Gɔd in men ɛnimi na Setan. In na spirit pɔsin we bin tɔn agens Jiova. Setan stil de fɛt agens Gɔd ɛn de kɔz bɔku trɔbul fɔ mɔtalman. Setan bad, i de lay ɛn na pɔsin we de kil.—Jɔn 8:44.

Ɔda spirit pɔsin dɛn bin jɔyn Setan fɔ tɔn agens Gɔd. Di Baybul kɔl dɛn dɛbul. Jɛs lɛk Setan, dɛn dɛbul ya na mɔtalman ɛnimi dɛn. Dɛn lɛk fɔ du bad tin to pipul dɛn. (Matyu 9:32, 33; 12:22) Jiova go pwɛl Setan ɛn in dɛbul dɛn kpatakpata. Na smɔl tɛm nɔmɔ dɛn gɛt fɔ kɔz trɔbul fɔ mɔtalman.—Rɛvɛleshɔn 12:12.

If yu want bi Gɔd in padi, yu nɔ fɔ du wetin Setan want mek yu du. Setan ɛn in dɛbul dɛn et Jiova. Dɛn na Gɔd in ɛnimi, ɛn dɛn want mek yusɛf bi Gɔd in ɛnimi. Yu fɔ pik udat yu want mek gladi—Setan ɔ Jiova. If yu want layf we go de sote go, na fɔ du wetin Gɔd want mek yu du. Setan gɛt bɔku trik ɛn kɔnikɔni we fɔ mek mɔtalman ful. I dɔn mek bɔku pipul ful.—Rɛvɛleshɔn 12:9.