NA GƆD gi wi ɔl di gud tin dɛn we wi gɛt. I mek di san fɔ gi wi layt santɛm, ɛn i mek di mun ɛn sta dɛn fɔ gi wi layt na nɛt. Ɛn Gɔd mek di wɔl fɔ lɛ wi go de de.

Bɔt nɔto di san, di mun, di sta dɛn ɛn di wɔl na di fɔs tin dɛn we Gɔd mek. Yu sabi di fɔs tin we Gɔd mek? Di fɔs tin we Gɔd mek na pipul dɛn we tan lɛk am. Wi nɔ de si dɛn lɛk aw wi nɔ de si Gɔd. Di Baybul kɔl dɛn pipul ya enjɛl. Gɔd mek di enjɛl dɛn fɔ de wit am na ɛvin.

Di fɔs enjɛl we Gɔd mek spɛshal. Na Gɔd in fɔs pikin. Ɛn i bin de wok wit in Papa. I ɛp Gɔd fɔ mek ɔl di ɔda tin dɛn. I ɛp Gɔd fɔ mek di san, di mun, di sta dɛn ɛn di ol wɔl.

Aw di wɔl bin tan lɛk da tɛm de? Nɔbɔdi nɔ bin fɔ ebul de na di wɔl bikɔs natin nɔ bin de de. Na wata bin kɔba ɔlsay. Bɔt Gɔd bin want lɛ pipul dɛn de na di wɔl. So i bigin mek di tin dɛn we go mek pipul dɛn ebul de na di wɔl. Yu no wetin i mek?

Gɔd mek di san bigin shayn na di wɔl bikɔs layt nɔ bin de da tɛm de. I mek am wan kayn we, we santɛm ɛn nɛt go de. Afta dat Gɔd mek di grɔn de pantap di wata.

Da tɛm de, natin nɔ bin de na di grɔn. I bin tan lɛk di pikchɔ we yu de si naya so. Flawa, tik ɛn animal dɛn nɔ bin de na di wɔl. Fish dɛnsɛf nɔ bin de na di wata. Gɔd bin gɛt bɔku wok fɔ du fɔ mek animal ɛn mɔtalman go ɛnjɔy fɔ de na di wɔl.