LUK wetin dis man de bɛr na grɔn insay in os! I de bɛr wan fayn klos ɛn gold ɛn sɔm silva. I pul dɛn na Jɛriko. Yu mɛmba wetin dɛn bin tɛl dɛn fɔ du wit di tin dɛn we de na Jɛriko?

Dɛn bin fɔ pwɛl ɔltin na Jɛriko. Bɔt dɛn fɔ kam wit di gold ɛn silva dɛn ɛn put dɛn na di ples usay dɛn de kip di jɛntri na Jiova in Os. Bɔt dɛn pipul ya nɔ du wetin Gɔd tɛl dɛn. Dɛn dɔn tif di tin dɛn we dɛn fɔ go put na Jiova in Os. Di man in nem na Ekan, ɛn di wan dɛn we de wit am, na sɔm pan in famili dɛn. Lɛ wi si wetin apin we i dɔn tif dɛn tin ya.

Afta Ekan tif dɛn tin ya, Jɔshwa sɛn sɔm man dɛn fɔ go fɛt di pipul dɛn we de na wan tɔŋ we dɛn de kɔl Eay. Bɔt dɛn nɔ win di fɛt. Di pipul dɛn na Eay kil sɔm pan di Izrɛlayt dɛn ɛn di ɔda wan dɛn rɔnawe. Jɔshwa in at pwɛl bad. I ledɔn na grɔn ɛn pre to Gɔd se: ‘Wetin mek yu mek dis apin to wi?’

Jiova ansa am se: ‘Grap! Di Izrɛlayt dɛn dɔn du bad. Dɛn dɔn tek sɔm pan di tin dɛn we dɛn fɔ pwɛl, ɛn sɔm pan di tin dɛn we dɛn fɔ put na mi os. Dɛn dɔn tif wan fayn klos ɛn kip am. A nɔ go blɛs una te una pwɛl dɛn tin ya, ɛn kil di pɔsin we tek dɛn.’ Ɛn Jiova se i go sho Jɔshwa udat na di bad pɔsin.

So Jɔshwa gɛda ɔl di pipul dɛn, dɔn Jiova se na Ekan na di bad pɔsin. Ekan se: ‘A dɔn du bad. A si wan fayn klos ɛn di gold ɛn di silva. A bin want dɛn bad, so a tek dɛn. A bɛr dɛn na mi os.’

We dɛn fɛn dɛn tin ya ɛn kam wit dɛn to Jɔshwa, i tɛl Ekan se: ‘Wetin mek yu dɔn put trɔbul pan wi? Naw Jiova de kam put trɔbul pan yu!’ Na in di pipul dɛn bigin ston Ekan ɛn in famili te dɛn day. Dis de sho se wi nɔ fɔ ɛva tek sɔntin we nɔto wi yon.

Afta ɔl dis, di Izrɛlayt dɛn go fɛt di pipul dɛn na Eay bak. Bɔt naw, Jiova ɛp in pipul dɛn, ɛn dɛn win di fɛt.