MƆ TIN DƐN FƆ NO
Wetin Na Shiol ɛn Edis?
INSAY di fɔs fɔs langwej dɛn we dɛn bin yuz fɔ rayt di Baybul, dɛn bin yuz di Ibru wɔd shi·olʹ ɛn di Grik wɔd we na aʹdiz pas 70 tɛm. Dɛn tu wɔd ya min di sem tin. Na we dɛn kin tɔk bɔt day, na in dɛn kin yuz dɛn tu wɔd ya. Insay sɔm Baybul dɛn, dɛn translet dɛn wɔd ya as “grev,” “ɛl,” ɔ “ol.” Bɔt bɔku langwej dɛn nɔ gɛt wɔd we min di sem tin wit dɛn Ibru ɛn Grik wɔd ya. Na dat mek di New World Translation yuz di wɔd “Shiol” ɛn “Ediz” na futnot. Wetin dɛn tu wɔd ya rili min? Lɛ wi si aw dɛn yuz dɛn insay difrɛn pat dɛn na di Baybul.
Ɛkliziastis 9:10 tɔk se: “Yu nɔ go ebul wok, plan sɔntin, ɔ gɛt sɛns na di Grev, di ples usay yu de go.” * Wetin Shiol min? Na wan patikyula ples we dɛn de bɛr pɔsin? Nɔ. We di Baybul de tɔk bɔt patikyula ples we dɛn bɛr pɔsin ɔ grev, na ɔda Ibru ɛn Grik wɔd dɛn i de yuz, nɔto shi·olʹ ɛn aʹdiz. (Jɛnɛsis 23:7-9; Matyu 28:1, Krio Fɔs Oli Baybul) Apat frɔm dat, di Baybul nɔ de yuz di wɔd “Shiol” we i de tɔk bɔt ples we dɛn bɛr bɔku pipul dɛn, lɛk famili grev ɔ grev usay dɛn kin bɛr bɔku pipul dɛn togɛda afta wɔ.—Jɛnɛsis 49:30, 31.
Usay na “Shiol”? Di tin we di Baybul tɔk bɔt “Shiol” ɔ “Ediz” mek wi no se na ples we big pas usay dɛn kin bɛr bɔku pipul dɛn. Fɔ ɛgzampul Ayzaya 5:14 tɔk se di Grev ɔ Shiol “big ɛn dɔn opin in mɔt big big wan.” Pan ɔl we bɔku pipul dɛn we dɔn day, dɔn go insay Shiol, i stil want mek mɔ pipul dɛn kam insay am. (Prɔvabs 30:15, 16) Di grevyad we dɛn de bɛr pɔsin, nɔ go ebul fɔ tek bɔku bɔku pipul dɛn togɛda, bɔt di Baybul se ‘Di Grev nɔ de satisfay.’ (Prɔvabs 27:20) Dat min se Shiol nɔ de ful-ɔp. Ɔltɛm i gɛt ples fɔ mɔ pipul dɛn. So wi dɔn si se Shiol ɔ Ediz nɔto ples we de sɔnsay. Bɔt we di Baybul de tɔk bɔt Shiol, i kin yuz am lɛk se na di ples we di wan dɛn we dɔn day, de. We pɔsin day, i jɔs tan lɛk se na dis ples i dɔn go.
Di Baybul tɔk se di wan dɛn we dɔn day, go gɛt layf bak. Dis de ɛp wi fɔ no mɔ bɔt wetin “Shiol” ɛn “Ediz” min. Di wan dɛn we dɔn day we de na Shiol ɔ Ediz, go gɛt layf bak. * (Job 14:13; Di Apɔsul Dɛn Wok [Akt] 2:31; Rɛvɛleshɔn 20:13) Gɔd in Wɔd sho wi se di pipul dɛn we de na Shiol nɔto di wan dɛn nɔmɔ we bin de sav Gɔd, bɔt ivin di wan dɛn we nɔ bin de sav am. (Jɛnɛsis 37:35; Sam 55:15, Krio Fɔs Oli Baybul) Na in mek di Baybul tɔk bak se “Gɔd go mek ɔlman, gud ɔ bad, rayz frɔm dɛn grev.”—Di Apɔsul Dɛn Wok [Akt] 24:15, Krio Fɔs Oli Baybul).
^ par. 4 Pas nɔmɔ sɔntin rayt nia de o, bɔt ɔl di skripchɔ dɛn we wi yuz naya, kɔmɔt na di New World Translation of the Holy Scriptures.
^ par. 6 Di wan dɛn we dɔn day we nɔ go gɛt layf bak, nɔ de na Shiol ɔ Ediz. Na Gɛɛna dɛn de. Gɛɛna nɔto tru tru ples, lɛk aw Shiol ɛn Ediz nɔto tru tru ples.
