I DƆN pas tɛn ia naw frɔm we Nɛbukanɛza kɛr ɔl di Izrɛlayt dɛn we sabi buk bɛtɛ bɛtɛ wan, na Babilɔn. Bɔt luk wetin de apin naw! Dɛn de bɔn Jerusɛlɛm. Dɛn kil bɔku Izrɛlayt dɛn, ɛn dɛn go wit bɔku na Babilɔn.

Mɛmba se, Jiova in prɔfɛt dɛn bin de wɔn di Izrɛlayt dɛn se na dis go apin to dɛn if dɛn nɔ lɛf fɔ du bad. Bɔt di pipul dɛn nɔ lisin to di prɔfɛt dɛn. Bifo dɛn wɔship Jiova, na lay lay gɔd dɛn dɛn bin de wɔship. So Jiova fɔ pɔnish dɛn! Wetin mek wi se Gɔd fɔ pɔnish di Izrɛlayt dɛn? Na bikɔs Gɔd in prɔfɛt we nem Izikɛl, bin dɔn tɔk bɔt di bad tin dɛn we dɛn bin de du.

Yu no udat na Izikɛl? In na wan pan di yɔŋ man dɛn we Kiŋ Nɛbukanɛza bin kɛr go na Babilɔn tɛn ia bifo dɛn kam pwɛl Jerusɛlɛm. Na da sem tɛm de dɛn go wit Daniɛl, Shedrak, Mishak ɛn Abɛdnigo na Babilɔn.

We Izikɛl de na Babilɔn, Jiova sho am di bad tin dɛn we bin de apin na di tɛmpul we de na Jerusɛlɛm. Na mirekul Jiova du fɔ sho am dɛn tin ya. Pan ɔl we Izikɛl de na Babilɔn, Jiova mek i si ɔltin we de apin na di tɛmpul. Izikɛl in at pwɛl we i si dɛn tin ya.

Jiova tɛl Izikɛl se: ‘Luk di bad bad tin dɛn we di pipul dɛn de du na di tɛmpul. Luk di snek dɛn ɛn di ɔda animal dɛn we dɛn drɔ na di wɔl. Luk we dɛn de wɔship dɛn!’ Izikɛl de si ɔl dɛn tin ya, ɛn i rayt wetin i si.

Dɔn Jiova aks Izikɛl se: ‘Yu de si wetin di Izrɛlayt edman dɛn de ayd fɔ du?’ Izikɛl si 70 man dɛn de wɔship lay lay gɔd dɛn. Di man dɛn de tɔk se: ‘Jiova nɔ de si wi. I dɔn kɔmɔt na di land.’

Dɔn Jiova sho Izikɛl sɔm uman dɛn we de nia wan pan di gɛt dɛn na di tɛmpul. Dɛn de wɔship wan lay lay gɔd we dɛn kɔl Tamuz. Afta dat, Jiova sho Izikɛl sɔm man dɛn we tinap bifo di tɛmpul. Na lɛk 25 man dɛn so Izikɛl si, ɛn dɛn butu de wɔship di san.

Jiova se: ‘Dɛn pipul ya nɔ gɛt wan rɛspɛkt fɔ mi. Na insay mi tɛmpul bak dɛn de kam du ɔl dɛn bad bad tin ya.’ So Jiova se: ‘A go mek dɛn sɔfa fɔ dis bad tin we dɛn de du. Ɛn a nɔ go sɔri fɔ dɛn.’

We i dɔn pas lɛk tri ia so afta Jiova sho Izikɛl dɛn tin ya, di Izrɛlayt dɛn du tin we mek kiŋ Nɛbukanɛza vɛks pan dɛn. So Kiŋ Nɛbukanɛza go fɔ fɛt dɛn. Afta wan ɛn af ia, di pipul dɛn na Babilɔn brok di wɔl na Jerusɛlɛm, go insay di tɔŋ ɛn bɔn am. Dɛn kil bɔku Izrɛlayt dɛn ɛn dɛn go wit di ɔda wan dɛn na Babilɔn.

Wetin mek Jiova mek dɛn bad bad tin ya apin to di Izrɛlayt dɛn? Na bikɔs dɛn nɔ bin de lisin to Jiova ɛn dɛn nɔ bin de du wetin in lɔ se. Dis de sho wi se i fayn fɔ de du wetin Jiova tɛl wi ɔltɛm.

Afta Kiŋ Nɛbukanɛza bɔn Jerusɛlɛm, i mek sɔm pipul dɛn lɛf na Izrɛl. Ɛn i mek wan Izrɛlayt man we nem Gɛdelaya, de oba dɛn. Bɔt sɔm Izrɛlayt dɛn kil Gɛdelaya. Dis mek di Izrɛlayt dɛn fred se di pipul dɛn na Babilɔn go kam kil dɛn ɔl fɔ dis bad tin we dɔn apin. So dɛn rɔnawe go na Ijipt, ɛn dɛn fos Jɛrimaya fɔ go wit dɛn.

Dis mek Izrɛl ɛmti. Nɔbɔdi nɔ bin de de fɔ 70 ia. Bɔt Jiova prɔmis se, afta 70 ia, i go mek in pipul dɛn kam bak na Izrɛl. Bɔt bifo da tɛm de kam, lɛ wi si wetin bin dɔn de apin to Gɔd in pipul dɛn we de na Babilɔn.