WAN de, Jizɔs tɛl wan man se i fɔ lɛk in neba. Di man aks Jizɔs se: ‘Udat na mi neba?’ Jizɔs no wetin di man bin de tink. Di man bin de tink se in neba na pɔsin we dɛn ɔl tu kɔmɔt na di sem kɔntri ɛn de na di sem rilijɔn. Yu no wetin Jizɔs tɛl di man?

Jizɔs pul wan stori fɔ di man. Na so i kin du bɔku tɛm fɔ tich pipul dɛn. Di stori na bɔt wan man we na Ju ɛn wan ɔda man we na Samɛritan. Mɛmba se, wi bin dɔn lan se di Ju dɛn nɔ lɛk di Samɛritan dɛn. Jizɔs bigin pul di stori. I se:

Wan de, wan man we na Ju bin de waka na wan rod we de ɔp wan mawnten fɔ go dɔŋ na Jɛriko. We i de go, i mit ɔp tifman dɛn. Dɛn tek in mɔni na in an ɛn bit am te i fent.

We i te smɔl, wan prist we na Ju bin de waka na da sem rod de. We i si di man we dɛn bit, yu no wetin i du? I krɔs go di ɔdasay na di rod ɛn kɔntinyu fɔ go. Dɔn, wan ɔda man we na Gɔd-pɔsin kam pas na da sem rod de. In na Livayt. Yu fil se i tinap? Nɔ, insɛf nɔ tinap fɔ ɛp di man. Na di prist ɛn di Livayt yu de si de go dɔŋ yanda so.

Luk udat de nia di man we dɛn bit. Na wan man we na Samɛritan. Ɛn i de ɛp di Ju we dɛn bit. I de put mɛrɛsin na di say dɛn we i wund. Afta dat, i kɛr am go na wan ples usay di man go de te i wɛl.

We Jizɔs dɔn fɔ pul di stori, i aks di man wan kwɛstyɔn, i se: ‘Uswan pan dɛn tri man ya sho se in na di man we dɛn bit, in neba? Yu tink se na di prist ɔ na di Livayt ɔ na di Samɛritan?’

Di man ansa am se: ‘Na di Samɛritan. Na in ɛp di man we dɛn bit.’

Jizɔs tɛl am se: ‘Na tru yu tɔk. Yusɛf go ɛn du di sem tin to ɔda pipul dɛn.’

Yu lɛk di we aw Jizɔs de tich? Wi go lan bɔku bɔku tin dɛn we wi rid wetin Jizɔs tɔk na di Baybul, nɔto so?