fɔ lan bɔt Jiova, lɛk am, ɛn gɛt fet pan in Pikin. Dɔn bak, yu fɔ gi yu layf to Jiova. We yu du dɛn tin dɛn de, dɔn yu bapayz, yu go gɛt di chans fɔ gɛt layf we go de sote go. Gɔd in Wɔd se: “Baptizim . . . de sev una naw.”—1 Pita 3:21.

LAN MƆ

Lan wetin mek i impɔtant fɔ lɛ yu gi yu layf to Jiova ɛn baptayz.

3. Wi ɔl fɔ disayd udat wi go sav

Trade na Izrɛl, sɔm pipul dɛn bin de tink se dɛn go wɔship Jiova ɛn wɔship di lay lay gɔd we na Beal. Bɔt Jiova bin sɛn in prɔfɛt Ilayja fɔ kɔrɛkt da rɔng we aw dɛn bin de tink. Rid Fɔs Kiŋ 18:21, dɔn una tɔk bɔt dis kwɛstyɔn:

Wetin di Izrɛlayt dɛn bin nid fɔ disayd fɔ du?

Lɛk di Izrɛlayt dɛn, wisɛf nid fɔ disayd udat wi go sav. Rid Lyuk 16:13, dɔn una tɔk bɔt dɛn kwɛstyɔn dɛn ya:

Wetin mek wi nɔ go wɔship Jiova ɛn wɔship ɔda pɔsin ɔ ɔda tin?
Aw wi go sho Jiova se na in wi dɔn disayd fɔ wɔship?

4. Tink gud gud wan bɔt di lɛk we Jiova lɛk yu

Jiova dɔn gi wi bɔku fayn fayn gift dɛn. Wetin wi go gi am? Ple di VIDIO.

VIDIO: Gi Yu Gift to Gɔd (3:04)

Wetin na sɔm we dɛn we Jiova dɔn sho se i lɛk yu? Rid Sam 104:14, 15 ɛn 1 Jɔn 4:9, 10, dɔn una tɔk bɔt dɛn kwɛstyɔn dɛn ya:

Us gift dɛn we Jiova dɔn gi yu we yu rili gladi fɔ?
Aw dɛn gift dɛn de, de mek yu fil bɔt am?

We wi gɛt gift we wi rili lɛk, wi kin want lɛ di pɔsin we gi wi di gift no se wi rili gladi fɔ am. Rid Ditarɔnɔmi 16:17, dɔn una tɔk bɔt dis kwɛstyɔn:

We yu tink bɔt ɔl di tin dɛn we Jiova dɔn du fɔ yu, wetin dat go mek yu du fɔ am?

5. We yu gi yu layf to Jiova, yu go gɛt bɔku blɛsin dɛn

Bɔku pipul dɛn biliv se we plɛnti pipul dɛn sabi dɛn, dɛn gɛt gud wok, ɔ mɔni, dat de mek dɛn gladi. Yu tink se dat na tru? Ple di VIDIO, dɔn una tɔk bɔt di kwɛstyɔn dɛn we de dɔŋ:

VIDIO: Futbɔl Na Bin di Men Tin na Mi Layf (5:45)

Pan ɔl we di futbɔla na di vidio bin lɛk fɔ ple futbɔl, wetin mek i bin lɛf da wok de?
I disayd fɔ gi in layf to Jiova, nɔto to futbɔl. Yu tink se i disayd fɔ du di rayt tin? Wetin mek?

Bifo di apɔsul Pɔl bi Kristian, i bin gɛt wan impɔtant wok we i bin de du. Wan femɔs ticha bin dɔn tich am di Ju dɛn lɔ. Bɔt i bin lɛf ɔl dat fɔ bi Kristian. Yu tink se Pɔl bin rigrɛt wetin i du? Rid Filipians 3:8, dɔn una tɔk bɔt dɛn kwɛstyɔn dɛn ya:

Wetin mek Pɔl bin se ɔl di tin dɛn we i bin de du bifo i bi Kristian na “bɔku dɔti?”
Wetin i bin gɛt we i lɛf ɔl dɛn tin dɛn de?
Ɛni ɔda we de we wi go yuz wi layf we bɛtɛ pas fɔ sav Jiova?