WE BAD tin kin apin to di Izrɛlayt dɛn, dɛn kin pre to Jiova. Ɛn Jiova kin ansa dɛn prea. I kin gi dɛn lida dɛn fɔ ɛp dɛn. Di Baybul kɔl dɛn lida ya jɔj dɛn. Jɔshwa na di fɔs jɔj, ɛn sɔm pan di jɔj dɛn we bin de afta am na Otniɛl, Ihud ɛn Shamga. Bɔt tu pan di pipul dɛn we bin de ɛp di Izrɛlayt dɛn na uman dɛn. Dɛn nɛm dɛn na Dɛbora ɛn Jeɛl.

Dɛbora na uman prɔfɛt. Jiova kin tɛl am wetin gɛt fɔ apin tumara bambay. Dɔn Dɛbora kin tɛl di pipul dɛn wetin Jiova dɔn tɛl am. Dɛbora na jɔj bak. I kin sidɔm ɔnda wan pam tik we de na wan kɔntri we de ɔp di il. Di pipul dɛn kin kam to am we dɛn gɛt prɔblɛm fɔ lɛ i ɛp dɛn.

Dɛn tɛm dɛn de, na Jabin na bin di kiŋ na Kenan. I bin gɛt 900 chariɔt dɛn fɔ fɛt. Jabin in sojaman dɛn bin ebul fɛt, so bɔku Izrɛlayt dɛn dɔn bi in savant. Na Sisera na di bigman fɔ ɔl Kiŋ Jabin in sojaman dɛn.

Wan de, Dɛbora sɛn kɔl wan ɔda jɔj we nem Berak. Dɛbora tɛl am se: ‘Jiova se mek yu tek 10,000 man dɛn ɛn go wit dɛn na Mawnt Tebɔ. I go mek Sisera kam mit yu dɔŋ di mawnten. Ɛn i go mek yu win Sisera ɛn in sojaman dɛn.’

Berak tɛl Dɛbora se: ‘A go go if yusɛf go wit mi.’ Dɛbora go wit Berak, bɔt i tɛl am se: ‘Yu nɔ go gɛt di prez fɔ dis fɛt bikɔs Jiova se na uman go kil Sisera.’ Ɛn na so i bi.

Berak kɔmɔt na Mawnt Tebɔ fɔ go mit Sisera ɛn in sojaman dɛn. I nɔ tu te, Jiova mek ebi ren kam. Di ples ful-ɔp wit wata, ɛn bɔku pan Sisera in sojaman dɛn drawn. Bɔt Sisera kɔmɔt pan in chariɔt ɛn rɔnawe.

Afta sɔm tem, Sisera kam na Jeɛl in os. Jeɛl mek i kam insay, dɔn i gi am milk fɔ drink. Dis mek Sisera fil fɔ slip. Ɛn i nɔ tu te, Sisera bigin slip dip dip wan. Na de Jeɛl tek wan shap ayɛn we dɛn kin yuz fɔ fiks tɛnt na grɔn, ɛn nak am insay dis bad man in ed. Leta, we Berak kam, Jeɛl sho am Sisera in dedebɔdi. So yu si, wetin Dɛbora bin tɔk dɔn bi.

Afta ɔl dis, dɛn kil Kiŋ Jabin insɛf, ɛn di Izrɛlayt dɛn gɛt kolat bak fɔ sɔm tɛm.