1. Us bɛnifit wi go gɛt we wi wɔship Gɔd di rayt we?

JIOVA GƆD rili bisin bɔt wi ɛn i want lɛ wi du wetin i se so dat wi go bɛtɛ. If wi wɔship am di rayt we, wi go gɛt gladi at ɛn wi nɔ go gɛt di prɔblɛm dɛn we bɔku pipul dɛn de gɛt tide. Ɛn i go blɛs wi ɛn ɛp wi. (Ayzaya 48:​17) Ɔl di bɔku rilijɔn dɛn we de na di wɔl biliv se dɛn de tich di tru tin bɔt Gɔd. Bɔt dɛn de tich difrɛn difrɛn tin dɛn bɔt udat Gɔd bi ɛn wetin i want lɛ wi du.

2. Aw wi go ebul no di rayt we fɔ wɔship Jiova? Us ɛgzampul go mek wi ɔndastand dis mɔ?

² Aw yu go ebul no di rayt we fɔ wɔship Jiova? Fɔ no di rayt we fɔ wɔship Gɔd, nɔ min se pas yu no ɔl di tin dɛn we di difrɛn difrɛn rilijɔn dɛn de tich. Na fɔ jɔs lan wetin rili di Baybul de tich bɔt di tru rilijɔn. I jɔs tan lɛk if fek mɔni de na di kɔntri usay yu de, dɔn dɛn tɛl yu se mek yu pik di fek mɔni. Aw yu go du am? Yu go go fɔs fɔ go luk aw ɔl di fek mɔni dɛn de? Nɔ, yu nɔ go du dat. I go bɛtɛ if yu tek tɛm fɔ no aw di tru tru mɔni tan. We yu go dɔn no dat, yu go ebul no us mɔni na di fek wan ɛn uswan na di tru tru mɔni. Semweso, we wi lan aw tru rilijɔn tan, wi go ebul no di lay lay rilijɔn dɛn.

3. Wetin Jizɔs bin se wi fɔ du fɔ lɛ Gɔd gladi fɔ wi?

³ I fayn fɔ wɔship Jiova di we aw i want. Bɔku pipul  dɛn fil se ɔl di rilijɔn dɛn na di wɔl de du wetin Gɔd want. Bɔt nɔto dat di Baybul se. Ɛn nɔto we pɔsin tɔk se in na Kristian min se i de du wetin Gɔd want. Jizɔs bin se: “Nɔto ɔlman we de kɔl mi, ‘Masta, Masta’ go go usay Gɔd de rul na ɛvin. Na dɛn wan nɔmɔ we de du wetin mi Papa, we de na ɛvin, want, go go de.” So, fɔ lɛ Gɔd gladi fɔ wi, wi fɔ lan bɔt wetin i want wi fɔ du ɛn du am. Jizɔs bin se di wan dɛn we nɔ de du wetin Gɔd want, na pipul dɛn we “dɔn du bad.” (Matyu 7:​21-23) Jɔs lɛk aw fek mɔni nɔ gɛt valyu, na so lay lay rilijɔn sɛf nɔ gɛt valyu. Pantap dat, lay lay rilijɔn bad.

4. Wetin Jizɔs bin min we i tɔk bɔt di tu rod dɛn? Wetin go apin if pɔsin pas na ɛniwan pan dɛn rod ya?

⁴ Jiova dɔn gi ɔlman na di wɔl di chans fɔ gɛt layf we go de sote go. Bɔt fɔ lɛ wi gɛt da layf de, wi fɔ wɔship Gɔd di rayt we ɛn liv wi layf di we aw i want. Bɔku pipul dɛn nɔ de du dat. Na dat mek Jizɔs bin se: “Una pas na di smɔl get, bikɔs if una pas na di get we big ɛn fri, i go mek una day, ɛn bɔku pipul dɛn de waka de; bɔt di get we go gi layf, in smɔl ɛn i at fɔ waka, ɛn na wan wan pipul dɛn de fɛn am.” (Matyu 7:​13, 14, NW) Tru rilijɔn go mek wi gɛt layf we go de sote go ɛn lay lay rilijɔn go mek wi day. Bɔt Jiova nɔ want lɛ ɛnibɔdi day, so i de gi ɔlman di chans fɔ lan bɔt am. (Pita In Sɛkɛn Lɛta 3:​9) So wi si se, di we aw wi de wɔship Gɔd go mek wi gɛt layf ɔ go mek wi day.

5. Aw wi go ebul no di wan dɛn we de wɔship Gɔd di rayt we?

⁵ Aw pɔsin go ebul fɛn ‘di get we go gi am layf’? Jizɔs bin se pɔsin go ebul no di tru rilijɔn, we i luk di we aw di pipul dɛn we de de, de liv dɛn layf. I se: “Una go no dɛn bay wetin dɛn de du. . . . Tik we gud go bia gud tin fɔ it.” (Matyu 7:​16, 17) Dat min se, yu go ebul no di  wan dɛn we de na di tru rilijɔn we yu wach di tin dɛn we dɛn biliv ɛn di tin dɛn we dɛn de du. Pan ɔl we di wan dɛn we de wɔship Gɔd di rayt we nɔ pafɛkt, dɛn ɔl de tray fɔ du wetin Gɔd want. Lɛ wi tɔk bɔt siks tin dɛn we go ɛp wi fɔ no di wan dɛn we de wɔship Gɔd di rayt we.

6, 7. Aw Gɔd in pipul dɛn si di Baybul? Aw Jizɔs bin sho se na da we de wisɛf fɔ si di Baybul?

⁶ Gɔd in pipul dɛn de pul di tin dɛn we dɛn de tich na di Baybul. Di Baybul insɛf se: “Na Gɔd tɛl pipul ɔltin we rayt nain Buk, ɛn ɔl dɛn tin de gud fɔ mek pipul lan di tru tin, fɔ mek dɛn no dɛn tin we dɛn de du we nɔ rayt, fɔ mek dɛn wan we nɔ de du rayt bigin du wetin rayt, ɛn fɔ tɛl dɛn aw fɔ liv di layf we Gɔd want dɛn fɔ liv, so dat ɛnibɔdi we de du Gɔd wok go gɛt ɔl wetin i fɔ gɛt ɛn bi wetin i fɔ bi so dat i go ebul du ɔl kayn gud wok lɛkɛ aw i fɔ du am.” (Sɛkɛn Lɛta To Timoti 3:​16, 17) Di apɔsul Pɔl bin rayt to in kɔmpin Kristian dɛn se: “Wɛn wi tɛl una Gɔd in mɛsej, una lisin ɛn una biliv se nɔto mɛsej we mɔtalman briŋ, bɔt na Gɔd in wɔd ɛn na Gɔd in wɔd fɔ tru.” (Fɔs Lɛta Fɔ Tɛsalonayka 2:​13) So, di tin dɛn we di wan dɛn we de na di tru rilijɔn biliv ɛn de du nɔ kɔmɔt frɔm wetin mɔtalman tink. Na di Baybul dɛn kɔmɔt.

⁷ Ɔl di tin dɛn we Jizɔs Krays bin de tich, bin kɔmɔt na di Baybul. We i bin de pre to in Papa, i bin se: “Yu wɔd . . . na tru.” (Jɔn 17:​17) Jizɔs bin biliv Gɔd in Wɔd, ɛn ɔltin we i bin de tich de insay di Baybul. Na dat mek bɔku tɛm, i kin se: “Dɛn rayt na Gɔd in Buk se.” (Matyu 4:​4, 7, 10) Dɔn Jizɔs kin se wetin di Baybul se. Semweso, Gɔd in pipul dɛn nɔ de tich wetin dɛn tink. Dɛn biliv se di Baybul na Gɔd in Wɔd, ɛn na insay de dɛn de pul ɔl wetin dɛn de tich.

8. Wetin Gɔd in pipul dɛn de du we dɛn de wɔship am?

 ⁸ Di wan dɛn we de na di tru rilijɔn de wɔship Jiova in wan ɛn tɛl pipul dɛn bɔt in nem. Jizɔs bin se: “Pɔsin fɔ nil dɔŋ bifo Gɔd we nain Masta ɛn pre to am ɛn nain nɔmɔ i fɔ wok fɔ.” (Matyu 4:​10) So, na Jiova nɔmɔ Gɔd in pipul dɛn de wɔship. Wetin dɛn de du we dɛn de wɔship Gɔd? Dɛn de tɛl ɔda pipul dɛn bɔt Gɔd in nem ɛn aw i tan lɛk. Sam 83:​18 (NW) se: “Yu, we nem Jiova, na yu wangren de oba ɔlman na di wɔl.” We Jizɔs bin de na di wɔl, i bin de ɛp pipul dɛn fɔ no Gɔd. Na dat mek i pre se: “A dɔn mek dɛn pipul we yu pul kɔmɔt to di ɔda pipul dɛn na [di] wɔl ɛn we yu gi mi, no yu [“nem”, NW].” (Jɔn 17:​6) Semweso, di wan dɛn we de wɔship Gɔd di rayt we, de tɛl ɔda pipul dɛn bɔt Gɔd in nem, bɔt wetin mek Gɔd mek di wɔl, ɛn aw Gɔd de.

9, 10. Aw tru Kristian dɛn de sho se dɛn lɛk dɛn kɔmpin dɛn?

⁹ Gɔd in pipul dɛn de sho se dɛn rili lɛk dɛn kɔmpin dɛn. Jizɔs bin se: “If una lɛk una kɔmpin, ɔlman go no se una na mi lanin bɔy dɛn.” (Jɔn 13:​35) Na dis kayn lɔv ya di fɔstɛm Kristian dɛn bin gɛt fɔ dɛnsɛf. We wi lɛk wi kɔmpin lɛk aw Gɔd se, wi nɔ go et am fɔ in kɔla ɔ trayb, ɔ bikɔs i jɛntri ɔ po, ɔ bikɔs i kɔmɔt na ɔda kɔntri. We pipul dɛn lɛk dɛnsɛf dis kayn we, i go mek dɛn kam togɛda lɛk wan famili. (Rid Lɛta Fɔ Kɔlɔse 3:​14.) Di wan dɛn we de na lay lay rilijɔn nɔ lɛk dɛn kɔmpin dɛn da kayn we de. Wetin mek wi se so? Na bikɔs dɛn de kil dɛn kɔmpin dɛn we de na ɔda kɔntri ɔ ɔda trayb. Tru Kristian dɛn nɔ de kil dɛn kɔmpin dɛn ɔ ɔda pɔsin. Di Baybul se: “Gɔd in pikin dɛn ɛn Setan in pikin dɛn difrɛn: ɛni bɔdi we nɔ de du wetin rayt ɛn we nɔ lɛk in kɔmpin, nɔto Gɔd yon pikin. Na dat wi go tek no udat na Gɔd yon pikin dɛn ɛn udat na Setan yon. . . . Wi fɔ lɛk wi kɔmpin mɔtalman. Wi nɔ fɔ tan lɛkɛ Ken we bin kil in brɔda; Ken bin blant [de fɔ] Setan.”—Jɔn In Fɔs Lɛta 3:​10-12; 4:​20, 21.

 ¹⁰ We wi nɔ kil pɔsin, nɔ min se wi rili lɛk am. So, fɔ sho se tru Kristian dɛn rili lɛk dɛn kɔmpin, dɛn de yuz dɛn tɛm, dɛn trɛnk, ɛn ɛnitin we dɛn gɛt, fɔ ɛp ɛn ɛnkɔrej dɛn kɔmpin dɛn. (Di Ibru Pipul Dɛn 10:​24, 25) Dɛn kin ɛp dɛn kɔmpin dɛn we dɛn gɛt prɔblɛm, ɛn dɛn nɔ de tif ɛn lay to dɛn kɔmpin dɛn. Dɛn de “du gud to ɔlman” jɔs lɛk aw di Baybul se.—Lɛta Fɔ Galeshya 6:​10.

11. Wetin mek i impɔtant fɔ biliv se na Jizɔs Krays Gɔd de yuz fɔ sev wi?

¹¹ Tru Kristian dɛn biliv se na Jizɔs Krays Gɔd de yuz fɔ sev wi. Di Baybul se: “Nɔbɔdi nɔ de na [di] wɔl we ebul sev pɔsin; na Jizɔs nɔmɔ ebul sev pɔsin.” (Di Apɔsul Dɛn Wok [Akt] 4:​12) Wi bin lan na Chapta 5 se Jizɔs bin kam gi in layf fɔ sev pipul dɛn we de obe Gɔd. (Matyu 20:​28) Pantap dat, na Jizɔs Gɔd bin dɔn pik fɔ bi Kiŋ fɔ rul di wɔl. Ɛn Gɔd se if wi want fɔ gɛt layf we go de sote go, wi fɔ obe Jizɔs ɛn du di tin dɛn we i tich. Na dat mek di Baybul se: “Ɛnibɔdi we biliv pan Gɔd in Pikin go gɛt layf we go de sote go; bɔt ɛnibɔdi we nɔ du wetin Gɔd in Pikin se, nɔ go gɛt di tru layf we [go] de sote go.”—Jɔn 3:​36.

12. Uskayn tin dɛn Gɔd in pipul dɛn nɔ de put an pan?

¹² Di wan dɛn we de wɔship Gɔd di rayt we nɔ de put an pan bɔku tin we pipul dɛn de du. We wan bigman we nem Paylet bin de aks Jizɔs kwɛstyɔn, Jizɔs bin se: “Mi nɔto Kiŋ na dis wɔl.” (Jɔn 18:​36) Ɛnisay we yu go na di wɔl, di wan dɛn we de fala Jizɔs de sho se dɛn de fɔ Gɔd in Kiŋdɔm ɛn dɛn nɔ de put an pan pɔlitiks. Dɛn nɔ de put dɛn an pan ɛni kɔnfyushɔn we de apin na di kɔntri. Ɛn dɛn nɔ de put dɛn mɔt pan ɛnitin we ɔda pɔsin se i de du, lɛk fɔ jɔyn ɛni pati, ɔ fɔ mek pipul dɛn vot fɔ am, ɔ fɔ vot fɔ ɔda pɔsin. Bɔt pan ɔl we Gɔd in pipul dɛn nɔ de put dɛn an pan pɔlitiks, dɛn de rɛspɛkt  di lɔ na dɛn kɔntri. Wetin mek dɛn de du dat? Na bikɔs Gɔd in Wɔd tɛl dɛn se dɛn fɔ ‘du wetin dɛn wan we de rul na di kɔntri tɛl dɛn fɔ du.’ (Lɛta Fɔ Rom 13:​1) Bɔt we di gɔvmɛnt tɔk sɔntin we nɔ gri wit wetin Gɔd se, di wan dɛn we de wɔship Gɔd di rayt we kin falamakata di apɔsul dɛn we bin se: “Wi fɔ du wetin Gɔd tɛl wi fɔ du, wi nɔ gɛt fɔ du wetin mɔtalman tɛl wi fɔ du.”—Di Apɔsul Dɛn Wok [Akt] 5:​29; Mak 12:​17.

13. Wetin di wan dɛn we de fala Jizɔs de tɔk se Gɔd in Kiŋdɔm go du? Wetin dis de mek dɛn du?

 ¹³ Di wan dɛn we de fala Jizɔs de prich se na Gɔd in Kiŋdɔm nɔmɔ go sɔlv mɔtalman prɔblɛm. Jizɔs bin se: “Pipul go tɛl ɔlman na [di] wɔl di Gud Nyuz bɔt wɛn Gɔd go rul di wɔl, so dat ɔlman go gɛt di chans fɔ yɛri ɛn biliv di Gud Nyuz; na da tɛm de di wɔl go dɔn.” (Matyu 24:​14) Di wan dɛn we de fala Jizɔs Krays, nɔ de tɛl pipul dɛn fɔ abop se mɔtalman gɔvmɛnt go sɔlv dɛn prɔblɛm. Bifo dat, dɛn de tɛl pipul dɛn se na Gɔd in Kiŋdɔm nɔmɔ go ebul sɔlv mɔtalman prɔblɛm. (Sam 146:​3) Jizɔs bin tich wi fɔ pre fɔ da gɔvmɛnt de. I bin se: “Mek yu rul wi; mek wetin yu want, bi na dis wɔl, lɛkɛ aw i de bi na ɛvin.” (Matyu 6:​10) Gɔd in Wɔd bin se dis Kiŋdɔm “go brok ɔl dɛn kiŋdɔm we bin dɔn de bifo am pyɛt pyɛt, ɛn dɔn dɛn kpatakpata wan; in go tinap sote go.”—Daniɛl 2:​44; Rɛvɛleshɔn 16:​14; 19:​19-21.

14. Us rilijɔn yu tink se de du wetin tru rilijɔn fɔ du?

¹⁴ Frɔm ɔl wetin wi dɔn tɔk, us rilijɔn de pul ɔl wetin i de tich na di Baybul ɛn de tɛl pipul dɛn bɔt Gɔd in nem? Us rilijɔn de lɛk dɛn kɔmpin dɛn lɛk aw Gɔd se, de sho se dɛn biliv pan Jizɔs, dɛn nɔ de put dɛn an pan pɔlitiks, ɛn de tɔk se na Gɔd in Kiŋdɔm nɔmɔ go ebul sɔlv mɔtalman prɔblɛm? Pan ɔl di rilijɔn dɛn na di wɔl, uswan de du ɔl dɛn tin ya? Na Jiova Witnɛs dɛn nɔmɔ de du ɔl dɛn tin ya.—Rid Ayzaya 43:​10-12.

15. Apat frɔm di biliv we wi biliv se Gɔd de, wetin bak Gɔd want lɛ wi du?

¹⁵ Fɔ biliv se Gɔd de, nɔto in nɔmɔ go mek Gɔd gladi fɔ wi, bikɔs di Baybul se dɛn dɛbul dɛnsɛf biliv se Gɔd de. (Jems 2:​19) Bɔt wi no se dɛn nɔ de du wetin Gɔd want ɛn Gɔd nɔ gladi fɔ dɛn. Fɔ lɛ Gɔd gladi fɔ wi, wi nɔ fɔ jɔs biliv  se i de, bɔt wi fɔ du wetin i want. Dɔn wi fɔ kɔmɔt insay lay lay rilijɔn ɛn bigin wɔship Gɔd di rayt we.

16. Wetin pɔsin fɔ du if in an de pan lay lay rilijɔn?

¹⁶ Di apɔsul Pɔl bin tɛl wi se wi nɔ fɔ put wi an pan lay lay rilijɔn. I bin se: “Di Masta se, ‘Una fɔ lɛf dɛn bad pipul ya, ɛn nɔ gɛt ɛnitin fɔ du wit dɛn. Una nɔ fɔ gɛt natin fɔ du wit ɛnitin we nɔ klin. If una yɛri mi wɔd, a go tek una lɛkɛ mi yon.’” (Sɛkɛn Lɛta Fɔ Kɔrint 6:​17) So, tru Kristian dɛn fɔ pul dɛn an pan ɛnitin we de na lay lay rilijɔn.

17, 18. Wetin na “Babilɔn we ɔlman no”? Wetin mek pɔsin fɔ “mekes kɔmɔt” insay de?

¹⁷ Di Baybul se ɔl di lay lay rilijɔn dɛn de insay “Babilɔn we ɔlman no [“Babilɔn di gret,” NW].” * (Rɛvɛleshɔn 17:​5) Babilɔn na di nem we dɛn bin de kɔl wan tɔŋ we bin de trade. Na de lay lay rilijɔn bigin afta di Ebi Ren bin kam insay Noa in tɛm. Bɔku pan di tin dɛn we lay lay rilijɔn de tich ɛn du tide, kɔmɔt na Babilɔn. Fɔ ɛgzampul, di pipul dɛn na Babilɔn bin de wɔship tri gɔd dɛn we dɛn se na wan pɔsin. Tide, bɔku rilijɔn dɛn biliv pan di Triniti. Bɔt di Baybul tɛl wi klia wan se na wangren tru Gɔd de, we na Jiova, ɛn Jizɔs Krays na in Pikin. (Jɔn 17:​3) Di pipul dɛn na Babilɔn bin biliv bak se sɔntin de insay pɔsin we nɔ de day we di pɔsin dɔn day, ɛn da tin de kin go sɔfa na ɛl faya. Tide, bɔku rilijɔn dɛn de tich se mɔtalman gɛt sol we nɔ de day ɛn we kin go sɔfa na ɛl.

¹⁸ Di we aw di pipul dɛn na Babilɔn bin de wɔship bin prɛd ɔlsay na di wɔl. So, di Babilɔn we ɔlman no tide, na ɔl di lay lay rilijɔn dɛn na di wɔl. Gɔd dɔn tɔk se i de kam pul ɔl di lay lay rilijɔn dɛn na di wɔl. So yu si wetin mek i fayn fɔ pul yu an pan lay lay rilijɔn? Jiova Gɔd want mek yu “mekes kɔmɔt” de naw we tɛm de fɔ du dat.—Rid Rɛvɛleshɔn 18:​4, 8.

19. Wetin yu go ɛnjɔy we yu wɔship Jiova?

 ¹⁹ We yu disayd fɔ pul yu an pan lay lay rilijɔn, sɔm pipul dɛn go lɛf fɔ kip kɔmpin wit yu. Bɔt we yu jɔyn Jiova in pipul dɛn fɔ wɔship am, di tin dɛn we yu go ɛnjɔy go bɔku pas di wan dɛn we yu go lɛf. Yu go gɛt bɔku brɔda ɛn sista dɛn jɔs lɛk Jizɔs in disaypul dɛn we bin lɛf ɔda tin dɛn fɔ fala Jizɔs. Yu go jɔyn wan big famili we gɛt plɛnti pipul dɛn ɔlsay na di wɔl we de wɔship Gɔd di we aw i want, ɛn we de sho se dɛn rili lɛk yu. Ɛn yu go gɛt op fɔ gɛt layf we go de sote go “na di wɔl we gɛt fɔ kam.” (Rid Mak 10:​28-30.) Sɔntɛm, di wan dɛn we bin lɛf fɔ kip kɔmpin wit yu, dɛnsɛf go bigin fɔ lan wetin di Baybul se ɛn kam sav Jiova.

20. Wetin Gɔd go du fɔ di wan dɛn we de wɔship am di rayt we?

²⁰ Di Baybul se i nɔ go te igen, Gɔd de kam pul ɔl di bad bad tin dɛn we de apin na di wɔl. Ɛn i go kam wit nyu wɔl usay ɔlman go de du wetin rayt, ɛn na in Kiŋdɔm go rul di wɔl da tɛm de. (Pita In Sɛkɛn Lɛta 3:​9, 13) Di wɔl go rili fayn da tɛm de! Ɛn na tru rilijɔn nɔmɔ go de insay da wɔl de. Yu nɔ fil se i fayn fɔ lɛ yu jɔyn di wan dɛn we de wɔship Gɔd di rayt we?