LƐ WI tɔk smɔl bɔt sɔm tin dɛn we bin bi bifo Ɛzra go na Jerusɛlɛm. Tu Izrɛlayt dɛn we nem Mɔdikaya ɛn Ɛsta, bi impɔtant pipul dɛn fɔ di pipul dɛn na Pashya. Ɛsta bi kwin ɛn in kɔzin we na Mɔdikaya bi di sɛkɔn pɔsin afta di kiŋ. Lɛ wi si aw ɔl dis bi.

Ɛsta in mama ɛn papa day we i bin smɔl, so na Mɔdikaya mɛn am. Aasirɔs na di kiŋ fɔ di pipul dɛn na Pashya. I bin de na wan tɔŋ we dɛn de kɔl Shushan ɛn Mɔdikaya na wan pan in savant dɛn. Wan de, di kiŋ in wɛf we nem Vasti, nɔ bin du wetin di kiŋ tɛl am fɔ du. So di kiŋ pik ɔda uman fɔ bi in wɛf. Yu no udat i pik? Na Ɛsta.

Yu de si dis prawd man we dɛn pipul ya de butu to? Na in nem Eman. In na wan impɔtant man fɔ di pipul dɛn na Pashya. Di man we sidɔm, na Mɔdikaya. Eman want mek Mɔdikaya butu to am. Bɔt Mɔdikaya nɔ du am. I no se i nɔ fayn fɔ butu to mɔtalman. Dis mek Eman vɛks bad. So yu no wetin i du?

Eman tɔk bad bɔt di Izrɛlayt dɛn to di kiŋ. I tɛl di kiŋ se: ‘Di Izrɛlayt dɛn na bad pipul dɛn we nɔ de du wetin yu lɔ se. Dɛn fɔ kil dɛn pipul ya.’ Aasirɔs nɔ bin no se Ɛsta na Izrɛlayt. So i lisin to wetin Eman tɛl am. I mek di lɔ ɛn sho di tɛm we dɛn go kil ɔl di Izrɛlayt dɛn.

We Mɔdikaya yɛri bɔt di lɔ, in at pwɛl bad. I sɛn tɛl Ɛsta se: ‘Go beg di kiŋ lɛ i nɔ kil wi.’ Na Pashya, wan lɔ de we se, pɔsin nɔ fɔ go to di kiŋ pas di kiŋ kɔl di pɔsin. Bɔt Ɛsta go to di kiŋ pan ɔl we i nɔ kɔl am. Di kiŋ pɔynt di gold stik we bin de na in an to am, we min se dɛn nɔ fɔ kil am. Ɛsta tɛl di kiŋ se i want mek di kiŋ ɛn Eman go to am fɔ go it. We dɛn de it, di kiŋ aks Ɛsta wetin i want lɛ i du fɔ am. Ɛsta se i go tɔk wetin i want if di kiŋ ɛn Eman kam bak di ɔda de fɔ kam it.

Di kiŋ ɛn Eman kam bak di ɔda de fɔ kam it. We dɛn de it, Ɛsta tɛl di kiŋ se: ‘Dɛn de kam kil mi ɛn mi pipul dɛn.’ Dis mek di kiŋ vɛks. Di kiŋ aks am se: ‘Udat gɛt da maynd de fɔ kil una?

Ɛsta tɛl am se: ‘Di bad pɔsin na Eman.’

Dis mek di kiŋ vɛks bad bad wan. So i mek dɛn kil Eman. Dɔn, i mek Mɔdikaya bi di sɛkɔn pɔsin afta am na di kiŋdɔm. Di kiŋ tɛl Mɔdikaya fɔ mek wan lɔ se, di Izrɛlayt dɛn fɔ fɛt fɔ dɛnsɛf di de we dɛn fɔ kil dɛn. Bikɔs Mɔdikaya na bigman naw, bɔku pipul dɛn ɛp di Izrɛlayt dɛn fɔ fɛt, ɛn dɛn win di bad pipul dɛn.