1. Wetin mek wi fɔ lan bɔt enjɛl dɛn?

FƆ LƐ wi no pɔsin gud gud wan, wi fɔ no sɔntin bɔt in famili. Semweso, fɔ lɛ wi no bɔt Jiova, i fayn fɔ lɛ wi no di enjɛl dɛn we tan lɛk in fambul dɛn. Di Baybul se di enjɛl dɛn na “Gɔd in pikin dɛn.” (Job 38:​7, NW) So, wetin di enjɛl dɛn kin du fɔ mek wetin Gɔd want, bi? Dɛn bin dɔn du ɛnitin fɔ mɔtalman? Enjɛl dɛn de du ɛnitin fɔ wi? If dɛn de du sɔntin fɔ wi, aw dɛn de du am?

2. Udat mek di enjɛl dɛn? Ɔmɔs enjɛl dɛn de?

² Di Baybul tɔk bɔt enjɛl dɛn bɔku bɔku tɛm. Lɛ wi tɔk bɔt sɔm say dɛn na di Baybul we dɛn tɔk bɔt enjɛl dɛn. Udat mek di enjɛl dɛn? Lɛta Fɔ Kɔlɔse 1:​16 se: “Tru Krays, Gɔd mek ɔl wetin de na ɛvin ɛn dis wɔl.” So Jiova Gɔd yuz in wangren Pikin we na Jizɔs, fɔ mek ɔl di enjɛl dɛn. Ɔmɔs enjɛl dɛn de? Di Baybul se dɛn bɔku ɛn dɛn gɛt pawa.—Sɛkɛn Lɛta Fɔ Tɛsalonayka 1:​7. *

3. Wetin Job 38:​4-7 tɛl wi bɔt enjɛl dɛn?

³ Di Baybul se we Gɔd bin mek di wɔl, ɔl di enjɛl dɛn “bigin prez Gɔd lawd wan.” (Job 38:​4-7, NW) Di enjɛl dɛn bin dɔn de lɔntɛm bifo Gɔd mek mɔtalman, ɛn ivin  bifo Gɔd mek di wɔl. Dis skripchɔ ɛp wi fɔ no bak se enjɛl dɛn gɛt filin, bikɔs i se dɛn bin “gladi.” I ɛp wi bak fɔ no se “ɔl Gɔd in pikin dɛn” bin de gladi togɛda. Da tɛm de, ɔl di enjɛl dɛn bin de lɛk wan famili ɛn dɛn bin de sav Jiova Gɔd togɛda.

4. Aw di Baybul sho se enjɛl dɛn bisin bɔt mɔtalman?

⁴ Di enjɛl dɛn bigin bisin bɔt mɔtalman frɔm we dɛn si we Gɔd mek di fɔs man ɛn uman. Ɛn dɛn want fɔ no aw wetin Gɔd want, go apin. (Prɔvabs 8:​30, 31; Pita In Fɔs Lɛta 1:​11, 12) Bɔt as tɛm de go, di enjɛl dɛn si we plɛnti pipul dɛn lɛf fɔ wɔship Gɔd. Dis rili mek di enjɛl dɛn at pwɛl. Bɔt “Gɔd in enjɛl dɛn [kin] gladi” we wan pɔsin we de du bad, lɛf fɔ du bad. (Lyuk 15:​10) Di enjɛl dɛn rili kia bɔt di wan dɛn we de sav Gɔd. Na dat mek Jiova dɔn de yuz dɛn plɛnti tɛm fɔ ɛp di wan dɛn we de wɔship am. (Rid Di Ibru Pipul Dɛn 1:​7, 14.) Lɛ wi tɔk bɔt sɔm pipul dɛn we Jiova bin mek in enjɛl dɛn ɛp.

5. Us pipul dɛn enjɛl dɛn bin dɔn ɛp?

⁵ Tu enjɛl dɛn bin ɛp wan gud man we nem Lɔt ɛn in tu gyal pikin dɛn di tɛm we Gɔd bin pwɛl Sɔdɔm ɛn Gomɔra. Di enjɛl dɛn ol dɛn an dɛn, ɛn pul dɛn kɔmɔt na di tɔŋ. (Jɛnɛsis 19:​15, 16) Wan ɔda tɛm, sɔm man dɛn we nɔ bin lɛk wan prɔfɛt we nem Daniɛl, bin mek dɛn put am na wan ol usay layɔn dɛn de. Bɔt di layɔn dɛn nɔ du am natin. Daniɛl se: “Mi PAPA GƆD sɛn in eŋɛl kam lɔk di layɔn dɛn mɔt.” (Daniɛl 6:​22) Di tɛm we di apɔsul dɛn bin de, wan enjɛl fri apɔsul Pita we dɛn put am na jel. (Di Apɔsul Dɛn Wok [Akt] 12:​6-11) Dɔn, enjɛl dɛn bin kam ɛp Jizɔs we i bin bigin fɔ prich. (Mak 1:​13) Ɛn bifo dɛn kam ol Jizɔs fɔ go kil am,  wan enjɛl bin kam “kɔrej am.” (Lyuk 22:​43) Dis go mɔs dɔn ɛp Jizɔs fɔ bia ɛnitin we go mit am.

6. (a) Aw di enjɛl dɛn de ɛp Gɔd in pipul dɛn tide? (b) Us kwɛstyɔn dɛn wi de kam tɔk bɔt?

⁶ Tide, Gɔd in pipul dɛn nɔ de si enjɛl dɛn igen. Bɔt pan ɔl dat, enjɛl dɛn stil de ɛp wi fɔ lɛ natin nɔ mek wi lɛf fɔ wɔship Gɔd. Di Baybul se Jiova ‘in enjɛl de rawnd udat rɛspɛkt am ɛn dɛn wan we de fred am. I de pul dɛn pan trɔbul.’ (Sam 34:​7) Dɛn wɔd ya de kɔrej wi bikɔs wikɛd enjɛl dɛn de we want fɔ du wi bad. Udat na dɛn wikɛd enjɛl ya? Usay dɛn kɔmɔt? Aw dɛn de tray fɔ du wi bad? Fɔ no di ansa, lɛ wi tɔk bɔt wetin bin apin we Gɔd mek Adam ɛn Iv.

7. Ɔmɔs pipul dɛn Setan dɔn mek dɛn tɔn dɛn bak pan Gɔd?

⁷ Wi bin dɔn lan na Chapta 3 se, wan enjɛl bin tink se i fɔ bigin rul pipul dɛn. So i tɔn agens Gɔd. Leta, dis enjɛl mek insɛf bi Setan. (Rɛvɛleshɔn 12:​9) Frɔm di tɛm we Setan lay to Adam ɛn Iv te afta lɛk 1,600 ia so, Setan bin dɔn mek plɛnti pipul dɛn tɔn dɛn bak pan Gɔd. Bɔt sɔm pipul dɛn bin de we bin fetful to Gɔd. Sɔm pan dɛn na Ebɛl, Inɔk, ɛn Noa.—Di Ibru Pipul Dɛn 11:​4, 5, 7.

8. (a) Aw sɔm enjɛl dɛn bi dɛbul? (b) Wetin di dɛbul dɛn bin du fɔ mek dɛn nɔ day we di Ebi Ren bin kam?

⁸ Insay Noa in tɛm, ɔda enjɛl dɛn bin tɔn dɛn bak pan Jiova. Dɛn kɔmɔt na ɛvin, kam na di wɔl, ɛn tɔn to mɔtalman. Wetin mek dɛn du dat? Jɛnɛsis 6:​2 se: “Sɔm pan PAPA GƆD in pikin dɛn . . . bin si se dɛn gyal pikin ya so fayn, so dɛn fɔl fɔ dɛn ɛn bigin mared dɛn.” Bɔt Jiova nɔ bin alaw di bad we dɛn enjɛl ya ɛn di mɔtalman dɛn bin de du, fɔ kɔntinyu. I mek ebi ebi ren kam ɔlsay na di wɔl. Jiova yuz di ren fɔ pul ɔl di bad  pipul dɛn, bɔt i sev di gud wan dɛn. (Jɛnɛsis 7:​17) So di bad enjɛl dɛn ɔ dɛbul dɛn lɛf dɛn mɔtalman bɔdi ɛn go bak na ɛvin as spirit. Dɛn bin dɔn jɔyn Setan fɔ tɔn agens Gɔd. So Setan bi “di dɛbul dɛn edman.”—Matyu 9:​34.

9. (a) Wetin apin to di dɛbul dɛn we dɛn go bak na ɛvin? (b) Wetin wi de kam tɔk bɔt di dɛbul dɛn?

⁹ We dɛn bad enjɛl ya go bak na ɛvin, Gɔd nɔ gri fɔ mek dɛn jɔyn in ɛn di ɔda enjɛl dɛn. Na di sem tin i du to dɛn edman we na Setan. (Pita In Sɛkɔn Lɛta 2:​4, NW)  Di dɛbul dɛn nɔ ebul fɔ tɔn to mɔtalman igen, bɔt dɛn stil de mek mɔtalman du bad tin dɛn. Dɛn de ɛp Setan fɔ “mek di ol wɔl ful.” (Rɛvɛleshɔn 12:​9; Jɔn In Fɔs Lɛta 5:​19) Aw dɛn de du dat? Dɛn de yuz difrɛn we dɛn fɔ ful pipul dɛn. (Rid Sɛkɛn Lɛta Fɔ Kɔrint 2:​11.) Lɛ wi tɔk bɔt sɔm pan di we dɛn we dɛn de yuz fɔ ful pipul dɛn.

10. Wetin na sɔm bad tin dɛn we di dɛbul dɛn kin mek pipul dɛn put dɛn an pan?

¹⁰ Sɔm pan di tin dɛn we di dɛbul dɛn de yuz fɔ ful pipul dɛn na juju, wich, lukin-grɔn, majik, ɛn fɔ tɔk to di wan dɛn we dɔn day. So ɛnibɔdi we de put in an pan dɛn tin ya de sho se i want fɔ gɛt biznɛs wit di dɛbul dɛn. Sɔm pipul dɛn kin go to di dɛbul dɛn fɔ dɛnsɛf so dat dɛn go ɛp dɛn. Ɛn ɔda wan dɛn kin go to jujuman fɔ lɛ i yuz di dɛbul dɛn pawa fɔ du sɔntin fɔ dɛn. Di Baybul se i bad fɔ mek wi put an pan dɛn bad bad tin ya, ɛn i se wi fɔ pul an pan dɛn. (Lɛta Fɔ Galeshya 5:​19-21) Jɔs lɛk aw fishaman kin yuz bet fɔ kech fish, na so di dɛbul dɛn de yuz juju biznɛs ɛn ɔda tin dɛn fɔ mek pipul dɛn go to dɛn. Fishaman dɛn kin yuz difrɛn difrɛn bet dɛn. Semweso, di dɛbul dɛn gɛt difrɛn difrɛn we dɛn fɔ mek pipul dɛn de ɔnda dɛn.

11. Wetin na lukin-grɔn? Wetin mek wi nɔ fɔ put an pan am?

¹¹ Wan pan di bet dɛn we di dɛbul dɛn de yuz na lukin-grɔn. Wetin na lukin-grɔn? Na we pipul dɛn kin tray fɔ no bɔt sɔntin we go apin tumara bambay ɔ bɔt tin we dɛn nɔ no. Sɔm we dɛn aw pipul dɛn kin du dis na we dɛn kin go to lukin-grɔn man fɔ tray fɔ no bɔt di wan dɛn we dɔn day, ɔ we dɛn kin tɛl dɛn bɔt di layn dɛn we de na dɛn an, ɔ we dɛn kin want fɔ no bɔt di drim we dɛn drim. Pan ɔl we bɔku pipul dɛn  tink se lukin-grɔn nɔto bad tin, di Baybul dɔn sho wi se lukin-grɔn man dɛn ɛn di dɛbul dɛn de wok togɛda. Fɔ ɛgzampul, Di Apɔsul Dɛn Wok [Akt] 16:​16-18 tɔk bɔt wan titi we “bin gɛt dɛbul we bin de mek i ebul tɛl pipul wetin go bi.” Bɔt we dɛn pul di dɛbul pan am, i nɔ bin ebul fɔ tɔk wetin go apin igen.

12. Wetin mek i bad fɔ tray fɔ tɔk to dayman?

¹² Wan ɔda we aw di dɛbul dɛn de ful pipul dɛn na we dɛn de mek pipul dɛn de tray fɔ no bɔt dɛn fambul ɛn padi dɛn we dɔn day. Di dɛbul dɛn de mek pipul dɛn we dɛn fambul ɔ padi dɔn day, biliv ɛnitin we dɛn tɛl dɛn bɔt di pɔsin we dɔn day. Lukin-grɔn man dɛn kin tɔk sɔntin bɔt di pɔsin we dɔn day ɔ dɛn kin mek dɛn vɔys lɛk di dayman. Dat dɔn mek bɔku pipul dɛn biliv se dayman dɛn de liv ɔdasay. Ɛn i dɔn mek dɛn biliv bak se we dɛn tray fɔ no bɔt dɛn fambul ɔ padi we dɔn day, go ɛp dɛn fɔ bia. Bɔt dat nɔto tru ɛn i bad. Wetin  mek? Na bikɔs di dɛbul dɛn ebul fɔ mek dɛn vɔys lɛk di pɔsin we dɔn day ɛn tɛl di lukin-grɔn man bɔt di pɔsin. (Fɔs Samiɛl 28:​3-19) Bɔt wi bin lan na Chapta 6 se di wan dɛn we dɔn day nɔ gɛt layf igen. (Sam 115:​17) So ɛnibɔdi we de tray fɔ tɔk to dayman, dɔn alaw di dɛbul dɛn fɔ ful am ɛn i de du tin we Gɔd nɔ want. (Rid Ditarɔnɔmi 18:​10, 11; Ayzaya 8:​19) So, wi fɔ tray tranga wan mek wi nɔ alaw di dɛbul dɛn fɔ yuz dɛn bet ya fɔ ful wi.

13. Wetin bɔku pipul dɛn we bin de fred di dɛbul dɛn, dɔn du?

¹³ Di dɛbul dɛn nɔ jɔs de ful pipul dɛn, bɔt dɛn de mek pipul dɛn fred. Tide, Setan ɛn in dɛbul dɛn no se “na smɔl tɛm nɔmɔ lɛf” bifo Jiova go kam pul dɛn na di wɔl. So, dɛn dɔn vɛks mɔ pas aw dɛn bin vɛks. (Rɛvɛleshɔn 12:​12, 17) Bɔt pan ɔl dat, bɔku pipul dɛn we bin de fred di dɛbul dɛn, dɔn lɛf fɔ fred dɛn. Aw dɛn ebul du dat? Wetin pɔsin fɔ du if in an de pan juju biznɛs?

14. Aw wi go pul an pan juju biznɛs?

¹⁴ Di Baybul tɛl wi bɔt aw wi go mek di dɛbul dɛn nɔ ebul wi ɛn aw wi fɔ pul an pan dɛn biznɛs. Lɛ wi tɔk smɔl bɔt di Kristian dɛn we bin de na Ɛfisɔs di tɛm we di apɔsul dɛn bin de. Sɔm pan dɛn bin de pan juju biznɛs ɛn majik bifo dɛn bi Kristian. We dɛn want fɔ pul an pan juju biznɛs ɛn majik, yu no wetin dɛn du? Di Baybul se: “Plɛnti pan dɛn pipul we bin de ple majik briŋ dɛn majik buk wan ples ɛn bɔn dɛn mek ɔlman si.” (Di Apɔsul Dɛn Wok [Akt] 19:​19) Dis tin we dɛn du sho di wan dɛn we want fɔ pul dɛn an pan juju biznɛs, wetin fɔ du. Ɛnibɔdi we want fɔ sav Jiova fɔ bɔn ɔ trowe ɔl di juju tin dɛn we i gɛt. Sɔm pan dɛn tin ya na buk, fim,  posta, ɛn myuzik. Sɔm ɔda tin dɛn na sɛbɛ ɔ ɛni ɔda tin we pɔsin go put na in bɔdi fɔ mek bad nɔ mit am.—Fɔs Lɛta Fɔ Kɔrint 10:​21.

15. Wetin wi fɔ du fɔ mek di dɛbul dɛn nɔ ebul wi?

¹⁵ Afta sɔm tɛm we di Kristian dɛn na Ɛfisɔs bin bɔn dɛn majikbuk dɛn, di apɔsul Pɔl bin rayt to dɛn se: “Wi de fɛt . . . di wikɛd spirit dɛn.” (Lɛta Fɔ Ɛfisɔs 6:​12, NW) Di dɛbul dɛn nɔ bin stɔp. Dɛn bin stil de tray fɔ mɔna di Kristian dɛn na Ɛfisɔs. So, wetin na di ɔda tin we dɛn Kristian ya fɔ du fɔ mek di dɛbul dɛn nɔ ebul dɛn? Pɔl tɛl dɛn se: “Pantap ɔl dɛn tin ya, una shild na fɔ biliv pan di Masta. Dis shild ya go mek dɛn ɔt aro we Setan de shut, nɔ du una natin.” (Lɛta Fɔ Ɛfisɔs 6:​16) Di mɔ we wi biliv Gɔd, na di mɔ dɛn dɛbul ya nɔ go ebul wi.—Matyu 17:​20.

16. Wetin go mek wi biliv Gɔd mɔ?

¹⁶ Aw wi go ebul biliv Gɔd mɔ? Wi go ebul biliv Gɔd mɔ we wi stɔdi di Baybul. Fɔ lɛ fɛns strɔng, in fawndeshɔn fɔ strɔng. Semweso, wi go biliv Gɔd mɔ we wi stɔdi in Wɔd we na di Baybul. We wi rid ɛn stɔdi di Baybul ɛvride, wi go ebul biliv Gɔd mɔ. Fɛns we strɔng kin mek bad pɔsin nɔ ebul kam insay di kɔmpawnd. Semweso, we wi biliv Gɔd mɔ go mek di dɛbul dɛn nɔ ebul wi.—Jɔn In Fɔs Lɛta 5:​5.

17. Us ɔda tin we wi fɔ du we go mek di dɛbul dɛn nɔ ebul wi?

¹⁷ Di Kristian dɛn na Ɛfisɔs bin fɔ du ɔda tin fɔ mek di dɛbul dɛn nɔ ebul dɛn. Dɛn fɔ du dis ɔda tin bikɔs Ɛfisɔs na tɔŋ we juju biznɛs bin pasmak. So Pɔl tɛl dɛn se: “Una fɔ pre ɔltɛm . . . bay aw Gɔd in Spirit de tɛl una.” (Lɛta Fɔ Ɛfisɔs 6:​18) Bikɔs juju biznɛs dɔn pasmak na di wɔl tide, wisɛf fɔ de pre to Jiova ɔltɛm fɔ mek i ɛp wi so dat di dɛbul dɛn nɔ go ebul wi. Wi fɔ yuz Jiova in nem we wi de pre. (Rid Prɔvabs 18:​10, NW.) Wi fɔ pre  lɛ Gɔd “nɔ mek Setan ebul wi.” (Matyu 6:​13) Jiova go ansa dɛn kayn prea ya.—Sam 145:​19.

18, 19. (a) Wetin go mek wi win di fɛt we wi de fɛt di dɛbul dɛn? (b) Us kwɛstyɔn wi go tɔk bɔt na di ɔda chapta?

¹⁸ Na tru se di dɛbul dɛn bad, bɔt wi nɔ go fred dɛn if wi de tɔn wi bak pan Setan ɛn go nia Gɔd. Fɔ go nia Gɔd min se wi fɔ du wetin i want. (Rid Jems 4:​7, 8.) Nɔto ɔltin di dɛbul dɛn gɛt pawa fɔ du. Gɔd bin pɔnish dɛn trade we Noa bin de, ɛn i go jɔj dɛn tumara bambay. (Jud In Lɛta 6) Mɛmba se Jiova in enjɛl dɛn de fɔ ɛp wi. (Sɛkɛn Kiŋ 6:​15-17) Dɛn enjɛl ya rɛdi fɔ ɛp wi fɔ tɔn wi bak pan dɛn wikɛd dɛbul dɛn. Dɛn de ɛnkɔrej wi fɔ kɔntinyu fɔ du dat. So lɛ wi de nia Jiova ɛn in enjɛl dɛn. Lɛ wi nɔ put wi an pan ɛnitin we gɛt juju biznɛs, bɔt wi fɔ du wetin di Baybul se ɔltɛm. (Pita In Fɔs Lɛta 5:​6, 7; Pita In Sɛkɛn Lɛta 2:​9) Dis go ɛp wi fɔ win di fɛt we wi de fɛt di wikɛd spirit dɛn.

¹⁹ Bɔt wetin mek Gɔd dɔn alaw di dɛbul dɛn ɛn tin dɛn we de mek pipul dɛn sɔfa, fɔ de te naw? Na da kwɛstyɔn de wi go tɔk bɔt na di ɔda chapta.