Di bad tin dɛn we de apin tide na di wɔl, de sho se Paradays de nia. Di Baybul bin se tɛm go kam we bad bad tin dɛn go apin bifo Paradays kam. Wi de na da tɛm de naw! Dis na sɔm pan di tin dɛn we di Baybul bin se go apin:

Ebi Wa. “Wan kɔntri go fɛt ɔda kɔntri; wan neshɔn go fɛt ɔda neshɔn.” (Matyu 24:7) Dis tin we dɛn bin dɔn tɔk dɔn bi. Frɔm 1914 tu big wa dɛn dɔn bi na di wɔl ɛn wi stil de si smɔl wa dɛn. Bɔku pipul dɔn day na dɛn wa ya.

Sik go de ɔlsay. “Dɛn sik we de prɛd go de ɔlsay.” (Lyuk 21:11) Dis dɔn bi? Yɛs. Kansa, at kɔmplen, dray kɔf, maleria, AIDS, ɛn ɔda sik dɛn dɔn kil bɔku pipul.

Tin fɔ it nɔ go de. Ɔlsay na di wɔl, bɔku pipul nɔ gɛt bɛtɛ tin fɔ it. Angri de mek bɔku pipul de day ɛvri ia. Dis na ɔda sayn we de sho se Paradays de nia. Di Baybul se: “Natin nɔ go de fɔ it.”—Mak 13:8.

 Di grɔn go trimbul. “Di grɔn go trimbul plɛnti say.” (Matyu 24:7) Dis sɛf dɔn bi na wi yon tɛm. Bɔku pipul dɔn day we di grɔn kin trimbul frɔm 1914.

Wikɛd pipul. Pipul dɛn go lɛk mɔni ɛn go de “mɛmba dɛnsɛf nɔmɔ.” Dɛn go “lɛk fɔ ɛnjɔy dɛnsɛf, dɛn nɔ go lɛk Gɔd.” Pikin dɛn “nɔ go de yɛri dɛn mami ɛn dadi wɔd.” (Sɛkɛn Lɛta To Timoti 3:1-5) Yu nɔ gri se na so bɔku pipul tan tide? Dɛn nɔ gɛt wan rɛspkɛt fɔ Gɔd, ɛn dɛn de kɔz trɔbul fɔ di wan dɛn we de tray fɔ lan bɔt Gɔd.

Pipul dɛn we de brok lɔ. “Bad go plɛnti mɔ ɛn mɔ.” (Matyu 24:12) Yu go gri se pipul dɛn de brok lɔ naw pas aw dɛn bin de brok lɔ trade. Pipul dɛn ɔlsay de fred mek dɛn nɔ tif dɛn, kruk dɛn ɔ du dɛn bad.

Ɔl dɛn tin ya, sho se Gɔd in Kiŋdɔm dɔn kam nia. Di Baybul se: “Wɛn una si dɛn tin we a dɔn tɔk bɔt so de bi, una go no se di tɛm we Gɔd go rul, de kam.” (Lyuk 21:31) Wetin na Gɔd in Kiŋdɔm? Na Gɔd in gɔvmɛnt we de na ɛvin, we go briŋ Paradays na dis wɔl. Gɔd in Kiŋdɔm go kam pul mɔtalman gɔvmɛnt dɛn ɛn briŋ in yon gɔvmɛnt.—Sam 110:5.