LUK di bad tin we de apin naya! Dɛn de kil Jizɔs. Dɛn dɔn nel Jizɔs in an ɛn in fut pan wan stret stik. Wetin mek dɛn du dis kayn tin ya to Jizɔs?

Na bikɔs dɛn nɔ lɛk Jizɔs. Yu no udat na di pipul dɛn we du dis? Wan pan dɛn na Setan. In na wikɛd enjɛl. Na in bin mek Adam ɛn Iv du wetin Jiova nɔ want. Ɛn na Setan mek Jizɔs in ɛnimi dɛn du dis kayn bad tin ya to Jizɔs.

Bifo sɛf dɛn nel Jizɔs, in ɛnimi dɛn du am bad bad tin dɛn. Yu mɛmba we dɛn go ol Jizɔs na di gadin we de na Gɛtsimani? Udat na dɛn ɛnimi ya? Na di edman dɛn pan Gɔd biznɛs. Lɛ wi si wetin apin afta ɔl dis.

We di edman dɛn pan Gɔd biznɛs ol Jizɔs, in apɔsul dɛn rɔnawe. Dɛn lɛf Jizɔs in wan wit dɛn bad man ya, bikɔs dɛn bin de fred. Bɔt Pita ɛn Jɔn nɔ go fa tumɔs. Dɛn bin de fala di pipul dɛn smɔl smɔl fɔ si wetin dɛn go du to Jizɔs.

Di prist dɛn kɛr Jizɔs go to wan pa we nem Anas. Anas bin dɔn bi ay prist, bɔt in nɔto ay prist igen. Bɔt di pipul dɛn nɔ te de. Afta dat, dɛn kɛr Jizɔs go na wan man we nem Kayafas, in os. Na Kayafas na di ay prist naw. Bɔku edman dɛn pan Gɔd biznɛs bin dɔn gɛda na dis man ya in os.

Dɛn kɛr Jizɔs go na Kayafas in os fɔ go aks am kwɛstyɔn dɛn. Dɔn dɛn kam wit pipul dɛn fɔ kam lay pan Jizɔs. Ɔl di edman dɛn pan Gɔd biznɛs bigin tɔk se: ‘Dis man dɔn du bad, dɛn fɔ kil am.’ Dɔn dɛn bigin pit na in fes, ɛn bit am.

We ɔl dis de bi, Pita bin de na do insay di kɔmpawnd. Di ples bin kol, so di pipul dɛn mek faya. We dɛn bin de wam dɛn bɔdi rawnd di faya, wan titi we bin de wok de, luk Pita ɛn tɔk se: ‘Dis man ya bin de wit Jizɔs.’

Pita se: ‘Nɔ, a nɔ bin de wit am.’

Tri tɛm dɛn de tɛl Pita se i bin de wit Jizɔs. Bɔt ɛnitɛm dɛn tɛl am, i de tɔk se i nɔ bin de wit Jizɔs. We Pita tɔk di tɔd tɛm se i nɔ no Jizɔs, na de Jizɔs tɔn ɛn luk am. Pita fil bad we i lay, so i rɔn go na do ɛn kray bita bita wan.

Frayde mɔnin, we di san bigin shayn, di prist dɛn kɛr Jizɔs go na di Ju Ay kɔt. Na dis kɔt ya dɛn kam tɔk wetin dɛn fɔ du to Jizɔs. Dɔn dɛn kɛr am go to wan man we de rul na Judia we nem Pɔntiɔs Paylet.

Di prist dɛn tɛl Paylet se: ‘Jizɔs na bad man. Dɛn fɔ kil am.’ We Paylet dɔn aks Jizɔs sɔm kwɛstyɔn dɛn, i tɔk se: ‘A nɔ si ɛni bad tin we dis man du.’ Dɔn Paylet mek dɛn kɛr Jizɔs go to Ɛrɔd Antipas. Na Ɛrɔd bin de rul na Galili, bɔt na Jerusɛlɛm i bin de. Ɛrɔd sɛf se, i nɔ tink se Jizɔs dɔn du ɛni bad tin. So i mek dɛn kɛr Jizɔs go bak to Paylet.

Paylet bin want fri Jizɔs. Bɔt Jizɔs in ɛnimi dɛn bin want mek i fri wan ɔda jelman. Dis man ya na wan tifman we nem Barabas. Bay dɛn 12 oklɔk aftanun, Paylet briŋ Jizɔs na do. Dɔn i tɛl di pipul dɛn se: ‘Una luk una kiŋ!’ Bɔt di bigman dɛn fɔ di prist dɛn ala se: ‘Kil am! Kil am!’ So Paylet fri Barabas, dɔn i mek di pipul dɛn kɛr Jizɔs go fɔ go kil am.

Da Frayde aftanun de, dɛn nel Jizɔs pan wan stik. Dɛn nel am midul tu wikɛd man dɛn, bɔt dɛn man ya nɔ de na di pikchɔ. Jɔs bifo Jizɔs day, wan pan di wikɛd man dɛn tɛl am se: ‘Jizɔs, duya mɛmba mi we yu go na yu kiŋdɔm.’ Jizɔs tɛl am se: ‘A prɔmis yu se, yu go de wit mi na Paradays.’

Yu nɔ tink se na fayn prɔmis dande? Yu no us Paradays Jizɔs bin de tɔk bɔt? We Gɔd bin mek di wɔl, usay Paradays bin de? Na dis wɔl Paradays bin de. Ɛn we Jizɔs go de rul na ɛvin, i go gi dis man ya layf bak, fɔ ɛnjɔy we di wɔl go dɔn bi Paradays. Wisɛf fɔ gladi fɔ dis, nɔto so?