1, 2. Usay wi go ayd fɔ mek trɔbul nɔ mit wi?

TINK bɔt dis: Lɛ wi se yu de waka, dɔn ebi briz bigin blo. Di ples dak ɛn laytin bigin flash, tɛnda bigin krak, dɔn ebi ren bigin kam. Ɛn as yu de go, yu si wan os. Yu rɔn wit spid, ɛn go insay de. We yu rich, yu si se di ples dray ɛn fayn, ɛn na strɔng bildin. Yu go gladi bad fɔ da kayn ples de, nɔto so?

² Di wɔl tide dɔn tan lɛk ples we ebi briz de blo ɛn ebi ren de kam. Tin dɛn de go frɔm bad to wɔs. Bɔt say de we wi go rɔn go fɔ mek bad tin nɔ mit wi. Usay dande so? Di Baybul se: “Ɛnibɔdi we go to PAPA GƆD fɔ mek i kɔba am . . . go tɛl Gɔd se na in de kɔba am ɛn fɛt fɔ am, in na di Gɔd we i de wɔship so i go abop pan am.”—Sam 91:​1, 2.

3. Wetin wi fɔ du we go mek Jiova kɔba wi?

 ³ Jɔs tink bɔt dat! Jiova we mek wi ɛn we gɛt rayt fɔ rul di wan ol wɔl, go kɔba wi mek bad nɔ mit wi bikɔs i gɛt pawa pas ɛnibɔdi ɔ ɛnitin we go want du wi bad. Ilɛksɛf bad mit wi, Jiova ebul pul da bad tin de. Wetin wi fɔ du we go mek Jiova kɔba wi? Wi fɔ abop pan am. Pantap dat, Gɔd in Wɔd de tɛl wi se: “Una fɔ du dɛn tin we go mek Gɔd stil de blɛs una bikɔs i lɛk una.” (Jud In Lɛta 21) Fɔ mek wi kɔntinyu fɔ du wetin go mek Gɔd lɛk wi, wi fɔ tray tranga wan mek wi padi biznɛs wit am kɔntinyu. Na da tɛm de wi go abop pan am fɔ kɔba wi. Bɔt aw wi go ebul mek wi padi biznɛs wit Gɔd kɔntinyu?

4, 5. Aw Jiova dɔn sho se i lɛk mɔtalman?

⁴ Fɔ mek Gɔd kɔntinyu fɔ lɛk wi, wi fɔ ɔndastand di we aw i dɔn sho se i lɛk wi. Tink bɔt sɔm pan di tin dɛn we di Baybul de tich we dis buk dɔn ɛp yu fɔ ɔndastand. Jiova dɔn mek di wɔl lɛk fayn os fɔ wi fɔ tap. I dɔn put bɔku it ɛn wata de, ɛn i dɔn gi wi bɔku fayn fayn tin dɛn lɛk gold ɛn dayamɔn. I dɔn mek fayn fayn animal dɛn ɛn ples dɛn we fayn fɔ si. Gɔd dɔn gi wi di Baybul. Insay de, i dɔn sho wi in nem ɛn di kwaliti dɛn we i gɛt. Di Baybul dɔn sho wi bak se Gɔd alaw in Pikin we i lɛk, fɔ kam sɔfa na di wɔl ɛn day fɔ wi sin dɛn. (Jɔn 3:​16) Wetin dis dɔn du fɔ wi? I dɔn gi wi op se wi go ɛnjɔy gud gud wan tumara bambay.

⁵ Fɔ mek wi go ebul fɔ ɛnjɔy dɛn tin dɛn de tumara bambay, Gɔd dɔn du wan ɔda tin bak. I dɔn mek wan gɔvmɛnt na ɛvin. I nɔ go te igen, dis gɔvmɛnt go mek wi lɛf fɔ sɔfa, ɛn i go mek di wɔl bi Paradays. Jɔs tink  bɔt dat! Wi go ebul liv insay de wit pis ɛn gladi at sote go. (Sam 37:​29) Bɔt naw, Gɔd dɔn sho wi aw wi fɔ liv wi layf so dat wi go gɛt gladi at. Apat frɔm dat, i dɔn mek wi ebul fɔ pre to am, ɛn wi kin tɔk to am ɛnitɛm we wi want. Dis na sɔm pan di we dɛn we Jiova dɔn sho se i lɛk wi ɔl.

6. Wetin yu fɔ du we Jiova dɔn sho se i lɛk yu?

⁶ Wan kwɛstyɔn de we fayn fɔ mek yu tink bɔt. Di kwɛstyɔn na: Wetin a fɔ du bikɔs Jiova lɛk mi? Bɔku pipul dɛn kin se, “Wi fɔ lɛk Jiova bak.” Na so yusɛf tink? Jizɔs bin sho di lɔ we pas ɔl di ɔda lɔ dɛn. I se: “Yu fɔ lɛk di Masta we na yu Gɔd wit ɔl yu at, wit ɔl yu layf ɛn wit ɔl yu maynd.” (Matyu 22:​37) Bɔku rizin dɛn de we mek yu lɛk Jiova Gɔd. Bɔt fɔ fil se yu lɛk Jiova nɔ min se yu rili lɛk am wit ɔl yu at, ɔl yu layf, ɛn ɔl yu maynd.

7. Apat frɔm di fil we yu de fil se yu lɛk Gɔd, wetin yu fɔ du fɔ sho se yu rili lɛk am?

⁷ I fayn fɔ fil se yu lɛk Jiova. Bɔt da fil we yu de fil jɔs de sho se yu dɔn bigin fɔ lɛk am. We di Baybul se yu fɔ lɛk Gɔd, i nɔ min se yu fɔ jɔs fil se yu lɛk am. Fɔ ɛgzampul, we yu plant frut in sid, i go gro ɛn leta bigin bia da sem frut de. Bɔt if yu want fɔ it di frut, yu go want mek dɛn gi yu di sid? Nɔ, yu nɔ go want dat. Semweso, fɔ fil se yu lɛk Jiova Gɔd jɔs de sho se yu dɔn bigin fɔ lɛk am. Di Baybul se: “We wi lɛk Gɔd wi de du ɔl wetin i tɛl wi fɔ du. Wetin i tɛl wi fɔ du nɔ traŋa fɔ wi.” (Jɔn In Fɔs Lɛta 5:​3) Fɔ sho se wi rili lɛk Gɔd, wi fɔ du fayn tin dɛn. We pipul dɛn de luk di we aw wi de liv wi layf, dɛn fɔ ebul no se wi rili lɛk Gɔd.—Rid Matyu 7:​16-20.

8, 9. Aw wi go sho se wi lɛk Gɔd? Aw wi go sho se wi gladi fɔ ɔl wetin i dɔn du fɔ wi?

 ⁸ Fɔ sho se wi lɛk Gɔd, wi fɔ obe in lɔ dɛn. Dat nɔto tin we at fɔ du. Jiova in lɔ dɛn nɔ tranga. I mek dɛn fɔ ɛp wi fɔ ɛnjɔy wi layf ɛn gɛt gladi at. (Prɔvabs 2:​9-12) We wi de liv wi layf di we aw Jiova tɛl wi, dat de sho se wi rili gladi fɔ ɔl wetin i dɔn du fɔ wi. Bɔt di bad tin na dat, bɔku pipul dɛn na di wɔl nɔ de du dat. Wi nɔ want fɔ tan lɛk sɔm pipul dɛn we bin de di tɛm we Jizɔs bin de na di wɔl. We Jizɔs mɛn tɛn pipul dɛn we bin gɛt lɛprɔsi, na wangren pɔsin kam bak fɔ tɛl am tɛnki. (Lyuk 17:​12-17) Wi fɔ tan lɛk di wan we kam tɛl tɛnki; wi nɔ fɔ tan lɛk di wan dɛn we nɔ kam tɛl tɛnki.

⁹ Wetin na Jiova in lɔ dɛn we wi fɔ obe? Wi bin dɔn tɔk bɔt bɔku pan dɛn na dis buk; bɔt lɛ wi tɔk bɔt sɔm pan dɛn bak. We wi obe Gɔd in lɔ dɛn, dat go ɛp wi fɔ kɔntinyu fɔ du wetin go mek i lɛk wi.

10. Wetin mek i impɔtant fɔ kɔntinyu fɔ lan bɔt Jiova Gɔd?

¹⁰ Fɔ lan bɔt Jiova na wan impɔtant tin we go ɛp wi fɔ kam nia am. Na tin we wi fɔ kɔntinyu fɔ du, wi nɔ fɔ ɛva stɔp. Lɛ wi se, yu de na do wan nɛt we di ples kol, de wam faya. Yu go sidɔm luk di faya te i ɔt? Nɔ, yu go put tin dɛn lɛk wud, we yu no se go mek di faya kech mɔ. If yu nɔ du dat, di kol go mɔna yu bad! Jɔs lɛk aw wud de mek faya kech mɔ, na so di no we yu “no bɔt Gɔd” go mek yu kɔntinyu fɔ lɛk am.—Prɔvabs 2:​1-5.

11. Wetin Jizɔs in disaypul dɛn du we Jizɔs tɛl dɛn bɔt wetin di prɔfɛt dɛn rayt?

¹¹ Jizɔs bin want mek di wan dɛn we de fala am, kɔntinyu fɔ lɛk Jiova ɛn di Baybul mɔ ɛn mɔ. Afta Gɔd gi Jizɔs layf bak, Jizɔs tɛl tu pan in disaypul dɛn bɔt sɔm pan di tin dɛn we di prɔfɛt dɛn bin dɔn rayt se go apin to di Mɛsaya. I tɛl dɛn se dɛn tin dɛn de dɔn apin insay in layf. Wetin di disaypul dɛn du? Dɛn tɔk se: “Nɔto dat mek sɔntin tɔch wi at wɛn i bin de tɔk ɛn wɛn i bin de ɛksplen wetin dɛn rayt na Gɔd in Buk, wɛn wi de kam?”—Lyuk 24:​32.

12, 13. (a) Wetin dɔn apin to di we aw bɔku pipul dɛn lɛk Gɔd ɛn di Baybul? (b) Wetin wi fɔ du fɔ mek wi nɔ lɛf fɔ lɛk Jiova?

¹² We yu bigin lan di tin dɛn we de na di Baybul, yu go mɔs dɔn gladi, gɛt zil, ɛn lɛk Gɔd. Na da we de bɔku pipul dɛn kin fil. Di tin we at fɔ du naw na fɔ kɔntinyu fɔ lɛk Gɔd mɔ ɛn mɔ. Wi nɔ want fɔ fala pipul dɛn na di wɔl tide. Jizɔs bin tɔk se: “Di lɛk we plɛnti pipul gɛt na dɛn at go de lɛs.” (Matyu 24:​12) Wetin yu go du so dat yu nɔ go lɛf fɔ lɛk Jiova ɛn di tru tin dɛn we yu dɔn lan na di Baybul?

¹³ Wi fɔ kɔntinyu fɔ lan bɔt Jiova Gɔd ɛn Jizɔs Krays. (Jɔn 17:​3) Tink dip wan bɔt wetin yu de lan na di Baybul, ɛn aks yusɛf: ‘Wetin dis de tɛl mi bɔt Jiova Gɔd? Us ɔda  rizin dis dɔn gi mi fɔ mek a lɛk Jiova wit ɔl mi at, maynd, ɛn layf?’ (Rid Fɔs Lɛta To Timoti 4:​15.) We yu tink dɛn kayn we ya go ɛp yu fɔ kɔntinyu fɔ lɛk Jiova mɔ ɛn mɔ.

14. Aw prea go mek wi kɔntinyu fɔ lɛk Jiova mɔ ɛn mɔ?

¹⁴ Wan ɔda we aw wi go kɔntinyu fɔ lɛk Jiova na we wi de pre to am ɔltɛm. (Fɔs Lɛta Fɔ Tɛsalonayka 5:​17) Insay Chapta 17, wi bin lan se prea na spɛshal gift we Gɔd gi wi. If padi dɛn de tɔk ɔltɛm, dɛn padi biznɛs go tayt. Semweso, wi padi biznɛs wit Gɔd go kɔntinyu fɔ tayt, we wi de pre to am ɔltɛm. We wi de pre, wi nɔ fɔ de tɔk di sem tin ɔltɛm, ɛn wi fɔ pre frɔm wi at. Wi fɔ tɔk to Jiova lɛk we pikin de tɔk to in papa. Na tru se wi fɔ tɔk wit rɛspɛkt, bɔt wi fɔ opin wi at to am ɛn wi fɔ tɔk wetin de na wi at. (Sam 142:​2) Tu impɔtant we dɛn de fɔ wɔship Gɔd. Wan, na fɔ de stɔdi di Baybul. Tu, na fɔ de pre to am. Dɛn we ya go ɛp wi fɔ kɔntinyu fɔ du wetin go mek Gɔd lɛk wi.

15, 16. Wetin mek wi fɔ tek di prich we wi de prich as sɔntin we impɔtant?

¹⁵ Fɔ stɔdi di Baybul ɛn fɔ pre na tin dɛn we yu kin du yu wan. Naw, lɛ wi tɔk bɔt wan we aw wi de wɔship Gɔd wit ɔda pipul dɛn. Wetin na da we de? Na we wi de tɔk to pipul dɛn bɔt di tin dɛn we wi biliv. Yu dɔn bigin fɔ tɛl pipul dɛn wetin yu de lan na di Baybul? If yu dɔn du dat, i min se yusɛf dɔn ɛnjɔy fɔ du dis fayn fayn wok. We wi de tɛl ɔda pipul dɛn bɔt di tru tin dɛn we wi dɔn lan bɔt Jiova Gɔd, wi de du wan impɔtant wok we ɔlman we na tru Kristian fɔ du. Da wok de na fɔ prich di gud nyus bɔt Gɔd in Kiŋdɔm.—Rid Matyu 24:​14; 28:​19, 20.

¹⁶ Di apɔsul Pɔl bin tek di prich we i bin de prich as sɔntin we impɔtant. I se na jɛntri. (Sɛkɔn Lɛta Fɔ Kɔrint 4:​7, NW) Fɔ tɔk to ɔda pipul dɛn bɔt Jiova Gɔd ɛn di tin  dɛn we i want fɔ du, na di bɛst wok we pɔsin go ɛva du. Na di bɛst wok bikɔs di pɔsin we gi wi am na di bɛst Masta, ɛn wi go bɛnifit we wi du dis wok pas ɛni ɔda wok. We yu de du dis wok, yu de ɛp pipul dɛn we rili want fɔ lan bɔt Gɔd, fɔ kam nia am ɛn bigin waka na di rod we go mek  dɛn gɛt layf we go de sote go. Nɔ ɔda wok nɔ de we bɛtɛ pas dis! Apat frɔm dat, we wi de tɔk bɔt Jiova ɛn di tin dɛn we de na di Baybul, dat de mek wi biliv am ɛn lɛk am mɔ ɛn mɔ. Ɛn Jiova gladi fɔ di wok we wi de du. (Di Ibru Pipul Dɛn 6:​10) We wi de du dis wok ɔltɛm go ɛp wi fɔ kɔntinyu fɔ du wetin go mek Gɔd lɛk wi.—Rid Fɔs Lɛta Fɔ Kɔrint 15:​58.

17. Wetin mek wi nɔ fɔ westɛm fɔ prich to pipul dɛn?

¹⁷ I impɔtant fɔ mek wi mɛmba se wi nɔ fɔ westɛm fɔ prich to pipul dɛn. Wetin mek? Wɛl, di Baybul tɛl wi se: “Di big big de we PAPA GƆD de kam dɔn kam nia ɛn i de kam jisnɔ.” (Zɛfinaya 1:​14) Fɔ tru, di tɛm nɔ de fa igen we Jiova go mek di wɔl dɔn. So i fayn fɔ mek wi wɔn pipul dɛn! Dɛn nid fɔ no se na naw na di tɛm we dɛn fɔ sho se na Jiova gɛt di rayt fɔ rul di wan ol wɔl. Di tɛm we di wɔl go dɔn “nɔ go let.”—Abakɔk 2:​3, NW.

18. Wetin mek wi fɔ jɔyn tru Kristian dɛn fɔ wɔship Jiova?

¹⁸ Jiova want mek wi jɔyn tru Kristian dɛn fɔ wɔship am. Na dat mek in Wɔd se: “Una lɛ wi tink aw wi go ɛp wisɛf mek wi go lɛk wi kɔmpin dɛn ɛn du gud to dɛn. Una lɛ wi nɔ tap fɔ de mit, lɛ wi nɔ fala dɛn pipul we nɔ de gri fɔ go mitin. Bɔt una lɛ wi de kɔrej wi kɔmpin dɛn, mɔ igen we wi no se di De we wi Masta go kam bak de kam jisnɔ.” (Di Ibru Pipul Dɛn 10:​24, 25) We wi jɔyn we kɔmpin Kristian dɛn fɔ wɔship Gɔd, na fayn we dat fɔ prez ɛn wɔship di Gɔd we wi lɛk. I go ɛp wi bak fɔ kɔrej wisɛf.

19. Aw wi go ebul fɔ mek wi padi biznɛs wit wi kɔmpin Kristian dɛn tayt mɔ ɛn mɔ?

¹⁹ As wi de jɔyn ɔda pipul dɛn fɔ wɔship Jiova, na so wi go kɔntinyu fɔ lɛk dɛn mɔ ɛn mɔ, ɛn wi padi biznɛs wit dɛn go tayt. I fayn fɔ mek wi go de luk di gud tin dɛn we dɛn de du, lɛk aw Jiova insɛf de luk di gud tin dɛn we wi de du. Wi nɔ fɔ tink se dɛn pafɛkt. Wi fɔ mɛmba se na  tray wi ɔl de tray fɔ bi Jiova in padi; ɛn wi ɔl nɔ go ebul du dat di sem we. Apat frɔm dat, wi fɔ mɛmba se wi ɔl kin mek mistek. (Rid Lɛta Fɔ Kɔlɔse 3:​13.) Na fɔ tray tranga wan mek yu padi biznɛs wit di wan dɛn we lɛk Jiova, tayt mɔ ɛn mɔ. Yu go si se dat go ɛp yu fɔ de du wetin di Baybul se. Fɔ tru, fɔ wɔship Jiova wit yu Kristian brɔda ɛn sista dɛn go ɛp yu fɔ kɔntinyu fɔ du wetin go mek Gɔd lɛk yu. Wetin Jiova go du fɔ di wan dɛn we de wɔship am di we aw i want, ɛn we de du wetin go mek i lɛk dɛn?

20, 21. Wetin na “di tru layf”? Wetin mek dat na wɔndaful op?

²⁰ Jiova go gi in fetful savant dɛn layf. Bɔt uskayn layf i go gi dɛn? Yu tink se yu rili gɛt layf naw? Plɛnti pan wi go se yɛs wi gɛt layf, bikɔs wi de blo, wi de it, ɛn wi de drink. Apat frɔm dat, di tɛm dɛn we wi kin rili ɛnjɔy layf, wi kin tɔk se, “Na dis rili na layf!” Bɔt di Baybul se fɔ tru tru, nɔbɔdi nɔ rili gɛt layf.

²¹ Gɔd in Wɔd tɛl wi fɔ “gɛt da layf we na di tru layf.” (Fɔs Lɛta To Timoti 6:​19) Dɛn wɔd ya sho se “di tru layf” na sɔntin we wi abop fɔ gɛt tumara bambay. So we wi go dɔn pafɛkt, wi go de liv aw wi fɔ rili liv. Dat min se, wi go de liv di we aw Gɔd bin want frɔm di tɛm we i mek mɔtalman. Di tɛm we wi go de na Paradays, wi go gɛt kolat, wi go gladi, ɛn wi nɔ go sik igen. Da tɛm de, wi go ebul fɔ ɛnjɔy “di tru layf” we na di layf we go de sote go. (Fɔs Lɛta To Timoti 6:​12) Nɔto wɔndaful op dat?

22. Aw yu go “gɛt da layf we na di tru layf”?

²² Aw wi go “gɛt da layf we na di tru layf”? We Pɔl bin de tɔk bɔt di tru layf, i tɛl Kristian dɛn fɔ de du “gud wok” ɛn “dɛn fɔ fri an.” (Fɔs Lɛta To Timoti 6:​18) Dis dɔn sho wi klia wan se ɔltin lɛf to wi. Wi fɔ de du di tin dɛn we wi dɔn lan na di Baybul. Bɔt, yu tink se Pɔl bin de tray fɔ tɛl wi  se na di tin dɛn we wi de du go mek wi gɛt “di tru layf”? Nɔ, bɔt na “di lɛk we Gɔd lɛk wi we wi nɔ fit fɔ gɛt” go mek i gi wi “di tru layf.” (Lɛta Fɔ Rom 5:​15) Apat frɔm dat, Jiova kin gladi fɔ gi dis layf to di wan dɛn we de sav am. I want fɔ mek wi gɛt “di tru layf.” Di layf we go de sote go, na fɔ di wan dɛn we de kɔntinyu fɔ du wetin go mek Gɔd lɛk dɛn. Dɛn go gɛt gladi at ɛn kolat.

23. Wetin mek i impɔtant fɔ mek wi kɔntinyu fɔ du di tin dɛn we go mek Gɔd lɛk wi?

²³ Wi fɔ aks wisɛf se, ‘Wi de wɔship Gɔd di we aw di Baybul se wi fɔ wɔship am?’ If ɛvride wi de wɔship Gɔd da we de, dat de sho se wi de du di rayt tin. Dis go mek wi biliv tranga wan se Jiova go kɔba wi. I go sev in fetful pipul dɛn di tɛm we di wɔl go dɔn. Apat frɔm dat, i go put wi na Paradays we nɔ de fa igen. Wi go gladi bad fɔ de da tɛm de bikɔs wi no se wi bin dɔn du di rayt tin! If yu du di rayt tin naw, yu go ɛnjɔy “di tru layf.” Dat min se yu go de sote go lɛk aw Jiova Gɔd bin want!