Setan want mek yu put an pan juju biznɛs. Bɔku pipul de pul sara to dɛn wan dɛn we dɔn day, fɔ mek bad tin nɔ apin to dɛn. Dɛn de du dis bikɔs dɛn de fred di dayman dɛn pawa. Dɛn de wɛr sara riŋ ɔ tay sɛbɛ. Dɛn de drink ɛn rɔb “mɛrɛsin” na dɛn bɔdi we dɛn fil se gɛt juju pawa. Sɔm pipul de ayd juju tin dɛn na dɛn os ɔ bɛr dɛn na grɔn. Dɛn fil se dɛn tin ya go ɛp dɛn fɔ mek dɛn biznɛs go bifo, mek dɛn pas dɛn skul ɛgzam, ɔ mek dɛn man ɔ uman lɛk dɛn.

Fɔ mek Setan nɔ ebul yu, na fɔ mek Jiova yu padi. Jiova Gɔd ɛn in enjɛl dɛn gɛt pawa fawe pas Setan ɛn in dɛbul dɛn. (Jems 2:19; Rɛvɛleshɔn 12:9) Jiova want sho in pawa fɔ in padi dɛn—di wan dɛn we lɛk am fɔ tru.—Pita In Fɔs Lɛta 3:12.

Gɔd in Wɔd se: “Dɛn wan we ol juju . . . nɔ go mas fut insay [Paradays].” Jiova nɔ lɛk juju ɛn wich bikɔs dɛn tin ya de mek pɔsin de ɔnda Setan in pawa.—Rɛvɛleshɔn 22:15.