SƆL stil de tray fɔ ol Devid. I tek 3,000 pan in sojaman dɛn we sabi fɛt bɛtɛ bɛtɛ wan, ɛn go fɛn Devid. We Devid no bɔt dis, i sɛn sɔm pan in man dɛn fɔ go luk usay Sɔl ɛn in sojaman dɛn de slip da nɛt de. Dɔn Devid aks tu pan in man dɛn se: ‘Uswan pan una want go wit mi usay Sɔl ɛn in sojaman dɛn de?’

Abishay ansa am se: ‘A de go wit yu.’ Abishay na Devid in sista we nem Zuraya, in pikin. We Sɔl ɛn in man dɛn de slip, Devid ɛn Abishay waka saful saful go de. Dɛn tek Sɔl in spia ɛn in wata bɔtul we bin de nia in edsay. Nɔbɔdi nɔ si dɛn ɛn nɔbɔdi nɔ yɛri dɛn bikɔs dɛn ɔl bin de slip dip dip wan.

Luk Devid ɛn Abishay naw. Dɛn dɔn kɔmɔt usay Sɔl ɛn in sojaman dɛn de, ɛn natin nɔ du dɛn. Dɛn de ɔp wan il naw. Devid ala to di bigman fɔ ɔl di sojaman dɛn na Izrɛl, se: ‘Abna, wetin mek yu nɔ de gad di kiŋ? We di kiŋ in spia ɛn in wata bɔtul?’

We Sɔl wek, i yɛri Devid in vɔys. So i aks se: ‘Devid, na yu?’ Yu de si Sɔl ɛn Abna oba yanda?

Devid ansa am se: ‘Yɛs sa, na mi.’ Dɔn Devid se: ‘Wetin mek yu de tray fɔ ol mi? Na us bad tin a dɔn du yu? Luk yu spia. Mek wan pan yu man dɛn kam tek am.’

Sɔl se: ‘A dɔn du bad tin. A dɔn du tin lɛk se a nɔ gɛt sɛns.’ We dɛn tɔk dɔn, Devid go in yon we ɛn Sɔl tɔn bak. Bɔt Devid go ɛn tɔk na in at se: ‘If a nɔ tek tɛm, wan de Sɔl go kil mi. Lɛ a rɔn go na di Filistin dɛn kɔntri.’ Ɛn na so i du. Devid ful di Filistin dɛn, ɛn i mek dɛn biliv se i de fɔ dɛn.

Afta sɔm tɛm, di Filistin dɛn go fɛt di Izrɛlayt dɛn. Dɛn kil Sɔl ɛn Jonɛtan pan di fɛt. Dis mek Devid in at pwɛl. So i rayt wan bɛrin siŋ. I siŋ se: ‘E mi brɔda, a fil am we yu day! Jonɛtan, a lɛk yu bad bad wan.’

Afta ɔl dis, Devid go bak na Izrɛl. I go de na wan tɔŋ we dɛn de kɔl Ibrɔn. Sɔm pipul dɛn bin want mek Devid bi kiŋ. Bɔt ɔda pipul dɛn bin want mek Sɔl in pikin we nem Ishboshɛt, bi kiŋ. So dɛn bigin fɛt dɛnsɛf. Bɔt Devid in man dɛn win di fɛt. Na 30 ia Devid ol we i bi kiŋ. Ɛn i rul fɔ sɛvin ɛn af ia na Ibrɔn. Sɔm pan di pikin dɛn we Devid bɔn na Ibrɔn na Amɔn, Absalɔn ɛn Adonija.

Wan de, Devid ɛn in man dɛn go fɛt di pipul dɛn we de na wan fayn tɔŋ we dɛn de kɔl Jerusɛlɛm. Devid ɛn in man dɛn win dis fɛt. Na Joab bin de bifo Devid in sojaman dɛn. Joab na Devid in sista we nem Zuraya, in ɔda pikin. Devid mek Joab di bigman fɔ ɔl in sojaman dɛn. Afta dat, Devid bigin rul na Jerusɛlɛm.