Yu go lan bɔt Jiova we yu rid di Baybul. Trade trade, Gɔd bin pik pipul dɛn fɔ rayt wetin i want fɔ mɔtalman. Dɛn tin ya we dɛn bin rayt, na di Baybul. Wi de lan bɔt Gɔd tide we wi rid di Baybul. Bikɔs na Jiova in mɛsej de insay di Baybul, na dat mek dɛn kɔl am Gɔd in Wɔd. Wi fɔ biliv wetin di Baybul se bikɔs “Gɔd nɔ de lay.” (Di Ibru Pipul Dɛn 6:18) Na tru de insay Gɔd in Wɔd.—Jɔn 17:17.

Di Baybul na wan pan di fayn fayn tin dɛn we Gɔd dɔn gi wi. I tan lɛk lɛta we wan gud papa rayt to in pikin. I de tɛl wi bɔt aw Gɔd prɔmis fɔ mek di wɔl wan fayn fayn ples fɔ de—Paradays. I de tɛl wi bɔt wetin Gɔd bin dɔn du trade, wetin i de du naw, ɛn wetin i gɛt fɔ du bambay fɔ in pikin dɛn we de yɛri in wɔd. I de ɛp wi we wi gɛt prɔblɛm ɛn sho wi aw fɔ gɛt gladi at.—Sɛkɛn Lɛta To Timoti 3:16, 17.

 Jiova Witnɛs dɛn na Gɔd in padi dɛn; dɛn go ɛp yu ɔndastand wetin di Baybul de tich. Jɛs tɛl dɛn se yu want stɔdi di Baybul. Yu nɔ go pe dɛn natin. (Matyu 10:8) Pantap dat, yu kin ivin go dɛn mitin. Dɛn kin gɛt dɛn mitin ya na di ples we dɛn de wɔship, we dɛn kɔl Kiŋdɔm Ɔl. If yu go dɛn mitin, yu go lan bɔt Gɔd kwik kwik wan.

Yu kin lan bɔt Gɔd frɔm di tin dɛn we i dɔn mek. Ɛgzampul, di Baybul se: “Na Gɔd mek dis wɔl, di klawd [ɛvin], di wata, ɛn ɔltin we de na di wɔl.” (Di Apɔsul Dɛn Wok 14:15) We Jiova bin mek di ɛvin, i mek di san. Wetin dis tɛl wi bɔt Gɔd? I de tɛl wi se, Jiova gɛt bɔku pawa. Na in nɔmɔ ebul mek sɔmtin we pawaful lɛk di san. I de tɛl wi bak se Jiova gɛt sɛns, bikɔs na sɛns i tek mek di san we de kɔmɔt ɔltɛm, gi wi layt ɛn mek di ples wam.

Di tin dɛn we Jiova mek de sho se i lɛk wi. Tink bɔt di difrɛn kayn frut dɛn we de na di wɔl. Jiova bin fɔ dɔn mek jɛs wan kayn frut fɔ wi—ɔ if i bin want, i nɔ fɔ dɔn mek natin. Bɔt, Jiova gi wi difrɛn kayn frut dɛn we gɛt difrɛn tes, kɔla ɛn sayz. Dis de sho wi se, Jiova Gɔd nɔ jɛs lɛk wi, bɔt i gɛt fri an ɛn i de tink bɔt wi ɛn de du fayn tin dɛn fɔ wi.—Sam 104:24.