LUK wetin de apin to di bot! Na skata i de skata so. Yu de si di pipul dɛn we dɔn jomp insay di wata? Sɔm dɔn swim te dɛn kam na land. Yu de si Pɔl na di pikchɔ? Lɛ wi si wetin bin dɔn de apin to am.

Mɛmba se, Pɔl bin dɔn de na jel fɔ tu ia na Sizeria. Leta dɛn put in ɛn ɔda jelman dɛn na bot fɔ kɛr dɛn go na Rom. We dɛn rich nia Krit, ebi ebi briz bigin blo ɛn di wata rɔf. Di briz bin ebi te di man dɛn nɔ ebul fɔ kɔntrol di bot. Santɛm, dɛn man ya nɔ bin de si di san, ɛn na nɛt dɛn nɔ bin de si di sta dɛn. We i te smɔl, di wan dɛn we de insay di bot bigin fil se dɛn ɔl go day.

Bɔt Pɔl tinap bifo dɛn ɛn tɛl dɛn se: ‘Nɔbɔdi nɔ go day; na di bot nɔmɔ go pwɛl. Las nɛt, Gɔd in enjɛl kam to mi ɛn tɛl mi mek a nɔ fred. I se a go go to di kiŋ we de rul na Rom. Dɔn i tɛl mi se Gɔd go sev ɔl di wan dɛn we de na di bot wit mi.’

We di de we mek 14 rich afta di ebi ebi briz bigin blo, di man dɛn we de wok na di bot si se di wata nɔ dip igen. Na bin midulnɛt da tɛm de. Dɛn bin de fred mek di bot nɔ go jam dɛn big ston ɛn pwɛl. So dɛn ib ebi ayɛn dɛn we dɛn tay na di bot, insay di wata. Di ɔda mɔnin, dɛn si land. Dɛn tray fɔ mek di bot go na di bich we de de.

We dɛn rich nia di land, di bot go jam wan il we di sansan mek ɔnda di wata, ɛn i fasin. So di swɛlin bigin brok di bot. Di sojaman we bin di kɛr di jelman dɛn, tɛl ɔlman se: ‘Mek ɔl di wan dɛn we sabi swim jomp insay di wata ɛn swim go na land. Di wan dɛn we nɔ sabi swim fɔ jomp insay di wata ɛn ɛng pan di tin dɛn we dɔn kɔmɔt pan di bot.’ Na so ɔl di pipul dɛn du. Ɛn ɔl di 276 pipul dɛn we bin de insay di bot sev, jɔs lɛk aw di enjɛl bin tɛl Pɔl.

Di ples we dɛn swim kam, nem Mɔlta. Di pipul dɛn we de de gud, ɛn dɛn trit ɔlman we bin de na di bot, fayn. We di briz lɛf fɔ blo ɛn di wata stɛdi bak, dɛn put Pɔl na ɔda bot ɛn kɛr am go na Rom.