Afta we Jizɔs bin pik in 12 apɔsul dɛn, i go na wan ples usay bɔku pipul dɛn kin gɛda. Dɛn kɔmɔt frɔm Galili, Judia, Taya, Saydɔn, Siria, ɛn di ɔda pat dɛn na di Jɔdan. Dɛn kam wit pipul dɛn we gɛt difrɛn difrɛn sik dɛn ɛn pipul dɛn we gɛt dimɔn dɛn we bin de mɔna dɛn. Jizɔs mɛn dɛn ɔl. Dɔn i sidɔm dɔŋ na di mawntin ɛn bigin fɔ tɔk. I ɛksplen wetin wi nid fɔ du if wi want fɔ bi Gɔd in padi. Wi fɔ no se wi nid Jiova ɛn wi fɔ lan fɔ lɛk am. Bɔt wi nɔ go ebul fɔ lɛk Gɔd if wi nɔ lɛk ɔda pipul dɛn. Wi fɔ du gud to ɔlman ɛn trit dɛn fayn, ivin wi ɛnimi dɛn.

Jizɔs tɔk se: ‘Nɔto yu padi dɛn nɔmɔ yu fɔ lɛk. Yu nid fɔ lɛk yu ɛnimi dɛn bak, ɛn yu fɔ fɔgiv pipul dɛn wit ɔl yu at. If pɔsin vɛks pan yu, yu nid fɔ go mit am wantɛm wantɛm ɛn tɛl am sɔri. Trit ɔda pipul dɛn di sem we aw yu want mek dɛn trit yu.’

 Jizɔs bin gi di pipul dɛn gud advays bak bɔt mɔni ɛn prɔpati. I tɔk se: ‘I impɔtant fɔ gɛt tayt padi biznɛs wit Gɔd pas fɔ gɛt bɔku mɔni. Tifman go ebul fɔ tif yu mɔni, bɔt i nɔ go ebul fɔ tif yu padi biznɛs wit Jiova. Stɔp fɔ wɔri bɔt wetin yu go it, drink, ɔ wɛr. Luk di bɔd dɛn. Gɔd kin mek shɔ se dɛn gɛt bɔku tin fɔ it ɔltɛm. Nɔto we yu wɔri pasmak go mek yu gɛt lɔng layf. Mɛmba se Jiova no wetin yu nid.’

Di pipul dɛn nɔ ɛva yɛri sɔmbɔdi tɔk di kayn we aw Jizɔs bin tɔk. Dɛn bigman dɛn pan Gɔd biznɛs nɔ bin ɛva tich dɛn bɔt dɛn tin dɛn ya. Wetin mek Jizɔs bin sabi fɔ tich fayn fayn wan? Na bikɔs ɔl wetin i bin de tich kɔmɔt frɔm Jiova.