WE JIZƆS ɛn in apɔsul dɛn kɔmɔt na di ɔpgarɛt, dɛn go na di gadin we de na Gɛtsimani. Dɛn dɔn kam ya bɔku tɛm. Jizɔs tɛl in apɔsul dɛn mek dɛn nɔ slip. I tɛl dɛn fɔ pre. Dɔn i kɔmɔt nia dɛn ɛn go bifo say smɔl. I butu ɛn put in fes na grɔn fɔ pre.

Afta sɔm tɛm, Jizɔs go bak usay in apɔsul dɛn de. Wetin yu tink se dɛn bin de du? Dɛn bin de slip! Jizɔs tɛl dɛn tri tɛm mek dɛn nɔ slip, bɔt ɛnitɛm we i kam, i de mit dɛn de slip. We Jizɔs kam to dɛn di las tɛm, i tɛl dɛn se: ‘Na tɛm lɛk dis una de slip? Di tɛm dɔn kam fɔ lɛ mi ɛnimi dɛn ol mi.’

I nɔ tu te, na in dɛn yɛri plɛnti plɛnti pipul dɛn de kam. We dɛn kin luk, dɛn si sɔm man dɛn de kam wit sɔd ɛn tin dɛn fɔ fɛt. Ɛn dɛn ol tik dɛn we gɛt faya fɔ mek dɛn si. We di pipul dɛn rich nia Jizɔs ɛn in disaypul dɛn, na de wan man kɔmɔt na di krawd ɛn go stret to Jizɔs. Dɔn i kis Jizɔs, lɛk aw yu de si na di pikchɔ. Dis man na Judas Iskariɔt. Wetin mek i kis Jizɔs?

Jizɔs aks am se: ‘Judas, na kis yu de tek sɛl mi?’ Dis kis min sɔntin. Na dis kis ya mek di man dɛn we kam wit Judas, no se na da pɔsin de na Jizɔs, ɛn na in dɛn kam fɔ. So di man dɛn kam fɔ kam ol Jizɔs. Bɔt Pita nɔ mek dɛn go wit Jizɔs so nɔmɔ o! I pul di sɔd we i bin gɛt ɛn kɔt di man we de nia am, in yes. Bɔt Jizɔs tɔch di man in yes ɛn mɛn am.

Jizɔs tɛl Pita se: ‘Put yu sɔd bak usay i bin de. Yu nɔ no se if a want, a go tɛl mi papa fɔ sɛn bɔku bɔku enjɛl dɛn fɔ sev mi?’ Jizɔs bin fɔ dɔn du dat, if i bin want. Bɔt Jizɔs nɔ tɛl Gɔd fɔ sɛn enjɛl dɛn, bikɔs i no se di tɛm dɔn kam fɔ lɛ bad pipul dɛn kɛr am go. So i mek dɛn go wit am. Lɛ wi si wetin apin to Jizɔs we dɛn go wit am.