Tu pipul go bi tayt padi, we dɛn lɛk dɛnsɛf. As yu de lan bɔt Jiova, na di mɔ yu go lɛk am. As yu de lɛk Gɔd, na di mɔ yu go want sav am. Dis go mek yu want falamakata Jizɔs Krays. (Matyu 28:19) Jiova Witnɛs dɛn na wan api famili. We yu jɔyn dɛn, yu go ɛnjɔy padi biznɛs wit Gɔd sote go. Wetin yu fɔ du?

Yu fɔ sho se yu lɛk Gɔd, we yu obe in lɔ dɛn. “We wi lɛk Gɔd wi de du ɔl wetin i tɛl wi fɔ du. Wetin i tɛl wi fɔ du nɔ tranga fɔ wi.”—Jɔn In Fɔs Lɛta 5:3.

Du wetin yu de lan. Jizɔs bin tɛl wi wan stori bɔt dis. Wan man we gɛt sɛns bil in os pan rɔk. Di ɔda man we nɔ gɛt sɛns bil in os pan sansan. We ebi ren ɛn ebi briz kam, natin nɔ du di os we de pan rɔk, bɔt di os we dɛn bil pan sansan fɔdɔm. Jizɔs bin se di wan dɛn we yɛri ɛn du wetin i de tich, tan lɛk di man we bil in os pan rɔk. Bɔt di wan dɛn we yɛri wetin i de tich ɛn nɔ du am, tan lɛk di man we bil in os pan sansan. Uswan pan dɛn tu man ya yu want bi?—Matyu 7:24-27.

 Gi yu layf to Gɔd. Yu go du dis we yu pre to Jiova ɛn tɛl am se yu dɔn rɛdi fɔ du wetin i want sote go. We yu de du wetin Gɔd want, dis de sho se yu de falamakata Jizɔs Krays.—Matyu 11:29.

Baptayz. ‘Mek dɛn baptayz yu, ɛn pre to Gɔd ɛn i go pul yu pan di bad tin dɛn we yu de du.’—Di Apɔsul Dɛn Wok 22:16.

Put ɔl yu at pan Gɔd biznɛs. “Ɛnitin we una de du una fɔ du am wit ɔl una at lɛkɛ se na [Jiova] una de du am fɔ ɛn nɔto fɔ mɔtalman.”—Lɛta Fɔ Kɔlɔse 3:23.