1, 2. Bɔku tɛm, us kwɛstyɔn dɛn pipul dɛn kin lɛk fɔ aks?

PIKIN dɛn kin aks plɛnti kwɛstyɔn dɛn. Yu kin ɛksplen sɔntin to dɛn, bɔt bɔku tɛm dɛn kin aks bak, ‘Wetin mek?’ Dɔn we yu tray fɔ ansa dɛn, dɛn kin stil aks bak, ‘Wetin mek?’

² Ilɛksɛf wi yɔŋ ɔ wi ol, wi ɔl kin gɛt kwɛstyɔn dɛn. Wi kin gɛt kwɛstyɔn dɛn bɔt wetin wi fɔ it, wɛr, ɔ bay. Ɔ sɔntɛnde wi go gɛt impɔtant kwɛstyɔn dɛn bɔt layf ɛn tumara bambay. Bɔt we wi nɔ gɛt ansa dɛn we go satisfay wi, wi kin lɛf fɔ fɛn di ansa dɛn.

3. Wetin mek plɛnti pipul dɛn de tink se dɛn nɔ go gɛt ansa to di impɔtant kwɛstyɔn dɛn we dɛn gɛt?

³ Yu tink se di Baybul gɛt di ansa to di impɔtant kwɛstyɔn dɛn we wi kin aks? Na so sɔm pipul dɛn kin tink, bɔt dɛn kin fil se di Baybul at fɔ ɔndastand. Dɛn kin tink se na di wan dɛn we de bifo pan Gɔd biznɛs, lɛk prist ɛn ticha dɛn, nɔmɔ gɛt di ansa dɛn. Ɔda wan dɛn de shem fɔ tɔk se dɛn nɔ sabi di ansa dɛn. Wetin yu tink?

4, 5. Us impɔtant kwɛstyɔn dɛn yu gɛt? Wetin mek yu fɔ kɔntinyu fɔ luk gud wan fɔ di ansa dɛn?

⁴ Sɔntɛm yu want ansa to kwɛstyɔn dɛn lɛk: Wetin mek a de na di wɔl? Wetin go apin to mi we a day? Aw Gɔd tan lɛk? Jizɔs we bin sabi tich bin se: ‘Una aks Gɔd fɔ ɛnitin, i go gi una; una luk gud, una go fɛn wetin una de luk fɔ; una nɔk, Gɔd go opin di do  fɔ una.’ (Matyu 7:​7) Nɔ giv-ɔp te yu gɛt di ansa dɛn we yu go biliv.

⁵ If yu kɔntinyu fɔ “luk gud” wan, yu go fɛn di ansa dɛn na di Baybul. (Prɔvabs 2:​1-5) Di ansa dɛn nɔ at fɔ ɔndastand. Wetin yu go lan go mek yu gɛt gladi at rayt naw ɛn i go gi yu op fɔ di bambay. Lɛ wi tɔk bɔt wan kwɛstyɔn we de kɔnfyus plɛnti pipul dɛn.

6. Wetin mek sɔm pipul dɛn de tink se Gɔd nɔ bisin bɔt di sɔfa we dɛn de sɔfa?

⁶ Bɔku pipul dɛn tink se Gɔd nɔ bisin bɔt wi. Dɛn kin fil se if Gɔd bisin bɔt wi, di wɔl nɔ go de lɛk aw i de so. Ɔlsay na di wɔl, wi de yɛri bɔt wɔ, bad at, ɛn plɛnti ɔda bad tin dɛn. Pipul dɛn de sik, sɔfa, ɛn day. Sɔm pipul dɛn de tink se, ‘If Gɔd bisin bɔt wi, wetin mek i nɔ de mek wi lɛf fɔ sɔfa?’

7. (a) Aw di bigman dɛn pan Gɔd biznɛs de mek pipul dɛn tink se Gɔd wikɛd? (b) Wetin mek wi shɔ se nɔto Gɔd wi fɔ blem fɔ di bad tin dɛn we de apin?

⁷ Sɔntɛnde, na di wan dɛn we de bifo pan Gɔd biznɛs kin mek pipul dɛn de tink se Gɔd wikɛd. We bad tin apin, dɛn kin se na Gɔd mak am. Dɛn kin se na dat Gɔd want. Dɛn kin blem Gɔd we dɛn de tɔk dis kayn we. Di Baybul tɛl wi se Gɔd nɔ de ɛva du bad. Jems 1:​13 tɛl wi se Gɔd nɔ de ɛva tɛst pɔsin wit bad tin. I se: “Wɛn ɛnitin mit pɔsin we go mek di pɔsin want fɔ du bad, i nɔ fɔ se, ‘Na Gɔd mek a want du dis bad ya.’ Bikɔs Gɔd nɔ de du bad ɛn i nɔ de du ɛnibɔdi ɛnitin we go mek di pɔsin fil fɔ du bad.” Dat  min se pan ɔl we Gɔd nɔ dɔn stɔp dɛn bad tin dɛn fɔ apin, i nɔ go ɛva mek dɛn apin. (Rid Job 34:​10-12.) Lɛ wi si wan ɛgzampul.

8, 9. Wetin mek i nɔ go fayn fɔ blem Gɔd fɔ wi prɔblɛm dɛn? Gi wan ɛgzampul.

⁸ Imajin wan yɔŋ man we de na os wit in mama ɛn papa. In papa lɛk am pasmak ɛn i dɔn ɛp am fɔ no aw fɔ disayd wetin gud. Dɔn, di yɔŋ man mek tranga-yes pan in papa ɛn kɔmɔt na os. I du bad bad tin dɛn ɛn gɛt trɔbul. Yu go blem in papa fɔ wetin apin to am bikɔs i nɔ stɔp am fɔ lɛ i nɔ kɔmɔt na os? Nɔ-o, yu nɔ go blem in papa! (Lyuk 15:​11-13) Lɛk da papa de, Gɔd nɔ bin stɔp mɔtalman we dɛn bigin fɔ liv bad layf. So if sɔntin bad apin na fɔ mɛmba se nɔto Gɔd de mek i apin. I nɔ go fayn fɔ blem Gɔd.

⁹ Gɔd gɛt gud rizin we mek i nɔ stɔp dɛn bad bad tin ya fɔ apin. Na Chapta 11, yu go lan wetin di Baybul se bɔt dis. Bɔt wi shɔ se Gɔd lɛk wi, ɛn wi nɔ fɔ ɛva blem am fɔ wi prɔblɛm dɛn. Infakt, na In nɔmɔ ebul sɔlv dɛn.—Ayzaya 33:​2.

10. Wetin mek wi biliv se Gɔd go pul ɔl di bad tin dɛn we pipul dɛn de du?

¹⁰ Gɔd oli. (Ayzaya 6:​3) Dis min se i klin pas ɛnitin we yu kin tink bɔt. Gɔd nɔ de du ɛnitin we bad. So wi kin abop pan am. Nɔto so mɔtalman tan. Sɔntɛnde dɛn kin du bad tin dɛn. Dɔn, ivin di lida we ɔnɛs nɔ gɛt pawa fɔ pul ɔl di bad tin dɛn we pipul dɛn de du. Nɔbɔdi nɔ gɛt pawa lɛk Gɔd. I ebul ɛn i go mek di bad bad tin dɛn nɔ apin igen.—Rid Sam 37:​9-11.

11. Aw Gɔd de fil we yu de sɔfa?

¹¹ Aw Gɔd de fil we i de si wetin de apin na di wɔl ɛn wetin de apin to yu? Di Baybul tich wi se Gɔd “lɛk udat de du wetin rayt.” (Sam 37:​28) So i rili bisin bɔt wetin rayt ɛn rɔng. I et we pipul dɛn de sɔfa. Di Baybul se trade trade Gɔd “in at pwɛl” we i si di wɔl ful-ɔp wit bad bad tin dɛn. (Jɛnɛsis 6:​5, 6) Gɔd nɔ de chenj. (Malakay 3:​6) Di Baybul se Gɔd rili bisin bɔt yu.—Rid Pita In Fɔs Lɛta 5:​7, NW.

12, 13. (a) Wetin mek wi lɛk ɛn bisin bɔt pipul dɛn? Aw wi de fil bɔt di sɔfa we pipul dɛn de sɔfa na di wɔl? (b) Wetin mek yu go biliv se Gɔd go pul ɔl di tin dɛn we de mek wi sɔfa ɛn we nɔ rayt?

¹² Di Baybul tɔk bak se Gɔd mek wi lɛk aw i de. (Jɛnɛsis 1:​26) Dis min se Gɔd gi wi di sem gud kwaliti dɛn we i gɛt. So if yu de fil bad we yu si gud pipul dɛn de sɔfa, na fɔ no se Gɔd de fil am pas yu! Aw wi no dis?

¹³ Di Baybul tich wi se “Gɔd nɔ de tap fɔ lɛk.” (Jɔn In Fɔs Lɛta 4:​8) Na dat de mek i du ɔltin we i de du. So wi ebul lɛk ɔda pipul dɛn bikɔs na so Gɔd de. If yu bin gɛt di pawa fɔ mek pipul dɛn lɛf fɔ sɔfa, wetin yu bin fɔ dɔn du? Yu bin fɔ dɔn mek dɛn lɛf fɔ sɔfa, nɔto so? Yu go mɔs du am bikɔs yu lɛk pipul dɛn. Yu tink se Gɔd go ebul du am? I gɛt di pawa ɛn bikɔs i lɛk wi i go pul ɔl di tin dɛn we nɔ rayt ɛn we de mek wi sɔfa. So na fɔ biliv se ɔl di fayn fayn prɔmis dɛn we wi bin tɔk bɔt na pej 4 ɛn pej 5, na tin dɛn we gɛt fɔ apin. Fɔ lɛ yu biliv ɔl dɛn prɔmis ya, i go fayn fɔ mek yu no fɔs bɔt di Gɔd we se i go du dɛn.

14. Wetin na Gɔd in nem? Aw wi no se wi fɔ yuz am?

¹⁴ If yu want pɔsin fɔ bi yu padi, wetin na di fɔs tin we yu kin tɛl am? Na yu nem. Yu tink se Gɔd gɛt nem? Bɔku rilijɔn dɛn se in nem na Gɔd ɔ Lɔd, bɔt dɛn wan ya nɔto nem dɛn. Na jɔs taytul dɛn lɛk “kiŋ” ɔ “prɛsidɛnt.” Gɔd dɔn tɛl wi se in nem na Jiova. Sam 83:​18 (NW) se: “Lɛ pipul dɛn no se, yu we nem Jiova, na yu wangren de oba ɔlman na di wɔl.” Di pipul dɛn we rayt di Baybul yuz Gɔd in nem bɔku bɔku tɛm. Jiova want mek yu sabi in nem ɛn yuz am. I sho yu in nem bikɔs i want yu fɔ bi in padi.

15. Wetin di nem Jiova min?

¹⁵ Gɔd in nem, Jiova, gɛt minin. I min se Gɔd kin du ɛnitin we i dɔn prɔmis, ɛn i ebul fɔ du ɛnitin we i want fɔ du. Natin nɔ go stɔp am. Na in nɔmɔ fit fɔ gɛt dis nem. *

16, 17. Wetin di Baybul min we i se Jiova na di (a) “Ɔlmayti”? (b) “Kiŋ we de sote go”? (c) Wan we “mek ɔltin”?

 ¹⁶ As wi bin dɔn rid, Sam 83:​18 (NW) tɔk bɔt Jiova se: “Na yu wangren de oba ɔlman na di wɔl.” Rɛvɛleshɔn 15:​3 (NW) tɔk bak se: “Jiova Gɔd, di Ɔlmayti, yu wok dɛn gret ɛn wɔndaful. Kiŋ we de sote go, yu de du wetin rayt ɛn yu de tɔk tru ɔltɛm.” Wetin di taytul “di Ɔlmayti” min? I min se Jiova gɛt pawa pas ɔlman. Di taytul di “Kiŋ we de sote go”  min se na Gɔd wangren nɔ gɛt biginin ɛn nɔ gɛt ɛndin. Sam 90:​2 se in na di wan we bin dɔn de ɛn we go de sote go. Dis rili wɔndaful!

¹⁷ Na Jiova wangren mek ɔltin. Rɛvɛleshɔn 4:​11 se: “Wi Masta [“Jiova,” NW] ɛn wi Gɔd! Yu fit fɔ mek wi fɔdɔm na yu fut, ɛn prez yu, ɛn sho se yu gɛt pawa, bikɔs na yu mek ɔltin ɛn yu mek dɛn ɛn gi dɛn layf bikɔs na dat yu want.” Na Jiova mek di enjɛl dɛn na ɛvin, di sta dɛn, di frut dɛn, ɛn di fish dɛn we de swim na wata. Na Jiova mek ɔltin we yu de tink bɔt!

18. Wetin mek sɔm pipul dɛn kin tink se dɛn nɔ go ɛva bi Gɔd in padi? Wetin di Baybul tɔk bɔt dis?

¹⁸ Sɔm pipul dɛn kin fred we dɛn kin rid bɔt di kwaliti dɛn we Jiova gɛt ɛn dɛn kin tink se, ‘Gɔd pawaful, i impɔtant, ɛn i de fa frɔm wi, so wetin mek i go bisin bɔt mi?’ Bɔt na so Gɔd want wi fɔ fil? Nɔ-o. Jiova want wi fɔ de nia am. Di Baybul tɛl wi se Gɔd ‘de nia wi ɔl.’ (Di Apɔsul Dɛn Wok [Akt] 17:​27) Gɔd want yu fɔ go nia am, ɛn i prɔmis se ‘i go kam nia yu.’—Jems 4:​8.

19. (a) Aw yu go bi Gɔd in padi? (b) Uswan pan Jiova in kwaliti dɛn we yu lɛk?

¹⁹ Aw yu go bi Gɔd in padi? Jizɔs bin se: “Fɔ gɛt da layf de, we go de sote go, dɛn fɔ no yu, we na di wangren tru Gɔd, ɛn dɛn fɔ no Jizɔs Krays, we yu sɛn kam to dɛn.” (Jɔn 17:​3) Kɔntinyu fɔ lan ɛn yu go no Jiova ɛn Jizɔs. Ɛn dat go mek yu gɛt layf we go de sote go. Fɔ ɛgzampul, wi bin dɔn lan se “Gɔd na di wan we nɔ de tap fɔ lɛk.” (Jɔn In Fɔs Lɛta 4:​16) Bɔt i gɛt ɔda fayn fayn kwaliti dɛn bak. Di Baybul tɛl wi se Jiova ‘gud ɛn i de sho masi, i nɔ gɛt wamat.’ (Ɛksodɔs 34:​6) Jiova na ‘gud PAPA GƆD ɛn i de fɔgiv.’ (Sam 86:​5) Gɔd peshɛnt ɛn i nɔ de kɔmɔt biɛn wi. (Pita In Sɛkɔn Lɛta 3:​9, NW; Sam 18:​25) Yu go lan mɔ bɔt Jiova in fayn kwaliti dɛn insay in Wɔd, di Baybul.

20-22. (a) Aw yu go ebul fɔ bi Gɔd in tayt padi we yu nɔ de si am? (b) Wetin yu fɔ du if pipul dɛn nɔ want yu fɔ stɔdi di Baybul?

²⁰ Aw yu go ebul fɔ bi Gɔd in tayt padi we yu nɔ de  si am? (Jɔn 1:​18; 4:​24; Fɔs Lɛta To Timoti 1:​17) We yu de rid bɔt Jiova na di Baybul, yu go sabi am mɔ lɛk rial Pɔsin. (Sam 27:​4; Lɛta Fɔ Rom 1:​20) As yu de lan bɔt Jiova, na so una padi biznɛs go de tayt mɔ ɛn mɔ, na so yu go de lɛk am ɛn want fɔ de nia am.

²¹ Yu go kam fɔ ɔndastand se Jiova na wi Papa. (Matyu 6:​9) Na in gi wi layf, ɛn i want wi fɔ ɛnjɔy am. Na dat ɛni papa we lɛk in pikin dɛn go want. (Sam 36:​9) Di Baybul tich wi se wi kin bi Jiova in padi. (Jems 2:​23) Jɔs imajin dat. Jiova we mek di wan ol wɔl want yu fɔ bi in padi!

²² Sɔm pipul dɛn nɔ go gladi we yu de stɔdi di Baybul, ɛn dɛn go want fɔ stɔp yu. Dɛn de fred se yu go chenj yu rilijɔn. Bɔt nɔ mek ɛnibɔdi stɔp yu fɔ lan bɔt aw yu go bi Gɔd in padi. In na di bɛst Padi we yu go ɛva gɛt.

23, 24. (a) Wetin mek yu fɔ kɔntinyu fɔ aks kwɛstyɔn? (b) Wetin wi go tɔk bɔt na di nɛks chapta?

²³ We yu de stɔdi di Baybul, nɔto ɔltin yu go ebul ɔndastand wantɛm wantɛm. So nɔ shem fɔ aks kwɛstyɔn ɔ aks fɔ ɛp. Jizɔs bin se i fayn fɔ put wisɛf dɔŋ lɛk smɔl pikin dɛn. (Matyu 18:​2-4) Pikin dɛn kin aks plɛnti kwɛstyɔn dɛn. Gɔd want mek yu sabi di ansa dɛn. So na fɔ stɔdi di Baybul gud gud wan fɔ mek shɔ se wetin yu de lan, na di tru.—Rid Di Apɔsul Dɛn Wok [Akt] 17:​11.

²⁴ Di bɛst we fɔ lan bɔt Jiova na fɔ stɔdi di Baybul. Insay di nɛks chapta, wi go lan bɔt wetin mek di Baybul difrɛn frɔm ɛni ɔda buk.