1, 2. Udat na sɔm pipul dɛn we Jiova bin pik fɔ bi in padi?

NA USKAYN pɔsin yu go pik fɔ bi yu padi? I go mɔs bi se na pɔsin we yu ɛn in biliv di sem tin, una lɛk di sem tin ɛn una kin du di sem tin. Ɛn na pɔsin we gɛt fayn abit dɛn, lɛk pɔsin we nɔ de tif ɛn lay, ɛn we gɛt gud-at.

² Frɔm we Gɔd mek mɔtalman, i dɔn de pik difrɛn difrɛn pipul dɛn fɔ bi in padi. Fɔ ɛgzampul, Jiova bin se Ebraam na in padi. (Rid Ayzaya 41:​8; Jems 2:​23.) Gɔd bin se i “gladi fɔ” Devid bikɔs Devid na di kayn pɔsin we i lɛk. (Di Apɔsul Dɛn Wok [Akt] 13:​22) Ɛn Jiova bin se Daniɛl na pɔsin we “ɔlman lɛk.”—Daniɛl 9:​23.

3. Wetin mek Jiova bin pik sɔm pipul dɛn fɔ bi in padi?

³ Wetin mek Jiova tek Ebraam, Devid, ɛn Daniɛl fɔ bi in padi? I tɛl Ebraam di rizin. I se na bikɔs Ebraam bin “obe am.” (Jɛnɛsis 22:​18) So Jiova de mek padi wit pipul dɛn we de du wetin i tɛl dɛn fɔ du. I tɛl di Izrɛlayt dɛn se: “Obe mi vɔys, ɛn a go bi una Gɔd, ɛn una go bi mi pipul  dɛm.” (Jɛrimaya 7:​23) If yu obe Jiova, yusɛf go bi in padi!

4, 5. Aw Jiova kin ɛp in padi dɛn?

⁴ Tink bɔt di tin dɛn we yu go ɛnjɔy if yu bi Gɔd in padi! Di Baybul se Jiova de fɛn we “fɔ sho in pawa fɔseka di wan dɛn we dɛn . . . at klin fɔ am.” (Sɛkɛn Kronikul 16:​9) Aw Jiova go ɛp yu? Wan we aw Jiova kin du dis, de na Sam 32:​8 we se, ‘A go tich yu ɛn tɛl yu wetin fɔ du, mi yay go fala yu, ɛnisay we yu go.’

⁵ Dis skripchɔ sho se Jiova rili bisin bɔt yu. Jiova go sho yu wetin fɔ du ɛn i go ɛp yu fɔ du am. Gɔd rɛdi fɔ ɛp yu fɔ bia wit di prɔblɛm dɛn we yu gɛt. (Rid Sam 55:​22.) So if yu sav Jiova wit ɔl yu at, yusɛf go tɔk di sem tin we Devid bin tɔk, fɔ se: “A de mɛmba se PAPA GƆD de wit mi ɔltɛm ɛn bikɔs i de wit mi, a nɔ de fred natin.” (Sam 16:​8; 63:​8) Jiova go rili ɛp yu so dat yu go liv yu layf di we aw i want. Bɔt pɔsin de we nɔ want lɛ yu du wetin go mek Gɔd in at gladi.

6. Wetin Setan bin lay pan mɔtalman se?

⁶ Insay Chapta 11, wi bin lan se Setan bin se Gɔd nɔ gɛt rayt fɔ rul. I bin se Gɔd de lay ɛn na bad tin Gɔd du we i nɔ lɛf Adam ɛn Iv fɔ disayd fɔ dɛnsɛf wetin gud ɛn wetin bad. Afta Adam ɛn Iv bin dɔn sin, mɔtalman bigin bɔku na di wɔl. Na de Setan tɔk se mɔtalman nɔ de sav Gɔd fɔ di rayt rizin. I se pipul dɛn nɔ de sav Gɔd bikɔs dɛn lɛk am. Ɛn if Gɔd gi am di chans, i go tɔn ɔlman agens Gɔd. Aw wi no se na so Setan bin se? Na di tin we bin apin to wan man we nem Job, mek wi no se na so i bin se. Udat na bin Job? Ɛn aw i bin de insay di chalenj we Setan chalenj Gɔd?

7, 8. (a) Wetin mek Job bin difrɛn frɔm ɔl di ɔda pipul dɛn we bin de na di wɔl? (b) Wetin Setan bin se Job de wɔship Gɔd fɔ?

 ⁷ I dɔn pas lɛk 3,600 ia frɔm we Job bin de na di wɔl. In na bin gud man. Jiova bin se, ‘Nɔbɔdi nɔ de na di wɔl lɛk Job bikɔs na gud man ɛn i de waka tret wit mi. I de fred ɛn rɛspɛkt mi ɛn nɔ miks pan bad.’ (Job 1:​8) Gɔd bin gladi fɔ Job.

⁸ Setan bin se Job nɔ de wɔship Gɔd fɔ di rayt rizin. I tɛl Jiova se: “I . . . dɔn mek i nɔ ebul du in, in famili ɛn ɔl wetin i gɛt natin. I se PAPA GƆD dɔn mek bɛtɛ de fala Job pan ɔl wetin i de du ɛn dɔn gi am animal dɛn ɔlɔbɔt na di land. Setan se, if PAPA GƆD go jɛs tret in an ɛn tek ɔl wetin i bin dɔn gi Job, i go mɔs tɔk bad bɔt am bifo in fes.”—Job 1:​10, 11.

9. Wetin Jiova bin du we Setan bin chalenj Job? Wetin mek i du so?

⁹ Setan bin de tray fɔ se Job de sav Gɔd jɔs bikɔs Gɔd de ɛp am. I tɔk bak se if bad tin apin to Job, Job go tɔn in bak pan Gɔd. Wetin Jiova du? Ɛnti Setan bin se Job de wɔship Gɔd jɔs bikɔs Gɔd de ɛp am, so Jiova alaw Setan fɔ du bad bad tin dɛn to Job. Dis go mek ɔlman no if Job lɛk Gɔd ɔ i nɔ lɛk am.

10. Us bad bad tin dɛn bin mit Job? Wetin i du?

¹⁰ Setan mek bɔku bad bad tin dɛn bigin apin to Job. Dɛn tif sɔm pan Job in animal dɛn ɛn dɛn kil sɔm. Dɛn kil plɛnti pan in wokman dɛn. Dis bin mek tin tranga fɔ Job. Apat frɔm dat, Setan mek Job in tɛn pikin dɛn day we wan ebi briz bin blo. Bɔt pan ɔl we dɛn bad bad tin ya bin de apin, “Job nɔ sin ɛn i nɔ blem PAPA GƆD.”—Job 1:​22.

11. (a) Wetin na di ɔda tin we Setan bin tɔk bɔt Job? Wetin Jiova bin du? (b) Wetin Job bin du we i gɛt wan bad bad sik?

¹¹ Setan nɔ stɔp de o! I go dɔn tink se Job ebul bia we i  nɔ gɛt prɔpati, wokman dɛn, ɛn pikin dɛn igen, bɔt i go tɔn in bak pan Gɔd if i nɔ gɛt wɛlbɔdi. Jiova bin alaw Setan fɔ put wan bad bad sik pan Job. Bɔt dis sɛf nɔ mek Job lɛf fɔ biliv Gɔd. Bifo dat, i se: “Te a day, a nɔ go ɛva lɛf fɔ sav Gɔd.”—Job 27:​5, NW.

12. Aw Job sho se na lay Setan bin de lay?

¹² Job nɔ bin no se na Setan de mek ɔl dɛn bad bad tin ya de mit am. I bin fil se na Gɔd de mek i de sɔfa. Wetin mek i bin fil so? Na bikɔs i nɔ bin no se Setan bin dɔn tɔk se Jiova nɔ gɛt rayt fɔ rul. (Job 6:​4; 16:​11-14) Bɔt stil, Job nɔ bin kɔmɔt biɛn Jiova. I bin fetful to Gɔd. Dis tin we Job du, sho se na lay Setan bin lay we i se Job de wɔship Gɔd jɔs bikɔs Gɔd de du gud tin dɛn fɔ am.

13. Wetin apin we Job bin fetful to Gɔd?

¹³ Job bin fetful to Jiova. Dis mek Jiova bin ebul ansa Setan ɛn tɛl am se i de lay. Fɔ tru, Job na bin Jiova in padi, ɛn Gɔd bin du fayn fayn tin dɛn fɔ am bikɔs i bin fetful to am.—Job 42:​12-17.

14, 15. Aw wi no se wisɛf de insay di chalenj we Setan bin chalenj Gɔd?

¹⁴ Setan bin tɔk se Job nɔ go kɔntinyu fɔ sav Jiova we bad tin mit am. Dis tin we Setan tɔk nɔto fɔ Job nɔmɔ, bɔt na fɔ wi ɔl. Wetin mek wi se so? Na di tin we Jiova tɔk na Prɔvabs 27:​11 mek wi tɔk so. I tɔk de se: “Mi pikin, sho se yu gɛt sɛns ɛn mek a gladi, so a go ebul ansa ɛnibɔdi we briŋ fityay to mi.” Dɛn bin rayt da vas de lɔntɛm afta Job bin dɔn day. Ɛn dis vas de sho se Setan na di men pɔsin we stil de fityay Gɔd ɛn de lay pan in savant dɛn. We wi de liv wi layf di we aw Gɔd want, wi de ɛp fɔ ansa Setan, ɛn mek Gɔd in at gladi. Bɔt yu nɔ tink se i go fayn fɔ mek yusɛf ɛp fɔ sho se na lay  Setan de lay, ilɛksɛf dat go mek yu chenj di we aw yu de liv yu layf?

¹⁵ Setan bin se: “Pɔsin kin du ɛnitin fɔ mek i nɔ day.” (Job 2:​4) We Setan yuz di wɔd “pɔsin,” i sho se nɔto Job nɔmɔ i bin de tɔk bɔt, i bin de tɔk bɔt ɔlman. Dis tin we Setan tɔk rili siriɔs! Setan se yu nɔ de wɔship Gɔd bikɔs yu lɛk am. I se yu de wɔship am jɔs bikɔs i de du gud tin dɛn fɔ yu, ɛn yu go kɔmɔt biɛn Gɔd we bad tin apin to yu. Setan nɔ want mek yu du wetin Gɔd want. I want mek yu lɛf fɔ du wetin fayn we bad tin apin to yu. Aw Setan kin tray fɔ du dis?

16. (a) Us we dɛn Setan de yuz fɔ mek pipul dɛn tɔn dɛn bak pan Gɔd? (b) Aw Setan go yuz dɛn we ya pan yu?

¹⁶ As wi bin lan na Chapta 10, Setan de yuz difrɛn difrɛn we dɛn fɔ mek pipul dɛn tɔn dɛn bak pan Gɔd. Sɔntɛnde, i kin mek “lɛkɛ angri layɔn, fɔ fɛn udat in go fɔdɔm pan.” (Pita In Fɔs Lɛta 5:​8) Aw Setan de du dis? I go mek yu padi, fambul, ɛn ɔda pipul dɛn tray fɔ mek yu lɛf fɔ stɔdi di Baybul ɛn fɔ du wetin di Baybul se. * (Jɔn 15:​19, 20) Apat frɔm dat, Setan “kin chenj, mek insɛf lɛkɛ enjɛl we de briŋ layt.” (Sɛkɛn Lɛta Fɔ Kɔrint 11:​14) Setan kin yuz kɔnikɔni we dɛn fɔ ful yu ɛn fɔ mek yu lɛf fɔ liv yu layf di we aw Gɔd want. I kin tray bak fɔ pwɛl yu at. Sɔntɛm, i go mek yu fil se yu nɔ go ebul fɔ du wetin Gɔd want. Ilɛksɛf Setan de mek insɛf lɛk “angri layɔn” ɔ lɛk “enjɛl we de briŋ layt,” wi no se na wan tin mek i de du ɔl dis: I se we bad tin mit yu, yu go lɛf fɔ sav Gɔd. Aw yu go ebul sho se na lay Setan de lay ɛn aw yu go sho se yu fetful to Gɔd lɛk Job?

17. Wetin na di men tin we mek wi fɔ obe Gɔd in lɔ dɛn?

¹⁷ Yu go ebul fɔ sho se Setan de lay we yu liv yu layf di we aw Gɔd want. Aw yu go ebul du dis? Di Baybul se: “Yu fɔ lɛk di Masta we na yu Gɔd wit ɔl yu at, wit ɔl yu layf ɛn wit ɔl yu maynd.” (Matyu 22:​37) As yu kɔntinyu fɔ lɛk Jiova, na so yu go want fɔ du di tin dɛn we i want yu fɔ du. Na dat mek di apɔsul Jɔn rayt se: “We wi lɛk Gɔd wi de du ɔl wetin i tɛl wi fɔ du.” If wi lɛk Gɔd wit ɔl wi at, wi go si se “wetin i tɛl wi fɔ du nɔ traŋa fɔ wi.”—Jɔn In Fɔs Lɛta 5:​3.

18, 19. (a) Wetin na sɔm lɔ dɛn we Jiova dɔn gi wi? (Chɛk di bɔks we de na  pej 122.) (b) Aw wi no se Gɔd nɔ go tɛl wi fɔ du sɔntin we wi nɔ go ebul fɔ du?

¹⁸ Wetin na Jiova in lɔ dɛn? Sɔm pan dɛn lɔ ya gɛt fɔ du wit abit dɛn we wi fɔ lɛf. If yu want fɔ no sɔm pan dɛn, luk di bɔks we de na  pej 122 we gɛt di taytul “Nɔ Put An pan Tin dɛn we Jiova Et.” Insay de, yu go si abit dɛn we di Baybul se nɔ fayn ɛn we wi fɔ lɛf. We yu rid sɔm pan dɛn fɔs, yu go fil se dɛn nɔ bad. Bɔt afta yu go dɔn rid ɛn tink gud wan bɔt di skripchɔ dɛn we rayt de, yu go si wetin mek Jiova se wi fɔ lɛf dɛn. I nɔ kin izi fɔ lɛf dɛn abit dɛn de. Bɔt we yu liv yu layf di we aw Gɔd want, go mek yu fil fayn. Ɛn i go mek yu no se yu dɔn du wetin Gɔd want ɛn dat go mek yu gɛt gladi at. (Ayzaya 48:​17, 18) Dis na tin we yu go ebul du. Wetin mek wi se so?

¹⁹ Jiova nɔ go ɛva tɛl wi fɔ du sɔntin we wi nɔ go ebul du. (Rid Ditarɔnɔmi 30:​11-14.) I no wi pas aw wi no wisɛf. I no wetin wi ebul du ɛn wetin wi nɔ ebul du. (Sam 103:​14) Pantap dat, Jiova go ɛp wi fɔ du wetin i want. Di apɔsul Pɔl bin rayt se: “Gɔd we de du ɛnitin we i prɔmis fɔ du, nɔ go mek una fil fɔ du ɛni bad tin we una nɔ go gɛt pawa fɔ lɛf; bɔt wɛn una fil fɔ du bad, da sem tɛm de  Gɔd go mek una ebul tinap traŋa ɛn i go sho una wetin fɔ du mek una nɔ go du di bad tin we una bin want fɔ du.” (Fɔs Lɛta Fɔ Kɔrint 10:​13) Jiova go gi wi in “pawa” fɔ ɛp wi fɔ bia ɛnitin.—Sɛkɛn Lɛta Fɔ Kɔrint 4:​7.

20. Wetin na sɔm abit dɛn we Gɔd lɛk we wi fɔ gɛt? Wetin mek dis impɔtant?

²⁰ Fɔ du wetin Jiova want nɔ jɔs min se yu fɔ lɛf di tin dɛn we i nɔ lɛk. I min bak se yu fɔ lɛk di tin dɛn we i lɛk.  (Lɛta Fɔ Rom 12:​9) Yu nɔ go lɛk fɔ mek padi wit pipul dɛn we yu ɛn dɛn biliv di sem tin, una lɛk di sem tin ɛn we una kin du di sem tin? Na so Jiova sɛf tan. So, tray fɔ lɛk di tin dɛn we Jiova lɛk. Di Baybul tɔk bɔt sɔm pan dɛn tin ya na Sam 15:​1-5. Insay de, i sho di kayn pipul dɛn we kin bi Jiova in padi. (Rid Sam 15:​1-5.) Jiova in padi dɛn de sho se dɛn gɛt “Gɔd in Spirit.” Da spirit de “go mek pipul lɛk dɛn kɔmpin, i go mek dɛn gladi, i go mek dɛn nɔ de mek plaba, i go mek dɛn ebul bia trɔbul, ɛn i go mek dɛn de ɛp dɛn kɔmpin mɔtalman,  i go mek dɛn de du gud to ɔda pipul, i go mek dɛn tru to dɛn kɔmpin, i go mek pipul put dɛn yay dɔŋ ɛn i go mek dɛn nɔ jɛs de du wetin dɛn at gi dɛn fɔ du.”—Lɛta Fɔ Galeshya 5:​22, 23.

21. Wetin go ɛp yu fɔ gɛt abit dɛn we Gɔd lɛk?

²¹ Fɔ mek yu go gɛt di abit dɛn we Gɔd lɛk, na fɔ de rid ɛn stɔdi di Baybul ɔltɛm. Ɛn fɔ mek yu go ebul fɔ tink di we aw Jiova de tink, na fɔ kɔntinyu fɔ lan wetin Gɔd want. (Ayzaya 30:​20, 21) Di mɔ yu lɛk Jiova, na di mɔ yu go want fɔ liv yu layf di we aw i want.

22. Us bɛnifit yu go gɛt we yu liv yu layf di we aw Gɔd want?

²² Wi fɔ tray fɔ liv wi layf di we aw Jiova want pan ɔl we i nɔ izi. Di Baybul se fɔ lɛ pɔsin chenj in layf min se i fɔ lɛf di bad trik dɛn we i gɛt ɛn liv nyu layf. (Lɛta Fɔ Kɔlɔse 3:​9, 10) We Devid bin de tɔk bɔt Gɔd in lɔ dɛn, i se: “Wɛn a de du wetin [Gɔd] se, i de blɛs mi.” (Sam 19:​11) Yusɛf go si se Gɔd go blɛs yu we yu liv yu layf di we aw i want. Ɛn yu go sho Setan se i de lay ɛn mek Jiova in at gladi!