Setan ɛn in dɛbul dɛn nɔ want mek yu wɔship Gɔd. If dɛn gɛt chans, dɛn want mek ɔlman lɛf fɔ wɔship Gɔd. Aw dɛn de du dis? Wan we na lay lay rilijɔn. (Sɛkɛn Lɛta Fɔ Kɔrint 11:13-15) Lay lay rilijɔn nɔ de tich di tru frɔm di Baybul. Lay lay rilijɔn tan lɛk fek mɔni—i fiba tru tru mɔni, bɔt i nɔ gɛt wan valyu. I go mek yu gɛt bɔku trɔbul.

Lay lay we de insay rilijɔn nɔ go ɛva mek Jiova gladi. In na Gɔd we lɛk tru. We Jizɔs bin de na di wɔl, sɔm pipul we se dɛn no bɔt Gɔd bin want kil am. Dɛn bin tink se di we aw dɛn de wɔship Gɔd na di rayt we. Dɛn se: “Na Gɔd wan gren na wi papa.” Jizɔs bin gri? Nɔ, i nɔ bin gri! I tɛl dɛn se: “Na Setan na una papa.” (Jɔn 8:41, 44) Tide, bɔku pipul tink se na Gɔd dɛn de wɔship, bɔt na Setan ɛn in dɛbul dɛn, dɛn de wɔship!—Fɔs Lɛta Fɔ Kɔrint 10:20.

 Jɛs lɛk aw rɔtin tik de bia rɔtin frut, na so pipul dɛn we de insay lay lay rilijɔn de du bad tin dɛn. Trɔbul bɔku na di wɔl tide, bikɔs pipul dɛn de du bad tin dɛn. Tide wi de si mami ɛn dadi biznɛs, fɛt, tif, kil, rep ɛn pipul dɛn de trit dɛn kɔmpin dɛn bad. Pipul dɛn we de du dɛn bad tin ya gɛt rilijɔn, bɔt dɛn rilijɔn nɔ de ɛp dɛn fɔ du wetin gud. Dɛn nɔ go bi Gɔd in padi if dɛn nɔ lɛf fɔ du wetin bad.—Matyu 7:17, 18.

Lay lay rilijɔn de tich pipul dɛn fɔ pre to dɛn tin we mɔtalman de mek. Gɔd se wi nɔ fɔ pre to dɛn tin we mɔtalman de mek. Dis mek sɛns. Yu go lɛk we pɔsin de tɔk to yu pikchɔ bɔt nɔ de ɛva tɔk to yu? Da pɔsin de go bi yu tru padi? Nɔ-o, da pɔsin de nɔ go bi yu padi. Jiova want mek pipul dɛn tɔk to am, nɔto to dɛn tin we mɔtalman de mek ɔ pikchɔ we nɔ gɛt layf.—Fɔs Lɛta Fɔ Kɔrint 6:9, 10.

Lay lay rilijɔn de tich se i nɔ bad fɔ fɛt wa ɛn kil ɔda pipul dɛn. Jizɔs bin se, Gɔd in padi dɛn fɔ lɛk dɛn kɔmpin dɛn. Wi nɔ de kil pipul dɛn we wi lɛk. (Jɔn 13:35) I nɔ ivin fayn fɔ kil bad pipul dɛn. We Jizɔs in ɛnimi dɛn bin kam fɔ arɛst am, i nɔ bin mek in lanin bɔy dɛn fɛt fɔ am.—Matyu 26:51, 52.

Lay lay rilijɔn de tich se wikɛd pipul dɛn go sɔfa na ɛl faya. Bɔt di Baybul de tich se na sin de mek wi day. (Lɛta Fɔ Rom 6:23) Jiova na Gɔd we gɛt lɔv. Yu fil se papa Gɔd we lɛk wi, go put pipul dɛn na ɛl faya? Nɔ-o! Na wan gren rilijɔn go de insay Paradays, di wan we de du wetin Jiova want. (Rɛvɛleshɔn 15:4) Ɔl Setan in lay lay rilijɔn dɛn nɔ go de igen.