1, 2. Aw Belam bin tray fɔ ambɔg Jiova in pipul dɛn?

IMAJIN se wan fishaman go tinap na di say usay i go kech di kayn fish we i want. I pik di kayn bet we i want, dɔn i sɛn di uk insay di wata. I peshɛnt wet, ɛn we di fish de it di bet, i jak di uk ɛn di uk fasin na di fish in jɔ ɛn i pul di fish insay di wata.

² Na so bak dɛn kin yuz trap fɔ kech pipul dɛn. Fɔ ɛgzampul, i bin dɔn lɛf smɔl fɔ mek di Izrɛlayt dɛn rich na di land we Gɔd bin dɔn prɔmis dɛn di tɛm we dɛn bin de na Moab. Di kiŋ na Moab bin prɔmis fɔ gi wan man we nem Belam bɔku mɔni if i swɛ di Izrɛlayt dɛn. Leta, Belam bin fɛn we fɔ mek di Izrɛlayt dɛn briŋ trɔbul pan dɛnsɛf. I bin tek tɛm pik di bet. I sɛn di yɔŋ uman dɛn na Moab fɔ go usay di Izrɛlayt dɛn bin de fɔ go mek di Izrɛlayt man dɛn ledɔm wit dɛn.—Di Nɔmba Dɛm 22:​1-7; 31:​15, 16; Rɛvɛleshɔn 2:​14.

3. Aw di Izrɛlayt dɛn bin fɔdɔm na Belam in trap?

³ Belam in bet bin wok? Yɛs, i wok. Bɔku bɔku  Izrɛlayt man dɛn bin ‘bigin du mami ɛn dadi biznɛs wit di moabayt uman dɛn.’ Dɛn bin bigin bak fɔ wɔship lay lay gɔd dɛn, lɛk di gɔd we de fɔ mami ɛn dadi biznɛs we na Beal we de na Piɔ. Dat bin mek 24,000 Izrɛlayt dɛn bin day na di bɔda fɔ rich na di land we Gɔd bin dɔn prɔmis.—Di Nɔmba Dɛm 25:​1-9.

4. Wetin mek bɔku pan di Izrɛlayt dɛn bin du mami ɛn dadi biznɛs di we aw Gɔd nɔ want?

⁴ Wetin mek bɔku Izrɛlayt dɛn bin fɔdɔm na Belam in trap? Na bikɔs dɛn bin jɔs de tink bɔt aw dɛn go ɛnjɔy dɛnsɛf nɔmɔ, ɛn dɛn fɔgɛt bɔt ɔl wetin Jiova bin dɔn du fɔ dɛn. Di Izrɛlayt dɛn bin gɛt bɔku rizin fɔ kɔntinyu fɔ de biɛn Gɔd. Na in bin dɔn fri dɛn frɔm di slev wok we dɛn bin de du na Ijipt, i bin de fid dɛn we dɛn bin de na di ɛmti land usay pɔsin nɔ go ebul fɔ liv, ɛn i bin briŋ dɛn kam sef wan na di bɔda fɔ rich di land we i bin dɔn prɔmis dɛn. (Di Ibru Pipul Dɛn 3:​12) Bɔt pan ɔl dat, dɛn bin alaw di uman dɛn na Moab fɔ ful dɛn fɔ mek dɛn du mami ɛn dadi biznɛs di we aw Gɔd nɔ want. Di apɔsul Pɔl bin tɔk se: “Wi nɔ fɔ liv fri layf, lɛkɛ aw sɔm pipul bin du, we mek twɛnti-tri tawzin pan dɛn day wande.”—Fɔs Lɛta Fɔ Kɔrint 10:​8.

5, 6. Wetin wi lan frɔm wetin bin apin na Moab?

⁵ Di nyu wɔl nɔ de fa igen. So wi fiba di Izrɛlayt dɛn we bin de na di bɔda fɔ rich di land we Gɔd bin dɔn prɔmis dɛn. (Fɔs Lɛta Fɔ Kɔrint 10:​11) Di pipul dɛn na di wɔl tide lɛk fɔ du mami ɛn dadi biznɛs pas aw di pipul dɛn na Moab bin de. Ɛn dis kin afɛkt Jiova in pipul dɛn. Infakt, di bet we Setan de yuz gud gud wan tide, na mami ɛn dadi biznɛs di we aw Gɔd nɔ want.—Di Nɔmba Dɛm 25:​6, 14; Sɛkɛn Lɛta Fɔ Kɔrint 2:​11; Jud In Lɛta 4.

 ⁶ Aks yusɛf dɛn kwɛstyɔn dɛn ya, ‘A go gri fɔ ɛnjɔy misɛf fɔ jɔs shɔt tɛm, ɔ a go lɛk fɔ de sote go wit gladi-at na di nyu wɔl?’ Ɛni bɛnifit de fɔ obe Jiova in lɔ we se: “Una nɔ fɔ liv fri layf”?—Fɔs Lɛta Fɔ Kɔrint 6:​18.

7, 8. Wetin i min fɔ du mami ɛn dadi biznɛs di we aw Gɔd nɔ want? Wetin na sɔm pan di prɔblɛm dɛn we kin mit pɔsin we de du mami ɛn dadi biznɛs di we aw Gɔd nɔ want?

⁷ Bɔku pipul dɛn tide nɔ gɛt wan shem ɛn dɛn nɔ de fred fɔ pwɛl Gɔd in lɔ bɔt mami ɛn dadi biznɛs. Insay di Baybul, mami ɛn dadi biznɛs di we aw Gɔd nɔ want kin min fɔ du mami ɛn dadi biznɛs wit pɔsin we yu nɔ mared to ligal wan. I nɔ kin izi fɔ tɔk bɔt dis tɔpik, bɔt wi nid fɔ rili ɔndastand am so dat wi go avɔyd di tin dɛn we Gɔd et. Mami ɛn dadi biznɛs di we aw Gɔd nɔ want kin min bak we man de ledɔm wit in kɔmpin man ɔ we uman de ledɔm wit in kɔmpin uman, ɛn we mɔtalman de ledɔm wit animal. I kin min bak we pɔsin de yuz in mɔt fɔ ple wit ɔda pɔsin in prayvet pat, we pɔsin de du mami ɛn dadi biznɛs na ɔda pɔsin in wes, ɛn we tu pipul dɛn we nɔ mared de ple wit dɛn prayvet pat.—Luk Ɛndnot 23 na pej 249.

⁸ Di Baybul mek wi no klia wan se if pɔsin kɔntinyu fɔ du mami ɛn dadi biznɛs di we aw Gɔd nɔ want, i nɔ go kɔntinyu fɔ de na di kɔngrigeshɔn. (Fɔs Lɛta Fɔ Kɔrint 6:​9; Rɛvɛleshɔn 22:​15) Apat frɔm dat, pɔsin we de du mami ɛn dadi biznɛs di we Gɔd nɔ want nɔ kin rɛspɛkt insɛf ɛn ɔda pipul dɛn nɔ kin biliv am. Mami ɛn dadi biznɛs di we aw Gɔd nɔ want kin briŋ kam ɔda prɔblɛm dɛn ɔltɛm. Di pɔsin nɔ kin gɛt klia kɔnshɛns ɛn i kin gɛt bɛlɛ we i nɔ want, i kin gɛt prɔblɛm dɛn na  in mared-os, i kin gɛt bad bad sik, ɛn i kin ivin day. (Rid Lɛta Fɔ Galeshya 6:​7, 8.) If pɔsin rili sidɔm ɛn tink bɔt wetin go apin if i du mami ɛn dadi biznɛs di we aw Gɔd nɔ want, dat go mek i want fɔ liv klin layf. Bɔt bɔku tɛm, di pɔsin kin jɔs de tink bɔt aw i go satisfay insɛf nɔmɔ we i kin bigin fɔ du di tin dɛn we go mek i du mami ɛn dadi biznɛs di we aw Gɔd nɔ want. Plɛnti tɛm, i kin stat bay we pɔsin de wach dɛn rud rud pikchɔ dɛn. * (Luk di futnot.)

9. Wetin mek i bad fɔ wach rud rud pikchɔ dɛn?

⁹ Dɛn kin mek rud rud pikchɔ dɛn fɔ lɛ pɔsin fil fɔ du mami ɛn dadi biznɛs bad bad wan. Tide, rud rud pikchɔ dɛn de ɔlsay; insay magazin, buk, myuzik, tɛlivishɔn sho dɛn, ɛn na di Intanɛt. Bɔku pipul dɛn de fil se fɔ wach rud rud pikchɔ dɛn nɔ bad, bɔt dat rili bad. I kin mek pɔsin want fɔ de du mami ɛn dadi biznɛs ɔltɛm ɛn bigin fɔ du tin we nɔ fayn. Wans pɔsin bigin fɔ wach dɛn rud rud pikchɔ dɛn, i dɔn bigin fɔ du tin dɛn we go mek i bigin fɔ ple wit in prayvet pat, gɛt prɔblɛm dɛn na mared-os, ɛn ivin dayvɔs.—Lɛta Fɔ Rom 1:​24-27; Lɛta Fɔ Ɛfisɔs 4:​19; luk Ɛndnot 24 na pej 250.

10. Aw wetin de na Jems 1:​14, 15 go ɛp wi fɔ avɔyd mami ɛn dadi biznɛs di we aw Gɔd nɔ want?

¹⁰ I rili impɔtant fɔ mek wi ɔndastand aw pɔsin kin bigin fɔ fil fɔ du mami ɛn dadi biznɛs. Notis dis wɔnin we de na Jems 1:​14, 15 we se: “Na di bad we de na  pɔsin in at de mek di pɔsin want fɔ du bad. Na di bad we de na pɔsin [in] at de mek di pɔsin want sin, ɛn wɛn pɔsin sin dat go mek i day.” So we yu bigin fɔ tink bɔt bad tin dɛn, tray fɔ pul am na yu maynd wantɛm wantɛm. If yu mistek si sɔntin we de sho mami ɛn dadi biznɛs, tɔn yu fes wantɛm wantɛm! Ɔt di kɔmpyuta, ɔ chenj di tɛlivishɔn program we yu bin de wach. Nɔ alaw di we aw yu de fil fɔ mek yu du mami ɛn dadi biznɛs di we aw Gɔd nɔ want. If yu alaw dat fɔ apin, di bad we aw yu de fil go strɔng ɛn tɛm go kam we i nɔ go rili izi fɔ kɔntrol.—Rid Matyu 5:​29, 30.

11. Aw Jiova go ɛp wi we wi de tink bɔt bad tin dɛn?

¹¹ Jiova no wi pas aw wi no wisɛf. So i no se wi nɔ pafɛkt. Bɔt i no bak se wi go ebul fɔ avɔyd bad tin dɛn. Jiova tɛl wi se: “Una fɔ kil di tin we de insay una at we de mek una want fɔ du dɛn bad tin we dɛn ɔda  mɔtalman de du, dat na fɔ liv fri ɔ dɔti layf; fɔ want man ɔ uman we nɔto una yon; fɔ want fɔ du ɔl kayn bad tin; fɔ want plɛnti, plɛnti tin (dat jɛs tan lɛkɛ wɛn pɔsin gɛt ɔda tin we i lɛk pas Gɔd).” (Lɛta Fɔ Kɔlɔse 3:​5) Pan ɔl we dat nɔto izi tin fɔ du, Jiova de peshɛnt wit wi ɛn i want fɔ ɛp wi. (Sam 68:​19) Wan yɔŋ brɔda bin gɛt di abit fɔ de wach dɛn rud rud pikchɔ dɛn ɛn i bin de ple ple wit in prayvet pat. In padi dɛn na skul bin fil se we pɔsin de gro, i nɔmal fɔ de du dɛn tin dɛn de. Bɔt leta dis brɔda bin tɔk se: “Di tin dɛn we a bin de du bin ambɔg mi kɔnshɛns, ɛn a bigin fɔ liv fri layf.” I bin kam fɔ no se i nid fɔ kɔntrol di we aw i de fil, ɛn Jiova bin ɛp am fɔ lɛf dis kayn abit. If yu de tink bɔt mami ɛn dadi biznɛs, beg Jiova fɔ gi yu di “pawa we di Spirit de gi” fɔ mek yu bigin tink bɔt klin tin dɛn.—Sɛkɛn Lɛta Fɔ Kɔrint 4:​7; Fɔs Lɛta Fɔ Kɔrint 9:​27.

12. Wetin mek wi nid fɔ ‘protɛkt wi at’?

¹² Sɔlɔmɔn bin rayt se: “Pan ɔl di tin dɛn we yu fɔ protɛkt, na yu at mɔ yu fɔ protɛkt bikɔs wetin de na yu at na in go mek yu liv ɔ day.” (Prɔvabs 4:​23, NW) We di Baybul tɔk bɔt “at,” i min di pɔsin we wi rili bi, dat na di pɔsin we Jiova de si. Di tin we wi kin wach kin rili afɛkt wi. Di fetful man Job bin tɔk se: “Mi ɛn mi yay dɔn mek wanwɔd; aw a go se a de luk vajin gyal naw.” (Job 31:​1) Jɔs lɛk Job, wi nid fɔ kɔntrol wetin wi de luk ɛn tink bɔt. Ɛn wi fɔ tan lɛk wan pan di man dɛn we rayt di Sam buk we se: “Nɔ mek fulish tin ful mi yay.”—Sam 119:​37.

13. Uskayn padi dɛn Dayna bin gɛt?

¹³ Wetin wi padi dɛn kin du kin rili afɛkt wi fɔ du  gud tin ɔ bad tin. If yu pik padi dɛn we de fala Gɔd in lɔ dɛn, dɛn go ɛp yu fɔ du di sem tin. (Prɔvabs 13:​20; rid Fɔs Lɛta Fɔ Kɔrint 15:​33.) Lɛ wi lan wetin mek i impɔtant fɔ tek tɛm pik wi padi dɛn frɔm wetin bin apin to Dayna. Dayna na bin Jekɔp in galpikin, so i mɛn na famili we de wɔship Jiova. Dayna nɔto bin pɔsin we de liv fri layf, bɔt i bin mek tayt padi biznɛs wit Kenanayt gal dɛn we nɔ bin de wɔship Jiova. Di Kenanayt dɛn nɔ bin de fala Gɔd in lɔ bɔt mami ɛn dadi biznɛs ɛn pipul dɛn bin no se dɛn bin de liv fri layf. (Lɛvitikɔs 18:​6-25) We Dayna kin go fɛn in padi dɛn, na de i kam fɔ sabi wan yɔŋ Kenanayt man we nem Shɛkɛm. Shɛkɛm bin kam fɔ lɛk Dayna. Pipul dɛn bin de si Shɛkɛm as “impɔtant pɔsin” na in famili. Bɔt i nɔ bin lɛk Jiova.—Jɛnɛsis 34:​18, 19.

14. Wetin bin apin to Dayna?

¹⁴ Shɛkɛm bin du wetin i bin fil se nɔmal ɛn wetin i bin gri wit. Bikɔs i bin lɛk Dayna, i “kech am ɛn rep am.” (Rid Jɛnɛsis 34:​1-4.) Dis tin we bin apin bin mek ɔda bad tin dɛn apin we briŋ trɔbul na di wan ol famili.—Jɛnɛsis 34:​7, 25-31; Lɛta Fɔ Galeshya 6:​7, 8.

15, 16. Aw wi go gɛt sɛns?

¹⁵ Di sem tin we apin to Dayna nɔ nid fɔ apin to wi fɔs bifo wi lan se Jiova in lɔ dɛn gud fɔ wi. Di Baybul tɛl wi se: “Udat de rakpala [“waka,” NW] wit pipul dɛn we gɛt sɛns de gɛt sɛns, bɔt if yu se na fulman kabudu yu de rɔbskin wit, yu go tɔn rederaun.” (Prɔvabs 13:​20) Mekɔp yu maynd fɔ ɔndastand “aw fɔ du tin tret wan,” ɛn yu go avɔyd bɔku prɔblɛm ɛn pwɛl at.—Prɔvabs 2:​6-9; Sam 1:​1-3.

¹⁶ Wi go gɛt sɛns bay we wi stɔdi Gɔd in Wɔd, pre to  Gɔd bifo wi disayd fɔ du sɔntin, ɛn fala di gud advays dɛn we di slev we fetful ɛn gɛt sɛns de gi. (Matyu 24:​45, NW; Jems 1:​5) Na tru se wi ɔl nɔ pafɛkt. (Jɛrimaya 17:​9) Bɔt wetin yu go du if sɔmbɔdi wɔn yu we i notis se yu dɔn bigin fɔ du tin we go mek yu du mami ɛn dadi biznɛs di we aw Gɔd nɔ want? Yu go vɛks, ɔ yu go put yusɛf dɔŋ ɛn gri fɔ mek i ɛp yu?—Sɛkɛn Kiŋ 22:​18, 19.

17. Gi wan ɛgzampul fɔ sho aw wi kɔmpin Kristian in advays go ɛp wi.

¹⁷ Fɔ ɛgzampul, tink bɔt dis. Imajin se na di say usay wan yɔŋ sista de wok, wan man bigin fɔ pe atɛnshɔn to am ɛn i invayt am fɔ lɛ dɛn tu kɔmɔt. Di man nɔ de wɔship Jiova, bɔt i tan lɛk pɔsin we nays ɛn gud. Wan ɔda sista si dɛn togɛda ɛn leta i tray fɔ wɔn di yɔŋ sista bɔt dat. Aw dis yɔŋ sista go biev? I go tray fɔ gi ɛkskyuz ɔ i go si di sɛns pan di wɔnin we di ɔda sista gi am? I go mɔs bi se dis sista lɛk Jiova ɛn i want fɔ du wetin rayt.  Bɔt if i kɔntinyu fɔ spɛn tɛm wit dis man, yu tink se dis sista de avɔyd nɔ fɔ du mami ɛn dadi biznɛs di we aw Gɔd nɔ want ɔ i de ‘abop pan in yon sɛns nɔmɔ’?—Prɔvabs 22:​3; 28:​26; Matyu 6:​13; 26:​41.

18, 19. Aw Josɛf bin avɔyd nɔ fɔ du mami ɛn dadi biznɛs di we aw Gɔd nɔ want? Wetin bin ɛp am fɔ du so?

¹⁸ We Josɛf na bin yɔŋman, i na bin slev na Ijipt. Ɛvride in masta in wɛf bin de aks am fɔ ledɔm wit am, bɔt Josɛf bin no se na bad tin fɔ du. Josɛf bin lɛk Jiova ɛn i bin want fɔ du tin we go mek I gladi. So ɛnitɛm we di uman kin de tray fɔ ledɔm wit am, i nɔ kin gri. Bikɔs in na bin slev, dat bin mek i nɔ go jɔs lɛf in masta. Wan de afta we in masta in wɛf tray fɔ fos am fɔ ledɔm wit am, Josɛf bin “rɔn go na do.”—Rid Jɛnɛsis 39:​7-12.

¹⁹ Dis tin we bin apin fɔ dɔn ɛnd difrɛn we if Josɛf bin alaw insɛf fɔ de tink bɔt mami ɛn dadi biznɛs ɔ if i bin de imajin di uman. Bɔt Josɛf in padi biznɛs wit Jiova bin impɔtant to am pas ɛni ɔda tin. I bin tɛl di uman se: “In masta . . . nɔ ayd natin pan am pas in we nain wɛf. I se, wetin fɔ mek i du dis kayn wikɛd tin ɛn sin to PAPA GƆD.”—Jɛnɛsis 39:​8, 9.

20. Aw wi no se Jiova bin gladi fɔ Josɛf?

²⁰ Pan ɔl we Josɛf bin de fa frɔm in famili ɛn in om-tɔŋ, i bin kɔntinyu fɔ de biɛn Jiova ɔltɛm ɛn I bin blɛs am fɔ dat. (Jɛnɛsis 41:​39-49) Jiova bin gladi fɔ we Josɛf nɔ bin kɔmɔt biɛn am. (Prɔvabs 27:​11) I nɔ kin rili izi fɔ avɔyd mami ɛn dadi biznɛs di we aw Gɔd nɔ want. Bɔt mɛmba dɛn wɔd dɛn ya we se: “Lɛ ɔl udat se i lɛk PAPA GƆD, et bad[,] i de sev udat lɛk am ɛn pul am nain ɛnimi dɛn an”!—Sam 97:​10.

21. Aw wan yɔŋ brɔda bin falamakata Josɛf?

 ²¹ Ɛvride, Jiova in pipul dɛn de sho se dɛn gɛt maynd bay we dɛn de “lɛf fɔ du bad” ɛn dɛn lɛk fɔ “du gud.” (Emɔs 5:​15) Ilɛk ɔmɔs ia yu ol, yu kin fetful to Jiova. Sɔntin bin apin to wan yɔŋ brɔda na skul we bin tɛst in fet. Wan titi bin tɛl am se i go du mami ɛn dadi biznɛs wit am if i gri fɔ ɛp am pan wan mats tɛst. Wetin dis brɔda bin du? I bin du lɛk aw Josɛf bin du. I tɔk se: “Wantɛm wantɛm, a tɛl am se a nɔ go du am. We a tinap tranga wan nɔ fɔ du bad, a ebul gɛt mi rɛspɛkt.” Mami ɛn dadi biznɛs di we aw Gɔd nɔ want na ɛnjɔymɛnt we “nɔ de te” bikɔs bɔku tɛm i kin ɛnd-ɔp wit pen ɛn pwɛl at. (Di Ibru Pipul Dɛn 11:​25) We pɔsin obe Jiova, dat kin mek i gɛt gladi-at we go de sote go.—Prɔvabs 10:​22.

22, 23. Aw Jiova kin ɛp wi ilɛksɛf wi sin siriɔs wan?

²² Setan kin tray fɔ yuz mami ɛn dadi biznɛs di we aw Gɔd nɔ want fɔ kech wi, ɛn dis nɔ kin rili izi. Sɔntɛnde, wi ɔl kin tink bɔt bad tin dɛn. (Lɛta Fɔ Rom 7:​21-25) Jiova kin ɔndastand ɛn i kin mɛmba se “na dɔti i tek mek wi.” (Sam 103:​14) So wetin wi go se if pɔsin we na Kristian du mami ɛn dadi biznɛs di we aw Gɔd nɔ want? Fɔ se natin nɔ de fɔ du bɔt dat? Nɔ, i nɔ go bi so. If di pɔsin rili ripɛnt, Jiova go ɛp am. Gɔd rɛdi fɔ “fɔgiv” am.—Sam 86:​5; Jems 5:​16; rid Prɔvabs 28:​13.

²³ Jiova dɔn gi wi sɔm man dɛn we “tan lɛk gift.” Dɛn man dɛn ya na di ɛlda dɛn we lɛk wi ɛn we de kia fɔ wi. (Lɛta fɔ Ɛfisɔs 4:​8, NW, 12; Jems 5:​14, 15) I gi wi di ɛlda dɛn fɔ lɛ dɛn ɛp wi fɔ gɛt tayt padi biznɛs wit am bak.—Prɔvabs 15:​32.

24, 25. Aw we wi tink di rayt we go ɛp wi fɔ avɔyd fɔ du mami ɛn dadi biznɛs di we aw Gɔd nɔ want?

²⁴ Fɔ lɛ wi go ebul fɔ disayd fɔ du di rayt tin, wi nid fɔ ɔndastand aw Jiova in lɔ dɛn go bɛnifit wi. Wi nɔ want fɔ tan lɛk di yɔŋman we dɛn tɔk bɔt na Prɔvabs 7: 6-23. I nɔ bin de tink di rayt we so i fɔdɔm na di trap fɔ du mami ɛn dadi biznɛs di we aw Gɔd nɔ want. Pɔsin we de tink di rayt we bɛtɛ pas pɔsin we se i gɛt sɛns. We wi de tink di rayt we, dat de ɛp wi fɔ ɔndastand di we aw Gɔd de tink ɛn fɔ du di tin dɛn we wi de lan. Mɛmba dis fayn advays: “If yu lɛk yusɛf, yu go tray fɔ lan bɔku tin; ɛn wetin yu lan go mek yu bɛtɛ na layf.”—Prɔvabs 19:​8.

²⁵ Yu biliv tranga wan se wetin Gɔd want rili rayt fɔ yu? Yu rili biliv se if yu fala dɛn lɔ dɛn ya, yu go gɛt gladi-at? (Sam 19:​7-10; Ayzaya 48:​17, 18) If yu nɔ rili biliv, mɛmba ɔl di gud tin dɛn we Jiova dɔn du fɔ yu. Di Baybul se: “Kam si fɔ yusɛf se PAPA GƆD [“Jiova,” NW] na gud PAPA GƆD.” (Sam 34:​8) Yu go kam fɔ no se di mɔ we yu de du dat, na di mɔ yu go lɛk Gɔd. Yu go lɛk wetin i lɛk, ɛn ɛt wetin i et. Go de tink bɔt gud tin dɛn, tin dɛn we tru, tin dɛn we rayt, klin, tin dɛn we pipul dɛn lɛk. (Lɛta Fɔ Filipay 4:​8, 9) Wi kin tan lɛk Josɛf we bin bɛnifit frɔm di sɛns we Jiova de gi.—Ayzaya 64:​8.

26. Wetin wi go tɔk bɔt na di nɛks chapta?

²⁶ Ilɛk yu mared ɔ yu nɔ mared, Jiova want yu fɔ ɛnjɔy yu layf ɛn gɛt gladi-at. Di nɛks tu chapta dɛn go tɔk bɔt tin dɛn we go ɛp wi fɔ mek wi mared-os go bifo.