To di wan dɛn we lɛk Jiova Gɔd ɛn in Wɔd, di Baybul:

Jizɔs bin tɔk se: “Una go no wetin tru bɔt Gɔd, ɛn dat go mek una fri.” (Jɔn 8:​32) Tink bɔt aw yu bin fil di fɔstɛm we yu lan di tru na di Baybul! Yu bin gladi fɔ no se pan ɔl we wi de na wɔl we fulɔp wit lay lay, wi kin stil lan di trut.—Sɛkɛn Lɛta To Timoti 3:​1.

Jiova Gɔd want fɔ mek wi no di tru. Ɛn bikɔs wi lɛk pipul dɛn, wi go want fɔ tɛl dɛn bɔt dat. Bɔt wi gɛt bɔku tin dɛn fɔ du we wi de sav Gɔd. Wi fɔ du ɔl wetin wi ebul fɔ liv lɛk tru Kristian bikɔs wi rili rɛspɛkt di advays dɛn na Gɔd in Wɔd. Jizɔs bin sho wi wan impɔtant tin we wi fɔ du fɔ pruv se wi lɛk Gɔd. I tɔk se: “If una du wetin a tɛl una fɔ du, una go stil de ɛnjɔy di gud tin dɛn we a de du fɔ una bikɔs a lɛk una, jɛs lɛk aw misɛf du wetin mi Papa tɛl mi fɔ du so a stil de ɛnjɔy di gud we i de du fɔ mi bikɔs i lɛk mi.”—Jɔn 15:​10.

Jizɔs rili lɛk in Papa, ɛn i du ɔl wetin in Papa bin tɛl am fɔ du. If wi falamakata Jizɔs pan ɔltin we wi de du, Jiova go lɛk wi ɛn dat go mek wi gɛt gladi-at. Ɛn Jizɔs bin se, “we una dɔn no dat, una go gɛt big blɛsin if una du wetin a tɛl una fɔ du.”—Jɔn 13:​17.

Wi op se dis buk go ɛp yu fɔ lan fɔ liv yu layf di we we di Baybul se ɛn fɔ bi Gɔd in padi. Wi de pre fɔ mek yu kɔntinyu fɔ lɛk Gɔd mɔ ɛn mɔ ɛn fɔ mek yu “kɔntinyu fɔ du sɔntin we go mek Gɔd lɛk” yu ɛn gi yu “layf we go de sote go.”—Jud in Lɛta 21, NW.