Day na we pɔsin nɔ gɛt layf. Day tan lɛk we pɔsin de pan dip slip. (Jɔn 11:11-14) We pɔsin de slip, i nɔ de yɛri, i nɔ de si, ɛn i nɔ de tink bɔt natin. Lay lay rilijɔn de tich se we pɔsin day, in spirit de kɔmɔt ɛn go de wit dɛn wan dɛn we bin dɔn day. Nɔto dis di Baybul de tich.

Di wan dɛn we dɔn day nɔ ebul ɛp wi ɔ du wi bad. Sɔm pipul fil se we dɛn pas sɛrimɔni ɔ pul sara, dat go mek di wan dɛn we dɔn day gladi fɔ dɛn. Dis nɔ fayn na Gɔd in yay bikɔs na wan pan Setan in lay dɛn. Dɛn tin dɛn ya nɔ de mek dayman dɛn gladi bikɔs dɛn nɔ gɛt layf. Wi nɔ fɔ fred ɔ wɔship di wan dɛn we dɔn day. Na Gɔd nɔmɔ wi fɔ wɔship. —Matyu 4:10.

Di wan dɛn we dɔn day go gɛt layf bak. Insay Paradays, Jiova go gi layf to dayman dɛn. Dis go apin tumara bambay. (Jɔn 5:28, 29; Di Apɔsul Dɛn Wok 24:15) Jɛs lɛk aw yu kin wek pɔsin we de slip, na so Gɔd gɛt fɔ wek dɛn wan dɛn we bin dɔn day.—Mak 5:22, 23, 41, 42.

Setan de mek pipul dɛn biliv se pɔsin nɔ de day. Setan ɛn in dɛbul dɛn de mek pipul dɛn tink se sɔmtin de insay mɔtalman we nɔ de day, ɛn na dɛn de kɔz trɔbul ɛn mek pipul dɛn sik. Setan kin yuz drim ɛn vishɔn fɔ mek pipul dɛn ful. Jiova se i bad fɔ mek ɛnibɔdi tɔk to dayman.—Rɛvɛleshɔn 21:8.