If yu want bi Gɔd in padi, yu fɔ de na rilijɔn we de du wetin Gɔd want. Jizɔs bin se “pipul [go] ebul pre to Gɔd . . . di rayt we” ɛn go wɔship Gɔd “fɔ tru.” (Jɔn 4:23, 24) Na wan gren rayt we de fɔ wɔship Gɔd. (Lɛta Fɔ Ɛfisɔs 4:4-6) Tru rilijɔn go mek wi gɛt layf we go de sote go, ɛn lay lay rilijɔn go mek wi day.—Lyuk 13:24.

Yu go no tru rilijɔn we yu wach wetin di pipul dɛn insay de de du. Bikɔs Jiova gud, di wan dɛn we de wɔship am di rayt we fɔ bi gud pipul dɛn. Jɛs lɛk aw gud ɔrinch tik de bia fayn ɔrinch, na so gud pipul dɛn de na di tru rilijɔn.—Matyu 7:15-20.

Jiova in padi dɛn gɛt dip rɛspɛkt fɔ di Baybul. Dɛn no se di Baybul na frɔm Gɔd i kɔmɔt. Dɛn de yuz wetin di Baybul se fɔ no aw fɔ liv dɛn layf, sɔlv dɛn prɔblɛm dɛn ɛn ɛp dɛn lan bɔt Gɔd. (Sɛkɛn Lɛta To Timoti 3:16) Dɛn de tray fɔ du wetin dɛn de prich.

 Jiova in padi dɛn de sho se dɛn lɛk dɛn kɔmpin dɛn. Fɔ sho se Jizɔs lɛk pipul dɛn, i bin de tich dɛn bɔt Gɔd ɛn bin de mɛn di wan dɛn we sik. Di wan dɛn we de du wetin di tru rilijɔn de tich de sho se dɛn lɛk ɔda pipul dɛn. Jɛs lɛk Jizɔs, dɛn nɔ de trit pipul dɛn bad bikɔs dɛn po ɔ bikɔs ɔf dɛn trayb. Jizɔs bin se pipul dɛn go sho se dɛn de falamakata am, we dɛn lɛk dɛn kɔmpin dɛn.—Jɔn 13:35.

Gɔd in padi dɛn de rɛspɛkt Gɔd in nem, Jiova. If sɔmbɔdi se i nɔ de kɔl yu nem, da pɔsin de go bi yu tayt padi? Nɔ-o! We wi gɛt padi, wi de kɔl in nem ɛn tɔk gud tin bɔt am to ɔda pipul dɛn. So dɛn wan we want bi Gɔd in padi, fɔ de kɔl in nem ɛn tɔk bɔt am to ɔda pipul dɛn. Na dis Jiova want mek wi du.—Matyu 6:9; Lɛta Fɔ Rom 10:13, 14.

Jɛs lɛk Jizɔs, Gɔd in padi dɛn de tich pipul dɛn bɔt Gɔd in Kiŋdɔm. Gɔd in Kiŋdɔm na gɔvmɛnt we de na ɛvin, we go mek di wɔl Paradays. Gɔd in padi dɛn de tɔk bɔt di gud nyus bɔt Gɔd in Kiŋdɔm to ɔda pipul dɛn.—Matyu 24:14.

Jiova Witnɛs dɛn de tray fɔ bi Gɔd in padi. Dɛn rɛspɛkt di Baybul ɛn dɛn lɛk dɛn kɔmpin dɛn. Dɛn de yuz ɛn rɛspɛkt Gɔd in nem. Dɛn de tich ɔda pipul dɛn bɔt Gɔd in Kiŋdɔm. Tide, Jiova Witnɛs dɛn de du wetin di tru rilijɔn fɔ du na di wɔl.