YU DƆN ɛva prɔmis dɔn leta yu si se i at fɔ du wetin yu prɔmis? Na so di man we de na dis pikchɔ bin fil, ɛn na dat mek in at pwɛl so. In na wan pan di jɔj dɛn we rul na Izrɛl. Na in nem Jɛfta.

Jɛfta bin de di tɛm we di Izrɛlayt dɛn dɔn lɛf fɔ wɔship Jiova. Dɛn bigin de du bad tin dɛn bak. So Jiova mek di pipul dɛn we de na Amɔn bigin du dɛn bad tin dɛn. Dis mek di Izrɛlayt dɛn beg Jiova se: ‘Wi dɔn du yu bad. Duya, sev wi!’

Di pipul dɛn fil bad fɔ di bad tin dɛn we dɛn dɔn du. Fɔ sho se dɛn fil bad, dɛn bigin wɔship Jiova bak. So Jiova ɛp dɛn.

Di pipul dɛn pik Jɛfta fɔ ɛp dɛn fɔ fɛt di Amɔnayt dɛn. Jɛfta bin want mek Jiova ɛp am fɔ win bad. So i prɔmis Jiova se: ‘If yu mek a win di Amɔnayt dɛn, we a tɔn bak, a go gi yu di fɔs pɔsin we kɔmɔt na mi os fɔ kam mit mi.’

Jiova lisin Jɛfta in prɔmis, ɛn i ɛp am fɔ win di fɛt. We Jɛfta go bak na os, yu no udat na di fɔs pɔsin we kam mit am? Na in gyal pikin. Na in na di wan gren pikin we i gɛt. Jɛfta kray se: ‘E mi pikin! Yu dɔn mek mi at pwɛl bad. Bɔt a dɔn prɔmis Jiova, ɛn a nɔ go se a nɔ de du am.’

We Jɛfta in pikin no bɔt in papa in prɔmis, in at bin pwɛl fɔs. In at bin pwɛl bikɔs i gɛt fɔ lɛf in papa ɛn in padi dɛn. Na Jiova in Os we de na Shaylɔ i gɛt fɔ go de te i day. So i tɛl in papa se: ‘If yu dɔn prɔmis Jiova, na fɔ du am.’

So Jɛfta in pikin go de na Jiova in Os we de na Shaylɔ, ɛn i sav Jiova de te i day. Di uman dɛn na Izrɛl kin go fɛn am na Shaylɔ 4 dez insay di ia, ɛn dɛn kin ɛnjɔy dɛnsɛf. Di pipul dɛn bin lɛk Jɛfta in pikin bikɔs in na pɔsin we lɛk fɔ sav Jiova.