1, 2. Uskayn tin dɛn kin mek pipul dɛn sɔfa tide? Us kwɛstyɔn dɛn dis kin mek wi aks?

AFTA wɔ bin apin na wan kɔntri, bɔku bɔku uman ɛn pikin dɛn bin day. Dɛn bɛr dɛn ɔl insay di sem grev ɛn dɛn put smɔl smɔl krɔs dɛn rawnd di grev. Dɛn rayt pan ɔl di krɔs dɛn se: “Wetin mek?” Pipul dɛn kin aks dis kwɛstyɔn we dɛn at kin pwɛl ɛn we dɛn nɔ kin no wetin mek bad tin kin apin to dɛn. Dis kin bi we wɔ, sik, ɔ ɔda tin mek dɛn padi ɔ fambul day. Dɛn kin want fɔ no wetin mek dɛn bad bad tin ya kin mit dɛn.

² Wetin mek Gɔd de alaw wi fɔ sɔfa? Jiova Gɔd gɛt pawa pas ɔlman, i lɛk wi, i gɛt sɛns, ɛn i lɛk fɔ du wetin rayt. Bɔt wetin mek bad at ɛn tin dɛn we nɔ rayt, plɛnti na di wɔl? Yu dɔn ɛva tink bɔt dɛn kwɛstyɔn ya?

3, 4. (a) Aw wi no se i nɔ bad fɔ aks Gɔd wetin mek i de alaw wi fɔ sɔfa? (b) Aw Jiova de fil we pipul dɛn de du bad ɛn we pipul dɛn de sɔfa?

³ I bad fɔ lɛ pipul dɛn aks wetin mek Gɔd de alaw wi fɔ sɔfa? Sɔm pipul dɛn kin fil se if wi aks da kayn kwɛstyɔn de, de sho se wi nɔ biliv Gɔd ɔ wi nɔ gɛt rɛspɛkt fɔ am. Bɔt we wi de rid di Baybul, wi go si se ivin pipul dɛn we bin fetful to Gɔd ɛn we bin de fred am, dɛnsɛf bin de aks dɛn kayn kwɛstyɔn dɛn de. Fɔ ɛgzampul, wan prɔfɛt we  nem Abakɔk, bin aks Jiova se: “Wetin mek yu de mek a de si we bad bad tin dɛn de apin, ɛn wetin mek yu de wach we dɛn bad tin ya de apin bɔt yu nɔ de du natin? Wetin mek pipul dɛn de tif ɛn fɛt dɛnsɛf, ɛn wetin mek palava ɛn kɔnfyushɔn de apin bifo mi?”—Abakɔk 1:​3, NW.

⁴ Jiova bin vɛks pan Abakɔk fɔ we i aks dɛn kwɛstyɔn dɛn de? Nɔ, i nɔ bin vɛks pan am. Bifo dat, Gɔd mek dɛn put wetin Abakɔk bin tɔk insay in Wɔd di Baybul. Dɔn, Gɔd ɛp am fɔ ɔndastand klia wan wetin mek dɛn tin ya de apin ɛn mek i biliv am mɔ. Jiova want fɔ du di sem tin fɔ yu. Mɛmba se, di Baybul se Gɔd “bisin bɔt una.” (Pita In Fɔs Lɛta 5:​7, NW) Gɔd et we pipul dɛn de du bad ɛn we pipul dɛn de sɔfa. I et dɛn tin ya pas di we aw mɔtalman et dɛn. (Ayzaya 55:​8, 9) Bɔt wetin mek bɔku pipul dɛn de sɔfa na di wɔl?

5. Wetin sɔm bigman dɛn pan Gɔd biznɛs kin se de mek wi sɔfa? Wetin di Baybul se?

⁵ Pipul dɛn kin aks di edman dɛn na di difrɛn difrɛn rilijɔn dɛn wetin mek mɔtalman de sɔfa. Plɛnti tɛm, dɛn kin tɛl dɛn se na so Gɔd want. Dɛn kin tɛl pipul dɛn bak  se Gɔd bin dɔn mak ɔltin we gɛt fɔ apin, ivin di bad bad tin dɛn. Dɛn kin tɔk bak se nɔto ɔltin we Gɔd de du wi go ebul ɔndastand, ɛn dɛn kin se Gɔd de mek pɔsin day so dat di pɔsin go go de wit am na ɛvin. Bɔt as wi bin dɔn lan, Jiova Gɔd nɔ de ɛva mek bad tin apin. Di Baybul se: “Rɔb yu mɔt na grɔn bifo yu se PAPA GƆD go du bad, ɛn rɔb yu mɔt na grɔn bifo yu se di Ɔlmayti go du rɔŋ tin!”—Job 34:​10.

6. Wetin mek pipul dɛn kin tɔk se na Gɔd de mek wi sɔfa?

⁶ Yu no wetin mek pipul dɛn kin tɔk se na Gɔd de mek wi sɔfa? Na bikɔs dɛn fil se na Gɔd de rul di wɔl. Dɛn nɔ no wan impɔtant tin we di Baybul de tich. Wi bin lan bɔt dat na Chapta 3. Wi bin lan se na Setan de rul di wɔl.

7, 8. (a) Aw pipul dɛn de biev lɛk di pɔsin we de rul di wɔl? (b) Mɔtalman nɔ pafɛkt igen ɛn “tin dɛn we wi nɔ no se go apin kin apin.” Aw dɛn tu tin ya kin mek pipul dɛn sɔfa?

⁷ Di Baybul tɛl wi klia wan se na “Setan de rul di ol wɔl.” (Jɔn In Fɔs Lɛta 5:​19) Yu nɔ tink se dis mek sɛns? Pipul dɛn de biev lɛk di pɔsin we “de mek di ol wɔl ful.” (Rɛvɛleshɔn 12:​9) Setan gɛt bad at, i de ful pipul dɛn, ɛn i wikɛd. So di pipul dɛn we de ɔnda am gɛt bad at, dɛn de ful dɛn kɔmpin dɛn, ɛn dɛn wikɛd. Dat na wan tin we mek plɛnti pipul dɛn de sɔfa tide.

⁸ Frɔm we Adam ɛn Iv bin tɔn dɛn bak pan Gɔd, mɔtalman nɔ pafɛkt igen. Dis na ɔda tin we mek pipul dɛn de sɔfa ɔlsay na di wɔl. Frɔm da tɛm de, mɔtalman want fɔ rul in kɔmpin. Dis dɔn mek wɔ de apin, pipul dɛn de trit dɛn kɔmpin dɛn bad ɛn ɔda pipul dɛn de sɔfa. (Ɛkliziastis 4:​1; 8:​9) Di ɔda tin we kin mek pipul dɛn sɔfa na bikɔs “tin dɛn we wi nɔ no se go apin kin apin.” (Rid Ɛkliziastis 9:​11.) Fɔ ɛgzampul, pɔsin kin de waka na strit, dɔn motoka go bang am ɛn i day. Ɔl dis de apin bikɔs nɔto Jiova de rul di wɔl. So, pipul dɛn kin sɔfa bikɔs dɛn de na di rɔng ples di rɔng tɛm.

9. Wetin mek wi biliv se Gɔd gɛt gud rizin we mek i de alaw wi fɔ sɔfa?

 ⁹ Wi gladi fɔ no se nɔto Gɔd de mek wi sɔfa. Nɔto in de mek pipul dɛn de trit dɛn kɔmpin dɛn bad, ɛn nɔto in de mek pipul dɛn de fɛt wɔ. Ɛn nɔto in de mek atkwek ɛn ɔda bad bad tin dɛn de apin. Bɔt wetin mek Jiova de alaw ɔl dɛn bad bad tin ya fɔ apin? If in na di Ɔlmayti, i gɛt di pawa fɔ mek dɛn tin ya lɛf fɔ apin. Bɔt wetin mek i nɔ de yuz in pawa fɔ stɔp dɛn tin ya? Jiova na Gɔd we lɛk mɔtalman, so i mɔs gɛt gud rizin we mek i de alaw mɔtalman fɔ sɔfa.—Jɔn In Fɔs Lɛta 4:​8.

10. Aw Setan bin chalenj Gɔd?

¹⁰ Fɔ lɛ wi no wetin mek Gɔd de alaw mɔtalman fɔ sɔfa, wi fɔ mɛmba aw mɔtalman bigin fɔ sɔfa. We Setan bin mek Adam ɛn Iv du wetin Jiova nɔ want, wan siriɔs tin bin apin. Setan bin chalenj Jiova. Aw i du dis? Setan nɔ bin tɔk se Jiova nɔ gɛt pawa bikɔs insɛf no se Jiova gɛt pawa pas ɔlman. Bɔt i bin tɔk se Jiova nɔ gɛt di rayt fɔ rul. I ivin se Jiova de lay ɛn i nɔ want mek gud tin mit di wan dɛn we i de rul. We i tɔk dis, i bin de tray fɔ tɔk se Gɔd na bad pɔsin ɛn i nɔ fit fɔ rul mɔtalman. (Rid Jɛnɛsis 3:​2-5.) Setan bin tɔk bak se mɔtalman go ɛnjɔy if dɛn rul dɛnsɛf. So Setan bin de tray fɔ tɔk se Jiova nɔ gɛt rayt fɔ rul.

11. Wetin mek Jiova nɔ bin kil Setan ɛn Adam ɛn Iv wantɛm wantɛm?

¹¹ Adam ɛn Iv bin tɔn dɛn bak pan Gɔd. Dɛn bin de tray fɔ se dɛn nɔ want lɛ Jiova rul dɛn ɛn dɛn go ebul fɔ disayd fɔ dɛnsɛf wetin gud ɛn wetin bad. Aw Jiova go sɛtul dis prɔblɛm? Ɛn aw i go ebul mek ɔl di ɔda enjɛl dɛn ɛn mɔtalman no se Setan wit Adam ɛn Iv nɔ kɔrɛkt, ɛn dat na in yon we kɔrɛkt? Sɔm pipul dɛn kin se Gɔd fɔ dɔn kil Setan ɛn Adam ɛn Iv wantɛm wantɛm, ɛn mek ɔda  mɔtalman dɛn. Bɔt Jiova bin dɔn se i want mek Adam ɛn Iv bɔn pikin dɛn te dɛn ful-ɔp di wan ol wɔl ɛn mek dɛn de na Paradays sote go. (Jɛnɛsis 1:​28) Jiova de du wetin i se ɔltɛm. (Ayzaya 55:​10, 11) Apat frɔm dat, if Jiova bin fɔ dɔn kil Setan ɛn Adam ɛn Iv, dat nɔ bin fɔ dɔn sho se na in gɛt di rayt fɔ rul.

12, 13. Gi ɛgzampul fɔ sho wetin mek Jiova dɔn alaw Setan fɔ rul di wɔl. Wetin mek Gɔd dɔn alaw mɔtalman fɔ kɔntrol dɛnsɛf?

¹² Lɛ wi tɔk bɔt wan ɛgzampul. Wan ticha de sho in skulpikin dɛn aw fɔ sɔlv wan tranga matamatiks kwɛstyɔn. Dɔn wan pan di skulpikin dɛn we gɛt sɛns bɔt we nɔ gɛt wan rɛspɛkt fɔ di ticha, tinap ɛn tɔk se di ticha nɔ sabi sɔlv di prɔblɛm. I se in sabi sɔlv di prɔblɛm pas di ticha. Sɔm pan di ɔda skulpikin dɛn bigin tink se wetin dɛn kɔmpin tɔk, na tru, so dɛnsɛf jɔyn am fɔ se di ticha nɔ sabi sɔlv di prɔblɛm. Wetin di ticha go du? Wetin di ɔda skulpikin dɛn go tink, if di ticha tɛl dɛn kɔmpin dɛn fɔ kɔmɔt na in klas? Yu nɔ fil se dɛn go tink se wetin dɛn kɔmpin tɔk na tru? Ɔl di ɔda skulpikin dɛn nɔ go rɛspɛkt di ticha igen. Dɛn go  fil se di ticha de fred lɛ di pikin nɔ kam sɔlv di prɔblɛm di kɔrɛkt we. So yu no wetin di ticha du? I nɔ drɛb dɛn, i alaw di skulpikin fɔ sɔlv di prɔblɛm bifo di klas.

¹³ Jiova dɔn du sɔntin we tan lɛk wetin dis ticha du. Mɛmba se, nɔto Setan wit Adam ɛn Iv nɔmɔ bin de we dɛn chalenj Gɔd. Plɛnti plɛnti enjɛl dɛn bin de wach fɔ si wetin go apin. (Job 38:​7; Rɛvɛleshɔn 5:​11) Di we aw Jiova go sɔlv dis prɔblɛm go mek di enjɛl dɛn ɛn mɔtalman no udat gɛt di rayt fɔ rul. So, wetin Jiova du? I alaw Setan fɔ sho aw i go rul mɔtalman. Gɔd dɔn alaw mɔtalman bak fɔ de ɔnda Setan ɛn rul dɛnsɛf.

14. Wetin ɔlman go no we Jiova dɔn alaw mɔtalman fɔ rul dɛnsɛf?

¹⁴ Di ticha we wi bin tɔk bɔt no se da skulpikin ɛn in kɔmpin dɛn, nɔ sabi sɔlv di prɔblɛm. I no bak se if i gi dɛn chans fɔ sɔlv di prɔblɛm, dat go mek ɔlman na di klas, no udat sabi sɔlv di prɔblɛm. We di skulpikin dɛn nɔ ebul fɔ sɔlv di prɔblɛm, ɔl di ɔda skulpikin dɛn go no se na di ticha nɔmɔ fit fɔ tich di klas. Ɛn if leta di ticha mek ɛnibɔdi we chalenj am kɔmɔt na in klas, di ɔda skulpikin dɛn go no wetin mek i du so. Semweso, Jiova no se di enjɛl dɛn ɛn di mɔtalman dɛn we want fɔ sav am, go no se Setan ɛn di wan dɛn we dɔn fala am nɔ sabi fɔ rul, ɛn mɔtalman nɔ ebul fɔ rul dɛnsɛf. Dɛn go no se wetin wan prɔfɛt we nem Jɛrimaya bin tɔk, na tru. I bin se: “PAPA GƆD, a no se wetin mɔtalman de du nɔ de nain yon an, ɛn mɔtalman nɔ ebul kɔntrol in yon layf ɔ dayrɛkt in stɛp dem.”—Jɛrimaya 10:​23.

15, 16. (a) Wetin mek Jiova dɔn alaw mɔtalman fɔ sɔfa te naw? (b) Wetin mek Jiova nɔ de stɔp di bad bad tin dɛn we de apin?

¹⁵ Wetin mek Jiova dɔn alaw mɔtalman fɔ sɔfa te naw? Ɛn wetin mek i nɔ de stɔp di bad bad tin dɛn we de apin?  Fɔ no di ansa, lɛ wi tɔk bɔt tu tin dɛn we da ticha nɔ go ɛva du. Fɔs, i nɔ go stɔp di skulpikin we i de sɔlv di prɔblɛm. Sɛkɔn, i nɔ go ɛp di skulpikin we i de sɔlv di prɔblɛm. Semweso, lɛ wi tɔk bɔt tu tin dɛn we Jiova nɔ go ɛva du. Fɔs, i nɔ go stɔp Setan ɛn di wan dɛn we de fala am we dɛn de tray fɔ sho se na dɛn sabi rul. I fayn we Jiova gi Setan tɛm fɔ sho if i sabi rul. Frɔm di tɛm we Adam ɛn Iv dɛn tɔn dɛn bak pan Gɔd, mɔtalman dɔn tray ɔlkayn gɔvmɛnt fɔ rul dɛnsɛf. Pan ɔl we dɛn dɔn ebul fɔ du bɔku fayn fayn tin dɛn, bɔt stil pipul dɛn nɔ de du di rayt tin, pipul dɛn po, dɛn de fɛt wɔ ɛn du bɔku ɔda bad bad tin dɛn. Ɔl dɛn tin ya de sho se mɔtalman nɔ ebul fɔ rul dɛnsɛf.

¹⁶ Sɛkɔn, Jiova nɔ de ɛp Setan we i de rul di wɔl. If Gɔd bin de stɔp dɛn bad bad tin dɛn we de apin, yu nɔ tink se i bin fɔ tan lɛk se na tru Setan bin tɔk? Yu nɔ tink bak se Gɔd bin fɔ mek pipul dɛn biliv se mɔtalman ebul fɔ rul dɛnsɛf ɛn no bad tin nɔ go apin to dɛn? Na dat Setan want lɛ pipul dɛn tink. Bɔt dat nɔto tru. Jiova nɔ go ɛva sɔpɔt pipul dɛn we de lay bikɔs “Gɔd nɔ de lay.”—Di Ibru Pipul Dɛn 6:​18.

17, 18. Wetin Jiova go du bɔt di bad bad tin dɛn we dɔn de apin to mɔtalman?

¹⁷ Wetin Jiova go du bɔt ɔl di bad bad tin dɛn we Setan dɔn du ɔl dɛn tɛm ya? I go fayn mek wi mɛmba se Jiova gɛt pawa pas ɔlman. So, i ebul fɔ pul ɔl di bad bad tin dɛn we de mek mɔtalman sɔfa, ɛn na dat i go du. Wi bin dɔn lan se Jiova go mek dis wɔl bi Paradays pan ɔl we mɔtalman dɔn pwɛl am. Da tɛm de, di sɔfa we sin de mek wi sɔfa nɔ go de igen bikɔs wi biliv se Jizɔs bin dɔn kam day fɔ wi. Ɛn di sɔfa we day de mek wi sɔfa nɔ go de igen bikɔs di wan dɛn we dɔn day go gɛt layf bak. So Gɔd go yuz Jizɔs “fɔ pwɛl Setan in wok.” (Jɔn In Fɔs Lɛta 3:​8)  Jiova go du ɔl dɛn tin ya di rayt tɛm. Wi gladi we i nɔ bin dɔn kil Setan ɛn di wan dɛn we de biɛn am, bikɔs di bia we i de bia wit mɔtalman, dɔn gi wi di chans fɔ ebul lan bɔt am ɛn sav am. (Rid Pita In Sɛkɛn Lɛta 3:​9, 10.) Rayt naw, Gɔd de fɛn pipul dɛn we rili want fɔ sav am, ɛn i de ɛp dɛn fɔ bia ɛnitin we de mek dɛn sɔfa.—Jɔn 4:​23; Fɔs Lɛta Fɔ Kɔrint 10:​13.

¹⁸ Bɔt sɔm pipul dɛn go se, ‘If Gɔd bin fɔ dɔn mek Adam ɛn Iv wan kayn we we dɛn nɔ go chalenj am, ɔl dɛn bad bad tin ya nɔ bin fɔ dɔn apin.’ Fɔ no if dat na tru, i go fayn mek wi tink bɔt wan wɔndaful gift we Jiova gi wi.

19. Wetin na di wɔndaful gift we Jiova gi wi? Wetin mek wi fɔ ol da gift de wit tu an?

¹⁹ Insay Chapta 5, wi bin lan se we Gɔd mek mɔtalman, i mek dɛn fri fɔ disayd fɔ dɛnsɛf wetin dɛn want fɔ du. Yu nɔ tink se na fayn gift dis we Jiova gi wi? Ɔl di animal dɛn, nɔ gɛt dis gift. So dɛn de du ɛnitin we dɛn fil fɔ du. We mɔtalman mek mashin, na wetin dɛn mek am fɔ du na in nɔmɔ i de du. Yu tink se i bin fɔ fayn if na so Gɔd bin mek wi? Nɔ, i nɔ bin fɔ fayn atɔl. So wi gladi we Gɔd nɔ mek wi da we de bikɔs wi ebul fɔ disayd fɔ wisɛf uskayn pɔsin wi want fɔ bi, wetin fɔ du wit wi layf, uskayn pɔsin fɔ bi wi padi, ɛn bɔku ɔda tin dɛn. Wi gladi we wi ebul fɔ du ɔl dɛn tin ya fɔ wisɛf. Ɛn na dat Gɔd want wi fɔ ɛnjɔy.

20, 21. Aw wi go yuz dis gift di bɛst we?

 ²⁰ Jiova nɔ lɛk we pɔsin de wɔship am bikɔs dɛn fos am. (Sɛkɛn Lɛta Fɔ Kɔrint 9:​7) I jɔs tan lɛk mama ɛn pikin. Wetin yu tink se di mama go lɛk? Na we di pikin de tɛl am se, “Mama, tɛnki” bikɔs dɛn tɛl am fɔ tɛl tɛnki, ɔ bikɔs i tɔk frɔm in at? So, i fayn fɔ tink bɔt aw yu go yuz dis gift we Jiova gi yu. Setan wit Adam ɛn Iv nɔ bin yuz dis gift fayn. Dɛn lɛf Jiova Gɔd. Wetin yu go du?

²¹ Yu gɛt di chans fɔ yuz dis fayn fayn gift di bɛst we. Yu fɔ jɔyn ɔl di wan dɛn we dɔn sho se na Jiova gɛt di rayt fɔ rul di wan ol wɔl. Dɛn de mek Gɔd gladi bikɔs dɛn de sho klia wan se Setan na layman ɛn i nɔ gɛt di rayt fɔ rul. (Prɔvabs 27:​11) Yusɛf go ebul du dat if yu liv yu layf di we aw Gɔd want. Na dat wi go tɔk bɔt na di ɔda chapta.