1. Wetin mek wan Itiopian bigman bin tɔk se i want fɔ baptayz?

DI TƐM trade we di apɔsul dɛn bin de, wan Itiopian bigman bin aks se: “Luk wata na ya, wetin mek yu nɔ go baptayz mi?” Wan Kristian we nem Filip bin jɔs dɔn ɛksplen to am se na Jizɔs na di Mɛsaya we Gɔd  bin dɔn se go kam. Di man bin lɛk wetin i dɔn lan na Gɔd in Wɔd, so i du sɔntin fɔ sho se i rili lɛk wetin i lan. I sho se i want fɔ baptayz.—Di Apɔsul Dɛn Wok [Akt] 8:​26-36.

2. Wetin mek yu fɔ baptayz?

² If yu dɔn tek tɛm fɔ stɔdi di fɔs fɔs chapta dɛn na dis buk wit Jiova Witnɛs dɛn, sɔntɛm bay naw yu go de aks yusɛf se, ‘Wetin de stɔp mi mek a nɔ baptayz?’ Yu dɔn lan bɔt di prɔmis na di Baybul we se pipul dɛn go gɛt layf we go de sote go na Paradays. (Lyuk 23:​43, NW; Rɛvɛleshɔn 21:​3, 4) Yu dɔn lan bak bɔt wetin rili de apin to di wan dɛn we dɔn day, ɛn bɔt di tɛm we di Baybul se di wan dɛn we dɔn day, go gɛt layf bak. (Ɛkliziastis 9:​5; Jɔn 5:​28, 29) Sɔntɛm yu dɔn de go na Jiova Witnɛs dɛn mitin dɛn, ɛn yu dɔn si fɔ yusɛf se na dɛn de wɔship Gɔd di rayt we. (Jɔn 13:​35) Bɔt di tin we impɔtant pas ɔl na dat, yu ɛn Jiova Gɔd dɔn bigin fɔ bi tayt tayt padi.

3. (a) Wetin Jizɔs bin tɛl in disaypul dɛn? (b) Aw dɛn kin baptayz pɔsin?

³ Aw yu go sho se yu want fɔ sav Gɔd? Jizɔs bin tɛl in disaypul dɛn se: “Una go . . . ɛn mek di pipul dɛn bi mi lanin bɔy dɛn; una baptayz dɛn.” (Na wi mek am italiks; Matyu 28:​19) Jizɔs insɛf bin baptayz. Na insay wata i bin baptayz. Nɔto sprinkul dɛn sprinkul wata pan am, ɔ tɔn wata na in ed. (Matyu 3:​16) We dɛn se “baptayz,” i min se fɔ put sɔntin “dip insay wata.” So fɔ baptayz pɔsin min fɔ put in wan ol bɔdi dip insay wata.

4. We pɔsin baptayz, wetin dat de sho?

⁴ If pɔsin want fɔ bi Jiova Gɔd in padi, i fɔ baptayz insay wata. We yu baptayz de sho ɔda pipul dɛn se yu want fɔ sav Gɔd. Ɛn i de sho se yu lɛk fɔ du wetin Jiova  want. (Sam 40:​7, 8) Bɔt tin dɛn de we pɔsin fɔ du we go sho se i fit fɔ baptayz.

5. (a) Wetin na di fɔs tin we pɔsin fɔ du we go mek i fit fɔ baptayz? (b) Wetin mek i impɔtant fɔ go mitin?

⁵ Yu dɔn bigin fɔ du di fɔs tin we go mek yu fit fɔ baptayz. Aw yu dɔn du dat? Na we yu de lan bɔt Jiova Gɔd ɛn Jizɔs Krays. Sɔntɛm yu gɛt pɔsin we kin kam stɔdi yu di Baybul ɔltɛm. (Rid Jɔn 17:​3.) Bɔt yu gɛt bɔku ɔda tin dɛn fɔ lan. Kristian dɛn fɔ “no wetin Gɔd want.” (Lɛta Fɔ Kɔlɔse 1:​9) Wan tin we go ɛp yu fɔ du dis, na fɔ de go Jiova Witnɛs dɛn mitin dɛn. I impɔtant fɔ go dɛn mitin ya ɔltɛm. (Di Ibru Pipul Dɛn 10:​24, 25) Dɛn mitin ya, go ɛp yu fɔ lan mɔ bɔt Gɔd.

6. Wetin yu fɔ sabi na di Baybul we go mek yu fit fɔ baptayz?

⁶ Nɔto pas yu no ɔltin na di Baybul bifo yu go fit fɔ baptayz. Nɔto ɔltin na di Baybul da Itiopian bigman bin sabi. Na pɔsin bin ɛksplen to am sɔm tin dɛn. (Di Apɔsul Dɛn Wok [Akt] 8:​30, 31) So yusɛf gɛt fɔ lan mɔ. Infakt, yu nɔ go ɛva lɛf fɔ lan bɔt Gɔd. (Ɛkliziastis 3:​11, NW) Bɔt bifo yu baptayz, yu fɔ lan ɛn biliv di men tin dɛn we di Baybul de tich. (Di Ibru Pipul Dɛn 5:​12) Sɔm pan dɛn tichin ya na wetin de apin to pɔsin we dɔn day, ɛn wetin mek Gɔd in nem ɛn in Kiŋdɔm impɔtant.

7. Wetin di stɔdi we yu de stɔdi di Baybul go mek yu du?

⁷ Nɔto fɔ lan nɔmɔ impɔtant, bikɔs “if pɔsin nɔ biliv Gɔd, i nɔ go ebul pliz am.” (Di Ibru Pipul Dɛn 11:​6) Di Baybul tɛl wi se we sɔm pipul dɛn we bin de na Kɔrint, yɛri di mɛsej we Jizɔs in disaypul dɛn bin de prich, ‘dɛn biliv ɛn baptayz.’ (Di Apɔsul Dɛn Wok [Akt] 18:​8) Semweso, di stɔdi we yu de stɔdi di Baybul go mek yu  biliv se di Baybul, na Gɔd in Wɔd. I go ɛp yu fɔ biliv Gɔd in prɔmis dɛn ɛn biliv bak se di day we Jizɔs kam day, go ebul mek wi gɛt layf we go de sote go.—Jɔshwa 23:​14; Di Apɔsul Dɛn Wok [Akt] 4:​12; Sɛkɛn Lɛta To Timoti 3:​16, 17.

8. Wetin go mek yu tɛl ɔda pipul dɛn bɔt di tin dɛn we yu dɔn lan?

⁸ Di mɔ yu de biliv di tin dɛn we yu de lan, na di mɔ yu nɔ go ebul fɔ kip dɛn to yusɛf. (Jɛrimaya 20:​9) Yu go fil lɛk se sɔntin de push yu fɔ tɛl ɔda pipul dɛn bɔt Gɔd ɛn bɔt di tin dɛn we i want fɔ du fɔ mɔtalman.—Rid Sɛkɛn Lɛta Fɔ Kɔrint 4:​13.

9, 10. (a) Udat yu go bigin fɔ tɔk to bɔt di tru tin dɛn we de na di Baybul? (b) Wetin yu fɔ du if yu want fɔ jɔyn Jiova Witnɛs dɛn fɔ prich?

⁹ Yu kin bigin fɔ tɛl ɔda pipul dɛn bɔt di tru tin dɛn we de na di Baybul. Yu kin du dis we yu tek tɛm tɔk to yu fambul dɛn, padi dɛn, neba dɛn, ɛn di wan dɛn we yu de wok wit. Leta, yu go want fɔ jɔyn Jiova Witnɛs dɛn fɔ prich. We yu rɛdi, tɛl di pɔsin we de stɔdi yu di Baybul. If i si se yu rili rɛdi, yu ɛn in go mit wit tu ɛlda dɛn na di kɔngrigeshɔn.

¹⁰ Dis go mek yu ebul no sɔm pan di ɛlda dɛn we de kia fɔ Gɔd in pipul dɛn. (Di Apɔsul Dɛn Wok [Akt] 20:​28; Pita In Fɔs Lɛta 5:​2, 3) If dɛn ɛlda ya si se yu sabi ɛn biliv di men tin dɛn we di Baybul de tich, ɛn yu de liv yu layf di we aw Gɔd want, ɛn yu rili want fɔ bi Jiova Witnɛs, dɛn go mek yu no se yu dɔn fit fɔ prich wit Jiova Witnɛs dɛn.

11. Bifo pɔsin bigin fɔ prich, wetin na di tin dɛn we i fɔ lɛf fɔ du?

¹¹ Bɔt sɔntɛnde di ɛlda dɛn go si se di pɔsin gɛt fɔ chenj di we aw i de liv in layf ɛn lɛf di bad abit dɛn we  i gɛt so dat i go bigin prich. Sɔm pan dɛn bad abit ya kin bi tin dɛn we nɔbɔdi nɔ bin no se i de du. So bifo yu se yu want fɔ bi ɔnbaptayz pɔblisha, yu fɔ dɔn lɛf ɛni siriɔs sin we yu bin de pan, lɛk fɔ du mami ɛn dadi biznɛs we yu nɔ mared yet, fɔ chak, ɔ fɔ tek drɔgs.—Rid Fɔs Lɛta Fɔ Kɔrint 6:​9, 10; Lɛta Fɔ Galeshya 5:​19-21.

12. Wetin mek i fayn fɔ ripɛnt?

¹² Sɔm tin dɛn de we yu fɔ du bifo yu go fit fɔ baptayz. Di apɔsul Pita bin tɔk se: “Una ripɛnt ɛn lɛf fɔ du bad, so dat Gɔd go wep una sin dɛn.” (Di Apɔsul Dɛn Wok [Akt] 3:​19, NW) Fɔ ripɛnt min fɔ rili fil bad fɔ ɛni bad tin we yu dɔn du. Pɔsin we bin de liv bad layf nid fɔ ripɛnt, bɔt ivin pɔsin we nɔ bin de liv da kayn layf de, insɛf nid fɔ ripɛnt. Wetin mek? Bikɔs ɔlman dɔn sin ɛn nid fɔ mek Gɔd fɔgiv dɛn. (Lɛta Fɔ Rom 3:​23; 5:​12) Bifo yu bigin fɔ stɔdi di Baybul, yu nɔ bin no wetin Gɔd want. So, yu nɔ bin de liv yu layf di we aw Gɔd want. Na dis mek i fayn fɔ ripɛnt.

13. Wetin i min fɔ chenj?

¹³ Afta pɔsin dɔn ripɛnt, i fɔ chenj ɔ “lɛf fɔ du bad.” Yu nɔ fɔ jɔs fil bad fɔ di bad tin dɛn we yu bin de du. Bɔt yu fɔ lɛf fɔ du dɛn tin dɛn de. Dɔn yu fɔ mekɔp yu maynd ɛn rɛdi fɔ du wetin rayt sote go. Fɔ ripɛnt ɛn fɔ lɛf fɔ du bad na tin dɛn we yu fɔ du we go mek yu fit fɔ baptayz.

14. Us impɔtant tin we yu fɔ du bifo yu baptayz?

¹⁴ Wan ɔda impɔtant tin de we yu fɔ du bifo yu baptayz. Yu fɔ gi yu layf to Jiova Gɔd.

15, 16. Wetin i min fɔ gi yu layf to Gɔd? Wetin mek pɔsin fɔ gi in layf to Gɔd?

 ¹⁵ We yu de pre to Jiova Gɔd fɔ gi yu layf to am, yu de prɔmis am se na in wangren yu go wɔship sote go. Bɔt wetin mek pɔsin fɔ gi in layf to Gɔd? Fɔ ansa dis kwɛstyɔn, lɛ wi tink bɔt dis ɛgzampul. Lɛ wi se wan man ɛn wan uman de. Di mɔ di man de sabi di uman ɛn no di gud abit dɛn we i gɛt, na di mɔ i de lɛk am. As tɛm de go, di man go se i want mared di uman. Di man no se we i mared di uman, i go gɛt fɔ kia ɛn du ɔda tin dɛn fɔ am. Bɔt bikɔs i lɛk di uman, i go mared am.

¹⁶ Na di sem tin wit yu ɛn Jiova. Di mɔ yu de lan bɔt am ɛn lɛk am, na so yu nɔ go gri mek natin stɔp yu fɔ wɔship am. Ɛnibɔdi we want fɔ bi Jizɔs in disaypul “nɔ fɔ du wetin in want fɔ du nɔmɔ.” (Mak 8:​34) Dat min se na di tin we Gɔd want, fɔ impɔtant pas di tin we wi want. So bifo yu baptayz, di men tin na yu layf fɔ bi, fɔ de du wetin Jiova Gɔd want.—Rid Pita In Fɔs Lɛta 4:​2.

17. Wetin mek sɔm pipul dɛn de fred fɔ gi dɛn layf to Gɔd?

¹⁷ Sɔm pipul dɛn nɔ kin want fɔ gi dɛn layf to Jiova pan ɔl we dɛn no se na impɔtant tin dat fɔ du. Dɛn kin fred se dɛn go gɛt fɔ ansa to Gɔd we dɛn go dɔn baptayz. So bikɔs dɛn de fred se dɛn go du tin we go mek Gɔd in at pwɛl, dɛn tink se i go fayn if dɛn nɔ gi dɛn layf to Gɔd.

18. Wetin go mek yu want fɔ gi yu layf to Gɔd?

¹⁸ Di mɔ yu de lan bɔt Jiova, na di mɔ yu go want fɔ gi yu layf to am ɛn tray tranga wan fɔ du wetin i want.  (Matyu 5:​33) Afta yu dɔn gi yu layf to Gɔd, na fɔ tray tranga wan fɔ de “du wetin di Masta want, ɛn ɔltɛm . . . go de du di tin dɛn we go mek i gladi.” (Lɛta Fɔ Kɔlɔse 1:​10) Bikɔs yu lɛk Gɔd, yu nɔ go tink se i at fɔ du wetin i want. Yu go mɔs gri wit wetin di apɔsul Jɔn rayt. I se: “We wi lɛk Gɔd wi de du ɔl wetin i tɛl wi fɔ du. Wetin i tɛl wi fɔ du nɔ tranga fɔ wi.”—Jɔn In Fɔs Lɛta 5:​3.

19. Wetin mek yu nɔ fɔ fred fɔ gi yu layf to Gɔd?

¹⁹ Nɔto pas wi pafɛkt bifo wi go ebul gi wi layf to Gɔd. Jiova no se nɔto ɔltin wi ebul du ɛn i nɔ go ɛva aks wi fɔ du sɔntin we wi nɔ go ebul du. (Sam 103:​14)  I nɔ want natin fɔ mɔna wi. Na dat mek i de sɔpɔt ɛn ɛp wi. (Rid Ayzaya 41:​10.) If yu biliv Jiova wit ɔl yu at, i go mɔs mek ‘yu si yu we klia wan.’—Prɔvabs 3:​5, 6.

20. Wetin mek ɔlman fɔ no se yu dɔn gi yu layf to Jiova?

²⁰ If yu tink bɔt di tin dɛn we wi jɔs tɔk bɔt, i go mek yu pre to Jiova fɔ gi yu layf to am. Ɛnibɔdi we rili lɛk Gɔd, fɔ ‘tɛl pipul dɛn’ bɔt am. (Lɛta Fɔ Rom 10:​10) Aw yu go ebul tɛl pipul dɛn se yu biliv Gɔd?

21, 22. Aw yu go ebul sho ɔlman se yu biliv Gɔd?

 ²¹ If yu want fɔ baptayz, na fɔ tɛl di kɔdinetɔ we de na yu kɔngrigeshɔn. I go mek yu ɛn sɔm ɛlda dɛn mit so dat dɛn go aks yu sɔm kwɛstyɔn dɛn bɔt di men tin dɛn we di Baybul de tich. If dɛn ɛlda ya si se yu fit fɔ baptayz, dɛn go tɛl yu se yu go baptayz na di nɛks asɛmbli ɔ kɔnvɛnshɔn. * Insay dɛn program ya, wan brɔda kin gi wan tɔk we de sho wetin i min fɔ baptayz. Di brɔda we de gi di tɔk go tɛl ɔl di wan dɛn we de kam baptayz, fɔ grap ɛn ansa tu impɔtant kwɛstyɔn dɛn. Na wan we dis we dɛn go sho ɔlman se dɛn biliv Gɔd.

²² Di baptayz we yu go baptayz na in go sho ɔlman se yu na pɔsin we dɔn gi yu layf to Gɔd ɛn yu dɔn bi Jiova Witnɛs. We dɛn de baptayz pɔsin, dɛn kin put in wan ol bɔdi insay di wata fɔ sho ɔlman se i dɔn gi in layf to Jiova.

23. Wetin i min fɔ baptayz “wit di pawa we Papa Gɔd ɛn in Pikin ɛn in Spirit gi”?

²³ Jizɔs bin se di wan dɛn we go bi in disaypul dɛn fɔ baptayz “wit di pawa we Papa Gɔd ɛn in Pikin ɛn in Spirit gi.” (Matyu 28:​19) Dis min se di pɔsin we de baptayz fɔ no di pawa we Jiova Gɔd ɛn Jizɔs Krays gɛt. (Sam 83:​18, NW; Matyu 28:​18) I fɔ no bak wetin di oli spirit de du.—Lɛta Fɔ Galeshya 5:​22, 23; Pita In Sɛkɛn Lɛta 1:​21.

24, 25. (a) Wetin i min fɔ baptayz? (b) Us kwɛstyɔn yu fɔ tink bɔt?

²⁴ Fɔ baptayz nɔto jɔs fɔ put pɔsin in bɔdi insay wata. I min sɔntin we impɔtant. We dɛn put di pɔsin insay di wata, i min se di pɔsin dɔn lɛf ɔl in bad abit dɛn.  Dɔn we dɛn pul am insay di wata, i min se i dɔn rɛdi fɔ du wetin Gɔd want. Mɛmba bak se na to Jiova yu dɔn gi yu layf; yu nɔ gi yu layf to wok, to pɔsin, ɔ to ɔganayzeshɔn. We yu gi yu layf to Jiova ɛn baptayz, yu dɔn bigin fɔ bi in tayt tayt padi.—Sam 25:​14.

²⁵ Nɔto di baptayz we yu baptayz go mek yu sev. Di apɔsul Pɔl bin se: “Una fɔ fred Gɔd, dat go mek una du ɔl wetin Gɔd want una fɔ du.” (Lɛta Fɔ Filipay 2:​12) We pɔsin baptayz, min se i jɔs dɔn bigin du wetin go mek i sev. Di kwɛstyɔn naw we yu fɔ tink bɔt na, Aw yu go ebul fɔ kɔntinyu fɔ du wetin go mek Gɔd lɛk yu? Di las chapta na dis buk go ansa dis kwɛstyɔn.