Di apɔsul dɛn bin obe di lɔ we Jizɔs gi dɛn fɔ prich di gud nyuz ɔlsay na di wɔl. Insay di ia 47 afta Krays, di brɔda dɛn na Antiɔk bin sɛn Pɔl ɛn Banabas fɔ go prich. Dɛn tu brɔda dɛn ya we rili gɛt zil travul go ɔlsay na Eshia Minɔ ɛn go na ples dɛn lɛk Dabi, Listra, ɛn Aykoniɔm.

Pɔl ɛn Banabas bin de prich to ɔlman ilɛksɛf di pɔsin gɛt mɔni ɔ i po, if i yɔŋ ɔ i ol. Bɔku pipul dɛn bin gri wit di tru tin dɛn we dɛn tich dɛn bɔt Jizɔs. We Pɔl ɛn Banabas bin de prich to wan gɔvnɔ na Sayprɔs we nem Sagiɔs Pɔlɔs, wan jujuman tray fɔ stɔp dɛn. Pɔl tɛl di jujuman se: ‘Jiova de agens yu.’ Wantɛm wantɛm, di jujuman blayn. We Gɔvnɔ Pɔlɔs si dat, i kam fɔ bi Kristian.

Pɔl ɛn Banabas bin de prich ɔlsay, frɔm os to os, na makit ples dɛn, na strit, ɛn na di sinagɔg dɛn. We dɛn mɛn wan man na Listra we nɔ ebul fɔ waka, di wan dɛn we si we di mirekul apin bin tink se Pɔl ɛn Banabas na gɔd dɛn, ɛn dɛn tray fɔ wɔship dɛn. Bɔt Pɔl ɛn Banabas stɔp dɛn ɛn tɛl dɛn se: ‘Na Gɔd nɔmɔ una fɔ wɔship! Wi na jɔs mɔtalman dɛn.’ Dɔn sɔm patikyula Ju pipul dɛn kam fɔ mek di krawd tɔn agens Pɔl. Di pipul dɛn ston Pɔl ɛn drɛg am kɔmɔt insay di siti, ɛn dɛn lɛf am fɔ day. Bɔt Pɔl bin stil de alayv! Wantɛm wantɛm, di brɔda dɛn kam fɔ ɛp am ɛn kɛr am go bak insay di siti. Leta, Pɔl go bak na Antiɔk.

Insay di ia 49 afta Krays, Pɔl travul bak fɔ go prich. Afta we Pɔl kɔmɔt to di brɔda dɛn na Eshia Minɔ, i kɛr di gud nyuz go  na Yurop. I go na Atɛns, Ɛfisɔs, Filipay, ɛn ɔda ples dɛn. Saylas, Lyuk, ɛn wan yɔŋman we nem Timoti, bin jɔyn Pɔl fɔ travul. Dɛn ɔl wok togɛda fɔ mek nyu kɔngrigeshɔn dɛn ɛn ɛp dɛn fɔ tinap tranga wan. Pɔl bin de na Kɔrint fɔ wan ia siks mɔnt fɔ ɛp di brɔda dɛn we de de fɔ tinap tranga wan. I prich, tich, ɛn rayt lɛta dɛn to bɔku kɔngrigeshɔn dɛn. Pɔl bin de mek tɛnt dɛn bak. Afta sɔm tɛm, Pɔl go bak na Antiɔk.

Leta, insay di ia 52 afta Krays, Pɔl go prich bak. Dis tɛm, i bigin na Eshia Minɔ. I travul go na Filipay ɛn go dɔŋ na Kɔrint. Pɔl bin de na Ɛfisɔs fɔ lɔng tɛm de tich, mɛn pipul dɛn, ɛn ɛp di kɔngrigeshɔn. I bin de gi tɔk dɛn ɛvride na wan ɔl na wan skul. Bɔku pipul dɛn lisin ɛn chenj. Faynali, afta we Pɔl dɔn prich di gud nyuz na bɔku land dɛn, i go na Jerusɛlɛm.