Jezibɛl yɛri wetin apin to Beal in prɔfɛt dɛn, ɛn i bin rili vɛks. I sɛn mɛsej to Ilayja fɔ tɛl am se: ‘Tumara, yu go day lɛk Beal in prɔfɛt dɛn.’ Ilayja bin rili fred, ɛn i rɔnawe go na wan dɛzat. I pre to Jiova se: ‘Jiova, a nɔ go ebul fɔ bia dis igen. Mek lɛ a day.’ Ilayja bin dɔn taya, so i ledɔm ɔnda wan stik ɛn slip.

Wan enjɛl kam wek am ɛn tɛl am saful wan se: ‘Grap lɛ yu it.’ Ilayja si wan rawnd bred pan ston dɛn we wam ɛn wan bɔtul wata. I it, drink, ɛn go slip bak. Di enjɛl wek am bak ɛn tɛl am se: ‘It. Yu nid fɔ gɛt trɛnk fɔ travul.’ So Ilayja it bak. Dɔn i travul fɔ 40 dez ɛn 40 nɛt te i rich na Mawnt Orɛb. Ilayja go na wan kev fɔ go slip. Na de Jiova tɔk to am. I tɛl am se: ‘Wetin yu de du na ya, Ilayja?’ Ilayja ansa am se: ‘Di Izrɛlayt dɛn nɔ kip dɛn prɔmis we dɛn mek to yu. Dɛn dɔn pwɛl pwɛl yu ɔlta dɛn ɛn kil yu prɔfɛt dɛn. Naw, dɛn de tray fɔ kil mi bak.’

Jiova tɛl am se: ‘Go tinap na di mawntin.’ Fɔs, wan pawaful briz bin blo na di kev. Dɔn atkwek apin ɛn faya kech. Faynali, Ilayja yɛri wan lo vɔys. I kɔba in fes wit in klos, kɔmɔt insay di kev, ɛn tinap na do. Dɔn Jiova aks am wetin mek i rɔnawe. Ilayja tɛl am se: ‘Na mi wangren dɔn lɛf.’ Bɔt Jiova tɛl am se: ‘Nɔto yu wangren de. Na 7,000 pipul dɛn de na Izrɛl we stil de wɔship mi. Go pik Ilaysha fɔ tek yu ples as prɔfɛt.’ Wantɛm wantɛm, Ilayja go du wetin Jiova dɔn tɛl am. Yu tink se Jiova go ɛp yu we yu du wetin i want? Yɛs, i go ɛp yu. Lɛ wi tɔk bɔt sɔntin we bin apin di tɛm we ren nɔ bin de kam.