1-3. Wetin mek wi ɔl tan lɛk jelman dɛn? Wetin Jiova go du fɔ mek day nɔ de igen?

IMAJIN se dɛn put yu na jel fɔ mek yu go de de te yu day, fɔ sɔntin we nɔto yu du. No we nɔ de fɔ mek dɛn pul yu. I tan lɛk se yu nɔ gɛt op fɔ tumara bambay, ɛn yu nɔ ebul fɔ du ɛnitin bɔt dat. Bɔt naw yu kam no se sɔmbɔdi de we gɛt pawa fɔ pul yu na jel, ɛn i prɔmis yu se i go ɛp yu! Aw yu go fil?

² Wi ɔl tan lɛk jelman dɛn to day. Ilɛk wetin wi du, no we nɔ de fɔ rɔn pan am. Bɔt Jiova gɛt di pawa fɔ mek wi nɔ day igen. Ɛn di Baybul prɔmis se: “Di las tin we Gɔd go pwɛl na day.”—Fɔs Lɛta Fɔ Kɔrint 15:​26.

³ Imajin di kayn gladi at we yu go gɛt we yu nɔ gɛt fɔ wɔri bɔt day igen! Bɔt nɔto day nɔmɔ Jiova go pul kɔmɔt. I prɔmis fɔ gi layf bak to di wan dɛn we bin dɔn day. Tink bɔt wetin dat go min fɔ yu.—Ayzaya 26:​19, NW.

4. (a) Wetin de kɔrej wi we wi fambul ɔ wi padi day? (b) Udat dɛn na bin sɔm pan Jizɔs in padi dɛn?

⁴ We wi fambul ɔ wi bɛst padi day, i nɔ kin izi fɔ mek wi bia di pen. Wi kin fil se wi nɔ ebul du ɛnitin. Natin nɔ de we wi go ebul du fɔ mek di pɔsin gɛt  layf bak. Bɔt di Baybul gi wi kɔrej. (Rid Sɛkɛn Lɛta Fɔ Kɔrint 1:​3, 4.) Lɛ wi tɔk bɔt wan ɛgzampul we sho aw Jiova ɛn Jizɔs rili want fɔ gi layf bak to di wan dɛn we wi lɛk. We Jizɔs bin de na di wɔl, bɔku tɛm i bin de go fɛn Lazarɔs ɛn in sista dɛn, we na Mata ɛn Meri. Dɛn ɔl tri na bin Jizɔs in padi dɛn. Di Baybul se: “Jizɔs bin lɛk Mata, Mata in sista ɛn Lazarɔs.” Dɔn wan de Lazarɔs day.—Jɔn 11:​3-5.

5, 6. (a) Wetin Jizɔs bin du we i si Lazarɔs in fambul ɛn padi dɛn de kray? (b) We wi no aw Jizɔs bin fil bɔt day, wetin mek dat fɔ kɔrej wi?

⁵ Jizɔs bin go fɔ kɔrej Meri ɛn Mata . We Mata yɛri se Jizɔs de kam, i bin kɔmɔt na di siti fɔ go mit am. I bin gladi fɔ si Jizɔs, bɔt i tɛl am se: “If yu bin de na ya, mi brɔda nɔ bin fɔ day.” Mata bin tink se Jizɔs let fɔ kam. Afta dat, Jizɔs bin si Mata in sista, Meri, de kray. We Jizɔs bin si se ɔlman in at bin rili pwɛl, i fil am bad bad wan ɛn i bin kray. (Jɔn 11:​21, 33, 35) I bin fil di pen we pɔsin kin fil we di wan we i lɛk day.

⁶ We wi no se Jizɔs de fil di we aw wi kin fil bɔt day, dat de kɔrej wi. I de sho wi se Jiova ɛn Jizɔs nɔ lɛk we pipul dɛn de day. (Jɔn 14:​9) Jiova gɛt di pawa fɔ mek day nɔ de igen, ɛn na dat i go du jisnɔ.

7, 8. Wetin mek Mata nɔ bin want fɔ mek dɛn pul di ston na Lazarɔs in grev? Wetin Jizɔs bin du?

⁷ We Jizɔs rich na di grev usay dɛn bɛr Lazarɔs, big ston bin de na di domɔt. Jizɔs bin tɛl dɛn fɔ “pul di ston kɔmɔt.” Bɔt Mata nɔ bin want mek dɛn  pul di ston kɔmɔt. Lazarɔs in bɔdi bin dɔn de na di grev fɔ 4 dez. (Jɔn 11:​39) I nɔ bin no wetin Jizɔs bin want fɔ du fɔ in brɔda.

⁸ We dɛn pul di ston, na de Jizɔs ala lawd wan se: “Lazarɔs, kam na do!” Wetin Mata ɛn Meri si afta dat bin rili wɔndaful. Lazarɔs we bin dɔn day “kɔmɔt insay di grev.” (Jɔn 11:​43, 44) Lazarɔs bin gɛt layf bak! I bin jɔyn in fambul ɛn padi dɛn igen. Dɛn ol am, tɔch am, ɛn tɔk to am. Dis na bin mirekul! Jizɔs bin gi layf bak to Lazarɔs.

9, 10. (a) Udat bin gi Jizɔs pawa fɔ gi layf bak to pipul dɛn we bin dɔn day? (b) Wetin mek di stori bɔt pipul dɛn we bin gɛt layf bak rili impɔtant to wi?

⁹ Yu tink se Jizɔs bin de gi layf bak to pipul dɛn bay in yon pawa? Nɔ-o. Bifo Jizɔs gi layf bak to Lazarɔs, i bin pre to Jiova, ɛn Jiova bin gi am di pawa fɔ mek i gi Lazarɔs layf bak. (Rid Jɔn 11:​41, 42.) Nɔto Lazarɔs nɔmɔ bin gɛt layf bak. Di Baybul tɛl wi bɔt wan 12 ia ol titi we bin sik bad bad wan. In papa we nem Jayrɔs, bin rili want lɛ i wɛl, ɛn i bin beg Jizɔs fɔ mek i mɛn am. Na bin in wangren pikin. As i bin de tɔk to Jizɔs, sɔm man dɛn kam tɛl am se “mek in nɔ wɔri di Masta igen, bikɔs in pikin dɔn day.” Bɔt Jizɔs bin tɛl Jayrɔs se: “Jayrɔs, nɔ fred, yu jɛs biliv.” Dɔn in ɛn Jayrɔs go na di os. As dɛn rich nia di os, Jizɔs si ɛn yɛri we pipul dɛn de kray. Jizɔs tɛl dɛn se: “Wetin mek una de kray bita bita wan so ɛn mek nɔys? Di pikin nɔ day, na slip i de slip.” In mama ɛn in papa go mɔs de wɔnda wetin  Jizɔs bin min. Jizɔs bin se mek ɔlman go na do, ɛn i go wit di pikin in mama ɛn in papa na di rum usay dɛn le di titi. Jizɔs bin ol in an saful wan ɛn tɛl am se: “Mi pikin, grap!” Imajin aw di pikin in mama ɛn papa bin gladi we i grap wantɛm wantɛm ɛn bigin fɔ waka! Jizɔs dɔn gi layf bak to dɛn gyal pikin. (Mak 5:​22-24, 35-42; Lyuk 8:​49-56) Frɔm da tɛm de, ɛnitɛm we dɛn si dɛn pikin, dɛn go de mɛmba wetin Jiova dɔn yuz Jizɔs fɔ du fɔ dɛn. *

¹⁰ Di wan dɛn we Jizɔs bin gi layf bak, bin day leta. Bɔt wetin wi rid bɔt dɛn pipul ya so rili impɔtant bikɔs i de gi wi rial op. Jiova want fɔ gi layf bak to pipul dɛn we dɔn day, ɛn i go du am.

11. Wetin Ɛkliziastis 9:​5 tich wi bɔt Lazarɔs?

¹¹ Di Baybul tɔk klia wan se “dayman nɔ . . . no natin.” Na dat bin apin to Lazarɔs. (Ɛkliziastis 9:​5) Jɔs lɛk wetin Jizɔs bin se i bin tan lɛk se na slip Lazarɔs bin de slip. (Jɔn 11:​11) We Lazarɔs bin de na di grev, i nɔ bin “no natin.”

12. Aw wi no se Lazarɔs bin gɛt layf bak?

¹² We Jizɔs bin gi Lazarɔs layf bak, bɔku pipul dɛn bin si dat. Ivin Jizɔs in ɛnimi dɛn bin no se i du dis mirekul. Lazarɔs bin gɛt layf bak. So dis na tin we  rili apin. (Jɔn 11:​47) Bɔku pipul dɛn bin go fɔ si Lazarɔs, ɛn dɛn kam fɔ biliv se na Gɔd sɛn Jizɔs. Jizɔs in ɛnimi dɛn nɔ bin lɛk dat, so dɛn plan fɔ kil Jizɔs ɛn Lazarɔs.—Jɔn 11:​53; 12:​9-11.

13. Wetin mek wi shɔ se Jiova go gi layf bak to di wan dɛn we dɔn day?

¹³ Jizɔs bin se “ɔl dɛn pipul we dɔn day” go gɛt layf bak. (Jɔn 5:​28) Dis min se ɔl di wan dɛn we Jiova go mɛmba go gɛt layf bak. Bɔt fɔ mek Jiova gi layf bak to pɔsin, i fɔ mɛmba ɔltin bɔt di pɔsin. Yu tink se i go ebul fɔ mɛmba? Wɛl, bɔku bɔku sta dɛn de na di skay. Di Baybul se Jiova de kɔl dɛn ɔl bay nɛm. (Rid Ayzaya 40:​26.) If Jiova ebul fɔ mɛmba di sta dɛn nem dɛn wan bay wan, dat min se i go izi fɔ mɛmba ɔltin bɔt ɔl di wan dɛn we i go gi layf bak. Wetin impɔtant pas ɔl na dat, na Jiova mek ɔltin, so wi no se i gɛt di pawa fɔ gi layf bak to di wan dɛn we dɔn day.

14, 15. Wetin di tin we Job tɔk, tich wi bɔt di tɛm we mɔtalman go gɛt layf bak?

¹⁴ Job we bin fetful biliv se di wan dɛn we dɔn day go gɛt layf bak. I bin aks se: “If pɔsin day, i go gɛt layf bak?” Dɔn i bin tɛl Jiova se: “Yu go kɔl, ɛn a go ansa. Yu rili want fɔ si di tin dɛn we yu dɔn mek.” Fɔ tru, Job bin no se Jiova de rili wet fɔ di tɛm we i go gi layf bak to di wan dɛn we dɔn day.—Job 14:​13-15, NW.

¹⁵ We yu dɔn no se di wan dɛn we dɔn day go gɛt layf bak, aw dat mek yu fil? Sɔntɛm yu go de wɔnda, ‘Wetin go apin to mi fambul ɛn padi dɛn we dɔn  day? Dɛn go gɛt layf bak?’ We wi no se Jiova rili want fɔ gi layf bak to di wan dɛn we dɔn day, dat de kɔrej wi. Lɛ wi si wetin di Baybul se bɔt usay dɛn go de ɛn udat dɛn go gɛt layf bak.

16. Uskayn layf di wan dɛn we go gɛt layf bak go ɛnjɔy na dis wɔl?

¹⁶ Trade di wan dɛn we bin gɛt layf bak bin jɔyn dɛn fambul ɛn padi dɛn na dis wɔl. Na so i go bi bak tumara bambay, bɔt i go bɛtɛ fawe pas di wan we bin apin trade. Wetin mek? Na bikɔs di wan dɛn we go gɛt layf bak na dis wɔl go gɛt di chans fɔ de sote go ɛn dɛn nɔ go day igen. Dɛn go liv na wɔl we difrɛn fawe frɔm di wan we wi de tide. Wɔ nɔ go de igen, pipul dɛn nɔ go de pwɛl lɔ, ɛn sik nɔ go de igen.

17. Udat dɛn go gɛt layf bak?

¹⁷ Udat dɛn go gɛt layf bak? Jizɔs bin se “ɔl dɛn pipul we dɔn day go yɛri wetin di Pikin de tɔk, ɛn dɛn go rayz frɔm dɛn grev.” (Jɔn 5:​28, 29) Ɛn Rɛvɛleshɔn 20:​13 tɛl wi se: “Ɔl dɛn wan we bin dɔn day na wata kɔmɔt na di wata kam ɔp; ɔl dɛn wan we bin dɔn day we bin de na grev, rayz.” Fɔ tru, bɔku bɔku pipul dɛn go gɛt layf bak. Di apɔsul Pɔl bin tɔk bak se: “Gɔd go mek ɔlman, gud ɔ bad, rayz frɔm dɛn grev.” (Rid Di Apɔsul Dɛn Wok [Akt] 24:​15.) Wetin dat min?

18. Udat na di “gud” pipul dɛn we go gɛt layf bak?

¹⁸ Udat na di “gud” pipul dɛn? Sɔm pan dɛn na  Jiova in fetful savant dɛn we bin dɔn de bifo Jizɔs kam na di wɔl. Pipul dɛn lɛk Noa, Ebraam, Sera, Mozis, Rut, ɛn Ɛsta go gɛt layf bak na dis wɔl. Yu kin rid bɔt sɔm pan dɛn man ɛn uman dɛn ya na Di Ibru Pipul Dɛn chapta 11. Wetin wi go se bɔt Jiova in fetful savant dɛn we day insay wi yon tɛm? Dɛnsɛf na “gud” pipul dɛn, so dɛn go gɛt layf bak.

19. Udat na di “bad” pipul dɛn? Us chans Jiova go gi dɛn?

 ¹⁹ Di “bad” pipul dɛn na di bɔku bɔku pipul dɛn we nɔ gɛt di chans fɔ lan bɔt Jiova. Pan ɔl we dɛn dɔn day, Jiova nɔ stil fɔgɛt dɛn. I go gi dɛn layf bak, ɛn dɛn go gɛt di chans fɔ lan bɔt am ɛn sav am.

20. Udat dɛn nɔ go gɛt layf bak?

²⁰ Yu tink se na ɔlman we dɔn day go gɛt layf bak? Nɔ. Jizɔs bin se sɔm pipul dɛn nɔ go gɛt layf bak. (Lyuk 12:​5, NW) Udat go disayd if pɔsin go gɛt layf bak ɔ i nɔ go gɛt layf bak? Na Jiova na di men Jɔj, bɔt i dɔn gi Jizɔs di rayt bak “fɔ jɔj ɔl dɛn pipul we dɔn day ɛn ɔl dɛn wan we nɔ day yet.” (Di Apɔsul Dɛn Wok [Akt] 10:​42) Ɛnibɔdi we i jɔj as wikɛd pɔsin ɛn we nɔ gri fɔ chenj, nɔ go gɛt layf bak.—Luk Ɛndnot 19 na pej 215.

21, 22. (a) Uskayn bɔdi di wan dɛn we go gɛt layf bak fɔ go de na ɛvin go gɛt? (b) Udat na di fɔs pɔsin we bin gɛt layf bak fɔ go de na ɛvin?

²¹ Di Baybul tɛl wi bak se sɔm pipul dɛn go go na ɛvin. We pɔsin gɛt layf bak fɔ go de na ɛvin, i nɔ go gɛt layf bak wit mɔtalman bɔdi. I go gɛt layf bak fɔ go de na ɛvin as spirit pɔsin.

²² Jizɔs na di fɔs pɔsin we gɛt layf bak fɔ go de na ɛvin. (Jɔn 3:​13) Tri dez afta dɛn kil Jizɔs, Jiova bin gi am layf bak. (Sam 16:​10; Di Apɔsul Dɛn Wok [Akt] 13:​34, 35) Jizɔs nɔ bin gɛt layf bak wit mɔtalman bɔdi. Di apɔsul Pita bin ɛksplen se “dɛn kil am we in na bin mɔtalman bɔt i gɛt layf bak as spirit pɔsin.” (Pita In Fɔs Lɛta 3:​18, NW) Jizɔs bin  gɛt layf bak as pawaful spirit pɔsin! (Fɔs Lɛta Fɔ Kɔrint 15:​3-6) Bɔt di Baybul se nɔto Jizɔs nɔmɔ go gɛt da kayn layf de.

23, 24. Udat dɛn na di pipul dɛn we “nɔ plɛnti” we Jizɔs tɔk bɔt? Na dɛn ɔmɔs?

²³ Jɔs bifo Jizɔs day, i tɛl in fetful disaypul dɛn se: “A de go rɛdi ples de fɔ una.” (Jɔn 14:​2) Dis min se sɔm pan in disaypul dɛn go gɛt layf bak fɔ go de wit am na ɛvin. Na dɛn ɔmɔs? Jizɔs bin se na smɔl nɔmba, dɛn “nɔ plɛnti.” (Lyuk 12:​32) Di apɔsul Jɔn bin sho di nɔmba we i bin si Jizɔs “tinap pantap di ay il we dɛn kɔl Zayɔn. Wan ɔndrɛd ɛn fɔti-fo tawzin pipul bin tinap de wit am.”—Rɛvɛleshɔn 14:​1.

²⁴ Na ustɛm di 144,000 Kristian dɛn go gɛt layf bak? Di Baybul tɛl wi se dis go apin afta we Krays bigin fɔ rul na ɛvin. (Fɔs Lɛta Fɔ Kɔrint 15:​23) Wi de liv na da tɛm de naw, ɛn bɔku pan di 144,000 pipul dɛn dɔn ɔlrɛdi gɛt layf bak fɔ go de na ɛvin. Di wan dɛn we stil de na di wɔl ɛn we go day insay wi yon tɛm go gɛt layf bak fɔ go de na ɛvin wantɛm wantɛm. Bɔt bɔku bɔku pipul dɛn go gɛt layf bak tumara bambay fɔ de na Paradays sote go na dis wɔl.

25. Wetin wi go lan insay di nɛks chapta?

²⁵ I nɔ go te igen, Jiova go fri ɔl mɔtalman frɔm day, ɛn day nɔ go de igen! (Rid Ayzaya 25:​8.) Bɔt wetin di wan dɛn we gɛt fɔ go na ɛvin, de go du de? Di Baybul ɛksplen se dɛn go rul wit Jizɔs insay Gɔd in gɔvmɛnt. Wi go lan mɔ bɔt da gɔvmɛnt de insay di nɛks chapta.