Jiova nɔ go alaw bad pipul dɛn fɔ pwɛl Paradays. Na in padi dɛn nɔmɔ go de de. Wetin go apin to bad pipul dɛn? Fɔ no di ansa, lɛ wi tɔk smɔl bɔt Noa in stori. Noa bin de trade trade. Na bin gud man we bin de tray tranga wan fɔ du wetin Jiova want ɔltɛm. Bɔt di ɔda pipul dɛn bin de du bad tin dɛn. So Jiova bin tɛl Noa se, I go kam wit ebi ren, we go pul ɔl dɛn wikɛd pipul. I bin tɛl Noa fɔ bil wan big bot fɔ mek in ɛn in fambul dɛn nɔ go day we di Ebi Ren go kam.—Jɛnɛsis 6:9-18, NW.

Noa ɛn in fambul dɛn bin bil di big bot. Noa bin wɔn di pipul dɛn se Ebi Ren gɛt fɔ kam, bɔt dɛn nɔ bin lisin to am. Dɛn bin stil de du bad tin dɛn. Afta Noa bin dɔn bil di big bot, i kɛr animal dɛn insay di big bot. We in ɛn in fambul dɛn go insay di big bot, Jiova mek ebi briz ɛn ren kam, ɛn di ren bin kam fɔ 40 dez ɛn 40 nɛt. Di wata bin kɔba di wan ol wɔl.—Jɛnɛsis 7:7-12, NW.

 Di wikɛd pipul dɛn bin day, bɔt Noa ɛn in fambul dɛn bin sev. Jiova mek natin nɔ du dɛn we di Ebi Ren bin de kam fɔ pul di wikɛd pipul dɛn. (Di Ibru Pipul Dɛn 11:7) Di Baybul se tɛm gɛt fɔ kam bak we Jiova go pul di wan dɛn we nɔ want du wetin rayt. Gud pipul dɛn nɔ go day. Dɛn go de na Paradays na dis wɔl sote go.—Pita In Sɛkɛn Lɛta 2:5, 6, 9.

Tide bɔku pipul de du bad tin. Trɔbul bɔku na di wɔl. Jiova de sɛn in Witnɛs dɛn igen ɛn igen fɔ wɔn pipul dɛn, bɔt bɔku nɔ want lisin Jiova in wɔd. Dɛn nɔ want chenj dɛn we. Dɛn nɔ want tek wetin Gɔd se rayt ɔ rɔng. Wetin go apin to dɛn pipul ya? Dɛn go ɛva chenj? Bɔku nɔ go ɛva chenj. Tɛm de kam we wikɛd pipul dɛn go day ɛn dɛn nɔ go ɛva de igen.—Sam 92:7.

Di wɔl nɔ go pwɛl; i go tɔn Paradays. Di wan dɛn we go bi Gɔd in padi go de na Paradays sote go na dis wɔl.—Sam 37:29.