STORI 93
Jizɔs Fid Bɔku Pipul Dɛn
WAN bad tin jɔs dɔn apin. Dɛn jɔs dɔn kil Jɔn we de baptayz pipul dɛn. Di kiŋ in wɛf we nem Ɛrodias nɔ bin lɛk Jɔn. So i mek di kiŋ kil am.
Jizɔs in at pwɛl we i yɛri se dɛn dɔn kil Jɔn. So i lɛf in disaypul dɛn ɛn go na wan kwayɛt ples. Bɔt sɔm pipul dɛn fala am go de. We Jizɔs si di pipul dɛn, i fil sɔri fɔ dɛn. So i tɔk to dɛn bɔt Gɔd in kiŋdɔm, ɛn i mɛn di wan dɛn we sik.
We ivintɛm rich, in disaypul dɛn go mit am ɛn tɛl am se: ‘Ivintɛm dɔn kam, ɛn dis na ples we pipul dɛn nɔ de. Tɛl di pipul dɛn fɔ go, so dat dɛn go go bay tin fɔ it fɔ dɛnsɛf na di vilej dɛn we de nia ya.’
Jizɔs tɛl dɛn se: ‘Una nɔ tɛl dɛn fɔ go, una gi dɛn tin fɔ it.’ Dɔn Jizɔs aks Filip se: ‘Usay wi go bay tin fɔ it fɔ ɔl dɛn pipul ya?’
Filip tɛl am se: ‘Ilɛk wi pul bɔku bɔku mɔni fɔ bay it fɔ dɛn, di it nɔ go du. Na smɔl smɔl nɔmɔ ɔlman go gɛt.’ Na de Andru se: ‘Wan bɔbɔ gɛt fayv bred ɛn tu fish. Bɔt i nɔ go du fɔ ɔl dɛn pipul ya.’
Jizɔs tɛl in disaypul dɛn se: ‘Una tɛl di pipul dɛn fɔ sidɔm na di gras.’ Dɔn Jizɔs pre to Gɔd ɛn tɛl am tɛnki fɔ di it, ɛn i bigin kɔt kɔt di bred. Dɔn di disaypul dɛn sheb di bred ɛn di fish dɛn to ɔl di pipul dɛn. Na 5,000 man dɛn, ɛn bɔku uman ɛn pikin dɛn bin de de. Dɛn ɔl it te dɛn bɛlful. Di it we lɛf we di disaypul dɛn gɛda, ful-ɔp 12 blay.
Jizɔs mek in disaypul dɛn go insay wan bot fɔ krɔs di si we de na Galili. Da nɛt de, big briz blo ɛn di wata rɔf we bin want mek di bot kapsay. Di disaypul dɛn fred bad. Midulnɛt, dɛn si pɔsin de waka pantap di wata de kam nia dɛn. Dɛn fred ɛn bigin ala, bikɔs dɛn nɔ biliv wetin dɛn de si.
Jizɔs tɛl dɛn se: ‘Una nɔ fred, na mi!’ Dɛn stil nɔ biliv se na Jizɔs. Na in Pita se: ‘Masta, if na yu fɔ tru, mek a waka pantap di wata go mit yu.’ Jizɔs se: ‘Kam!’ So Pita kɔmɔt insay di bot ɛn bigin waka pantap di wata fɔ go mit Jizɔs. Bɔt Pita bigin fred. I nɔ tu te, i bigin go dɔŋ di wata, bɔt Jizɔs sev am.
Wan ɔda tɛm, Jizɔs fid bɔku bɔku pipul dɛn bak. I fid dɛn wit sɛvin bred ɛn smɔl smɔl fish dɛn. Di it du fɔ ɔl di pipul dɛn bak. Na fayn tin Jizɔs du fɔ di pipul dɛn, nɔto so? We Jizɔs bi kiŋ fɔ Gɔd in kiŋdɔm, wi nɔ go wɔri fɔ natin igen.
