Paradays nɔ go tan lɛk di wɔl we wi de naw. Gɔd nɔ bin ɛva want mek trɔbul, pen, pwɛl at ɛn tin dɛn we de mek wi sɔfa de na di wɔl. Tumara bambay, Gɔd go mek di wɔl Paradays. Aw Paradays go tan lɛk? Lɛ wi si wetin di Baybul se:

Gud pipul dɛn. Gɔd in padi dɛn go de na Paradays. Dɛn go de du gud tin to dɛnsɛf. Dɛn go liv di rayt we we Gɔd want.—Prɔvabs 2:21.

Bɔku tin fɔ it. Angri nɔ go de na Paradays. Di Baybul se: “Lɛ it gro ɔlsay na di land.”—Sam 72:16.

Fayn os dɛn ɛn wok we wi go ɛnjɔy. Insay Paradays na dis wɔl, ɔl famili go gɛt dɛn yon os. Ɔlman go du wok we go mek dɛn gladi.—Ayzaya 65:21-23, NW.

Kolat go de na di wan ol wɔl. Pipul dɛn nɔ go fɛt ɛn day na wa igen. Gɔd in Wɔd se:  “[Gɔd] de mek ɔl udat de fɛt na [di] wɔl, lɛf fɔ fɛt.”—Sam 46:8, 9.

Wɛl bɔdi. Di Baybul prɔmis wi se nɔbɔdi nɔ go sik na Paradays. Di wan dɛn we blɛn go si, di wan dɛn we nɔ de tɔk go tɔk, di wan dɛn we nɔ de waka go waka ɛn di wan dɛn we dɛf go yɛri.—Ayzaya 35:5, 6, NW.

Pen, pwɛl at ɛn day go dɔn. Gɔd in Wɔd se: “I go mek dɛn nɔ kray igen; dɛn nɔ go day igen; ebi at ɛn waala nɔ go de igen; nɔbɔdi nɔ go kray igen, bikɔs dɛn tin we bin de fɔs nɔ go de igen.”—Rɛvɛleshɔn 21:4.

Bad pipul dɛn nɔ go de igen. Jiova prɔmis wi se: “As fɔ di bad wan dɛn, Gɔd go pul dɛn kɔmɔt na di land, ɛn dɛn wan we nɔ bɛtɛ i go rut dɛn.”—Prɔvabs 2:22.

Pipul dɛn go lɛk ɛn rɛspɛkt dɛn kɔmpin. Tin we nɔ rayt, gridi pipul dɛn, pipul dɛn we gɛt bad at ɛn we de trit dɛn kɔmpin dɛn bad nɔ go de igen. Pipul dɛn go gɛt wanwɔd, ɛn dɛn go de du wetin rayt na Gɔd in yay.—Pita In Sɛkɛn Lɛta 3:13.