JOSƐF nɔ ebul igen fɔ kɔntrol di we aw i de fil. So i tɛl ɔl in savant dɛn fɔ go na do. We in ɛn in brɔda dɛn nɔmɔ de insay di rum, na de Josɛf bɔs kray. Tink bɔt aw in brɔda dɛn fil, bikɔs dɛn nɔ no wetin mek i de kray. Dɔn i tɛl dɛn se: ‘Mi na Josɛf. Mi papa stil de?’

In brɔda dɛn nɔ ebul se natin. Dɛn fred. Bɔt Josɛf tɛl dɛn se: ‘Duya, una kam nia mi.’ We dɛn go nia am, na de i se: ‘Mi na Josɛf, una brɔda we una bin sɛl.’

Josɛf kɔntinyu fɔ tɔk to dɛn fayn. I tɛl dɛn se: ‘Una nɔ blem unasɛf fɔ we una sɛl mi. Na Gɔd sɛn mi na Ijipt fɔ kam sev pipul dɛn layf. Fɛro dɔn put mi fɔ rul oba di wan ol kɔntri. So naw una go wantɛm, ɛn tɛl mi papa ɔltin we dɔn apin. Ɛn una tɛl am mek i kam de naya.’

Dɔn, Josɛf put in an rawnd in brɔda dɛn, ɛn kis dɛn. We Fɛro yɛri se Josɛf in brɔda dɛn dɔn kam, i tɛl Josɛf se: ‘Mek dɛn go tek yu papa ɛn in wan ol famili ɛn mek dɛn kam de na Ijipt. A go gi dɛn di ples we fayn pas ɔl di ɔda ples dɛn na Ijipt.’

Ɛn na dat dɛn du. Na di pikchɔ, wi de si Josɛf ɛn in papa, we in papa kam na Ijipt wit in wan ol famili.

Jekɔb in famili dɔn big pas aw i bin de fɔs. Jekɔb ɛn in pikin dɛn ɛn in granpikin dɛn we kam na Ijipt, na dɛn 70. Ɛn dɛn wɛf dɛn bak bin kam, ɛn sɔntɛm bɔku savant dɛn bak bin kam. Dɛn ɔl kam de na Ijipt. Dɛn kɔl dɛn Izrɛlayt bikɔs Gɔd bin dɔn chenj Jekɔb in nem to Izrɛl. Di Izrɛlayt dɛn bin bi spɛshal pipul dɛn to Gɔd. Wi go lan bɔt dat leta.