Mozis bin de na Midian fɔ 40 ia. I bin mared ɛn bɔn pikin dɛn. Wan de we i bin de mɛn in ship dɛn nia Mawnt Saynay, i bin si sɔntin we rili wɔndaful. Faya bin de kech pan wan chukchuk stik, bɔt i nɔ bin de bɔn! We Mozis go nia de fɔ no wetin mek di stik nɔ bin de bɔn, i yɛri wan vɔys kɔmɔt insay di stik ɛn tɛl am se: ‘Mozis! Nɔ kam nia ya. Pul yu sandal bikɔs di say we yu tinap oli.’ Na Jiova bin de tɔk to am tru wan enjɛl.

Mozis bin de fred, so i kɔba in fes. Di vɔys tɔk se: ‘A dɔn si aw di Izrɛlayt dɛn de sɔfa. A go sev dɛn frɔm di Ijipshian dɛn an, ɛn a go mek dɛn go na fayn ples. Na yu na di pɔsin we go lid mi pipul dɛn fɔ kɔmɔt na Ijipt.’ Yu nɔ tink se dat bin sɔprayz Mozis?

Mozis bin aks se: ‘Wetin a fɔ se we di pipul dɛn aks mi udat sɛn mi?’ Gɔd tɛl am se: ‘Tɛl dɛn se na Jiova, Ebraam in Gɔd, Ayzak in Gɔd, ɛn Jekɔp in Gɔd na in sɛn yu.’ Mozis aks Jiova se: ‘Wetin a go du if di pipul dɛn nɔ lisin to mi?’ So Jiova bin gi Mozis sɔntin fɔ sho se i go ɛp am. I bin tɛl Mozis fɔ trowe in stik na grɔn. Dɔn di stik bin tɔn to snek! We Mozis bin ol di snek in tel, i bin tɔn to stik bak. Jiova tɔk se: ‘We yu pafɔm dis mirekul, dat go pruv se na mi sɛn yu.’

Mozis tɔk se: ‘A nɔ sabi tɔk.’ Jiova prɔmis am se: ‘A go tɛl yu wetin fɔ se, ɛn a go sɛn yu brɔda Erɔn fɔ ɛp yu.’ Bikɔs Mozis bin no se Jiova de sɔpɔt am, i bin tek in wɛf ɛn in bɔypikin dɛn fɔ go bak na Ijipt.