LUK di pikchɔ. Yu de si dɛn tɔl tɔl tik ɛn dɛn fayn fayn flawa dɛn? Yu de si bak dɛn ay ay mawnten dɛn? Na fayn ples dis, nɔto so? Luk we da animal de it na di bɔbɔ in an. Ɛn luk di ɔs dɛn ɛn di layɔn dɛn we de oba yanda. Yu nɔ go lɛk fɔ de na ples lɛk dis?

We Gɔd go dɔn mek di wɔl Paradays, i go want mek yu de de sote go. Ɛn i nɔ want mek ɛni bad tin apin to yu. Di Baybul tɔk bɔt di prɔmis we Gɔd mek to di wan dɛn we gɛt fɔ de na Paradays. I se: ‘Gɔd go de wit dɛn. Day, pen ɛn kray nɔ go de igen. Di tin dɛn we de apin naw nɔ go apin igen.’

Jizɔs go mek shɔ se ɔl dɛn fayn fayn tin ya bi. Yu no ustɛm dɛn tin ya go bi? Na we Jizɔs go dɔn pul ɔl di bad tin dɛn, ɛn ɔl di bad pipul dɛn na di wɔl. Mɛmba se, we Jizɔs bin de na di wɔl i bin de mɛn ɔlkayn sik we pipul dɛn bin gɛt. I ivin gi layf bak to di wan dɛn we bin dɔn day. Jizɔs du dis fɔ sho wetin i go du we i bi kiŋ na Gɔd in kiŋdɔm.

Yu nɔ tink se di wɔl go fayn we i go dɔn bi Paradays? Jizɔs go de rul na ɛvin wit di pipul dɛn we i dɔn pik. Dɛn go kia fɔ ɔlman ɛn mek shɔ se ɔlman gladi. Lɛ wi si wetin wi fɔ du, we go mek wi gɛt layf we go de sote go na Paradays.