YU DE si Jizɔs naya we i sidɔm? Na tich i de tich ɔl dɛn pipul ya ɔp wan mawnten na Galili. Di wan dɛn we de nia am, na in disaypul dɛn. I pik 12 pan dɛn fɔ bi in apɔsul dɛn. Di apɔsul dɛn na Jizɔs in spɛshal disaypul dɛn. Yu sabi dɛn nem dɛn?

Tu pan dɛn na Saymɔn we dɛn kin kɔl Pita, ɛn in brɔda we nem Andru. Ɔda wan dɛn na Jems ɛn in brɔda we nem Jɔn. Dɔn i gɛt bak wan ɔda wan we nem Jems, ɛn ɔda wan bak we dɛn kin kɔl Saymɔn. I gɛt tu apɔsul dɛn we nem Judas. Di wan na Judas Iskariɔt ɛn dɛn kin kɔl di ɔda wan Tadiɔs. Di ɔda apɔsul dɛn na Filip ɛn Nataniɛl we dɛn kin kɔl Batalomi, dɔn wit Matyu ɛn Tɔmɔs.

We Jizɔs kɔmɔt na Sameria, na da tɛm de fɔs i bigin prich se: ‘Di tɛm we Gɔd in kiŋdɔm go rul dɔn kam nia.’ Yu no wetin na Gɔd in kiŋdɔm? Na Gɔd in gɔvmɛnt we de na ɛvin. Na Jizɔs na di kiŋ. Jizɔs go de na ɛvin ɛn rul di wɔl. Ɛn i go mek pis de na di wɔl. Gɔd in kiŋdɔm go mek di wɔl tɔn Paradays.

Na da kiŋdɔm de Jizɔs de tich dɛn pipul ya bɔt. I de tɛl dɛn se: ‘Mek a sho una aw una fɔ pre. Una fɔ se: “Wi Papa we de na ɛvin, mek ɔlman rɛspɛkt yu nem. Mek yu kiŋdɔm bigin rul. Mek wetin yu want bi na di wɔl lɛk aw i de bi na ɛvin.”’ Bɔku pipul dɛn kin kɔl dis prea ‘Di Lɔds Prea.’ Ɛn ɔda pipul dɛn kin kɔl am di ‘Awa Fada.’ Yu sabi pre di wan ol prea?

Jizɔs tich di pipul dɛn bak aw dɛn fɔ trit dɛn kɔmpin dɛn. I tɛl dɛn se: ‘Di tin dɛn we una want mek ɔda pipul dɛn du to una, na in una fɔ du to dɛn.’ Yu kin lɛk we ɔda pipul dɛn kin trit yu fayn, nɔto so? Na dat mek Jizɔs se wi fɔ trit pipul dɛn fayn. Yu go gladi fɔ de na Paradays bikɔs ɔlman go de trit in kɔmpin fayn.