1, 2. Wetin wi go du fɔ kɔntinyu fɔ mek Gɔd lɛk wi?

WI ƆL want fɔ gɛt trɛnk ɛn wɛlbɔdi. So wi kin tray fɔ it gud it, ɛksasayz ɔltɛm, ɛn kia fɔ wi bɔdi fayn fayn wan. Pan ɔl we dis nɔ kin izi, wi kin gladi fɔ wetin kin apin, so dat kin mek wi nɔ de giv ɔp. Bɔt wi nid bak fɔ gɛt trɛnk ɛn wɛlbɔdi wan ɔda we.

² Pan ɔl we wi kin dɔn stat fayn fɔ lan bɔt Jiova, wi stil nid fɔ kɔntinyu fɔ mek wi padi biznɛs wit am tayt mɔ ɛn mɔ. We Jud bin de ɛnkɔrej Kristian dɛn fɔ “Kɔntinyu fɔ du sɔntin we go mek Gɔd lɛk” dɛn, i bin ɛksplen aw dɛn go du dat. I bin tɛl dɛn se: “Una go de du sɔntin we go mek una gɛt mɔ fet.” (Jud in Lɛta 20, 21, NW) So aw wi go gɛt strɔng fet?

3-5. (a) Aw Setan want yu fɔ fil bɔt di we aw Jiova de du tin? (b) Aw yu fil bɔt Jiova in lɔ ɛn advays dɛn?

³ I rili impɔtant fɔ lɛ wi biliv tranga wan se di we aw Jiova want wi fɔ du tin na di bɛst. Setan want wi fɔ tink se i rili at fɔ fala di we aw Jiova de du tin, ɛn wi go gɛt gladi-at if wi disayd fɔ wisɛf wetin rayt  ɛn wetin rɔŋ. Frɔm wetin bin apin na di gadin we bin de na Idɛn, Setan dɔn tray fɔ mek pipul dɛn biliv dis. (Jɛnɛsis 3:​1-6) Ɛn i stil de tray tranga wan fɔ du di sem tin tide.

⁴ Fɔ se wetin Setan bin tɔk na tru? Fɔ se di we aw Jiova de du tin, nɔ de alaw wi fɔ du wetin wi want? Nɔ, nɔto so i bi. Fɔ ɛgzampul, imajin se yu de waka na wan fayn fayn gadin. Yu notis se wan ay fɛns de we de mek yu nɔ ebul si wan pat na di gadin. Sɔntɛm yu go de tink se, ‘Wetin mek dis fɛns de blɔk mi?’ Bɔt i nɔ tu te yu yɛri layɔn de ala oba di fɛns. Wetin yu go tink bɔt di fɛns naw? Yu go gladi fɔ we di fɛns de protɛkt yu so dat di layɔn nɔ go it yu. Di we aw Jiova want wi fɔ du tin tan lɛk fɛns, ɛn Setan tan lɛk da layɔn. Gɔd in Wɔd wɔn wi se: “Una fɔ rɛdi ɔltɛm, ɛn ɔltɛm una fɔ de wach, bikɔs Setan we de fɛt una, de go ɔlɔbɔt lɛkɛ aŋri layɔn, fɔ fɛn udat in go fɔdɔm pan.”—Pita In Fɔs Lɛta 5:​8.

⁵ Jiova want wi fɔ gɛt di bɛst layf. I nɔ want fɔ lɛ Setan ful wi. Na dat mek i dɔn gi wi lɔ ɛn advays dɛn [prinsipul] fɔ protɛkt wi ɛn fɔ mek wi gɛt gladi-at. (Lɛta Fɔ Ɛfisɔs 6:​11) Jems bin rayt se: “Gɔd in wɔd na di rayt tin fɔ mɔtalman . . . ɛnibɔdi we put ɔl in at pan am, we nɔ jɛs lisin am nɔmɔ ɛn fɔgɛt, bɔt i de du wetin i se, Gɔd go blɛs ɔl wetin da pɔsin de put in an pan.”—Jems 1:​25.

6. Aw wi go biliv tranga wan se di we aw Jiova de du tin na di bɛst?

⁶ We wi fala di tin dɛn we Jiova de tɛl wi fɔ du, wi layf go bɛtɛ ɛn wi padi biznɛs wit am go tayt mɔ ɛn mɔ. Fɔ ɛgzampul, we i invayt wi fɔ de pre to am,  wi de bɛnifit if wi de du am ɔltɛm. (Matyu 6:​5-8; Fɔs Lɛta Fɔ Tɛsalonayka 5:​17) Wi de gɛt gladi-at we wi obe di tin dɛn we i tɛl wi fɔ du. Tin dɛn lɛk fɔ kam togɛda fɔ wɔship am, fɔ ɛnkɔrej wi brɔda ɛn sista dɛn, ɛn fɔ yuz bɔku pan wi tɛm fɔ prich ɛn tich pipul dɛn. (Matyu 28:​19, 20; Lɛta Fɔ Galeshya 6:​2; Di Ibru Pipul Dɛn 10:​24, 25) As wi de tink bɔt aw dɛn tin ya dɔn ɛp wi fɔ kɔntinyu fɔ gɛt mɔ fet, na di mɔ wi go biliv se Jiova in we dɛn fɔ du tin na di bɛst.

7, 8. Wetin go ɛp wi fɔ lɛ wi nɔ wɔri bɔt sɔntin we go tɛst wi fet tumara bambay?

⁷ I go bi se wi go de wɔri se tumara bambay sɔntin go apin we go tɛst wi fet. If yu dɔn ɛva fil dis kayn we, mɛmba wetin Jiova tɔk we i se: “Na mi na PAPA GƆD [“Jiova,” NW] we na yu Gɔd, we de tich  yu aw fɔ prɔfit, we de lid yu na di rod we yu fɔ waka na layf. A wish yu bin de obe mi lɔ dɛn! Datɛnde yu kolat bin fɔ tan lɛk riva, ɛn di waka we yu de waka tret na mi yay, go tan lɛk swɛlin na si.”—Ayzaya 48:​17, 18.

⁸ We wi obe Jiova, di kolat we i go gɛt go tan lɛk riva we nɔ de dray ɛn di waka we wi de waka tret na Gɔd in yay tan lɛk swɛlin we kin kam na bich ɔltɛm. Dat min se wi go ebul fɔ fetful to Jiova sote go! Ilɛk wetin apin to wi, di Baybul prɔmis wi se: “Lɛf ɔltin gi PAPA GƆD [“Jiova,” NW], ɛn i nɔ go lɛf yu dɔŋ; i nɔ de ɛva disapɔynt udat abop pan am.”—Sam 55:​22.

9, 10. Wetin i min fɔ bi machɔ pɔsin?

⁹ As yu de mek yu padi biznɛs tayt wit Jiova, yu fɔ de “go bifo.” (Di Ibru Pipul Dɛn 6:​1) Wetin i min fɔ go bifo ɔ fɔ machɔ?

¹⁰ Wi nɔ go bi machɔ Kristian jɔs bikɔs wi de ol. Fɔ bi machɔ pɔsin, wi fɔ mek Jiova wi bɛst Padi ɛn tray fɔ si tin lɛk aw in de si am. (Jɔn 4:​23) Pɔl bin rayt se: “Dɛn pipul we de fala wetin dɛn at tɛl dɛn, na dat nɔmɔ go de na dɛn ed fɔ du; bɔt dɛn wan we de du wetin Gɔd in Spirit tɛl dɛn fɔ du, na wetin di Spirit want nɔmɔ nain de na dɛn ed fɔ du.” (Lɛta Fɔ Rom 8:​5) Pɔsin we machɔ nɔ de jɔs put in maynd pan ɛnjɔymɛnt ɔ fɔ gɛt jɛntri. Bifo dat, i de pe atɛnshɔn mɔ fɔ sav Jiova ɛn fɔ disayd fɔ du di rayt tin dɛn na layf. (Prɔvabs 27:​11; rid Jems 1:​2, 3.) I nɔ de alaw insɛf fɔ du di rɔŋ tin. Pɔsin we machɔ no wetin rayt ɛn i rɛdi fɔ du di rayt tin.

11, 12. (a) Wetin Pɔl bin tɔk bɔt Kristian dɛn we “dɔn lan aw fɔ no wetin gud ɛn bad”? (b) Aw fɔ bi machɔ Kristian tan lɛk fɔ bi rɔnman?

 ¹¹ Wi nid fɔ wok tranga wan fɔ bi machɔ pɔsin. Di apɔsul Pɔl bin rayt se: “Pɔsin we de it tin we fɔ cham, na big pɔsin; i dɔn no wetin gud ɛn wetin bad, bikɔs i dɔn lan aw fɔ no wetin gud ɛn bad bay dɛn tin we i de du we rayt na Gɔd in yay.” (Di Ibru Pipul Dɛn 5:​14) Di wɔd “lan” go mek wi tink bɔt pɔsin we de tren fɔ rɔn.

¹² We wi si gud rɔnman de rɔn, wi no se i yuz bɔku tɛm ɛn trenin fɔ lɛ i bi gud rɔnman. Dɛn nɔ bɔn am as rɔnman. We dɛn kin bɔn pikin, i nɔ kin rili no aw fɔ yuz in an ɛn fut dɛn. Bɔt as tɛm de go, i kin lan aw fɔ ol sɔntin ɛn aw fɔ waka. If i tren fɔ rɔn, i go bi rɔnman. Semweso, fɔ lɛ wi bi machɔ Kristian, wi nid tɛm ɛn trenin.

13. Wetin go ɛp wi fɔ lan fɔ tink di we aw Jiova de tink?

¹³ Insay dis buk, wi dɔn tɔk bɔt aw wi go tink lɛk aw Jiova de tink ɛn si tin lɛk aw i de si am. Wi dɔn lan fɔ valyu ɛn lɛk di we aw Jiova want wi fɔ du tin. We wi want fɔ disayd fɔ du sɔntin, wi fɔ aks wisɛf dɛn kwɛstyɔn dɛn ya: ‘Us lɔ ɔ advays dɛn na di Baybul de tɔk bɔt dis? Aw a go du wetin i se? Wetin Jiova go want mi fɔ du?’—Rid Prɔvabs 3:​5, 6; Jems 1:​5.

14. Wetin wi nid fɔ du if wi want fɔ gɛt mɔ fet?

¹⁴ Wi nɔ fɔ ɛva stɔp fɔ kɔntinyu fɔ gɛt mɔ fet pan Jiova. Jɔs lɛk we gud it de ɛp fɔ mek wi bɔdi strɔng, na so fɔ lan bɔt Jiova de ɛp wi fɔ gɛt strɔng fet. We wi bin jɔs stat fɔ stɔdi di Baybul, wi bin lan bɔt di men tin dɛn bɔt Jiova ɛn di we aw i de du tin. Bɔt as tɛm de go, wi nid fɔ ɔndastand mɔ tin dɛn fayn fayn  wan. Na dat Pɔl bin min we i tɔk se: “Pɔsin we de it tin we na fɔ cham, na big pɔsin.” We wi de fala di tin dɛn we wi de lan, wi de gɛt mɔ sɛns. Di Baybul tɛl wi se: “Fɔ gɛt sɛns pas ɛni ɔda tin na [di] wɔl.”—Prɔvabs 4:​5-7; Pita In Fɔs Lɛta 2:​2.

15. Wetin mek i impɔtant fɔ lɛ wi rili lɛk Jiova ɛn wi brɔda ɛn sista dɛn?

¹⁵ Sɔmbɔdi kin strɔng ɛn gɛt wɛlbɔdi, bɔt fɔ kɔntinyu fɔ de da kayn we de, di pɔsin no se i nid fɔ de kia fɔ insɛf. Semweso, pɔsin we machɔ no se i nid fɔ wok tranga wan fɔ mek i kɔntinyu fɔ gɛt tayt padi biznɛs wit Jiova. Pɔl bin mɛmba wi se: “Una fɔ jɔj unasɛf fɔ si if una biliv gud gud.” (Sɛkɛn Lɛta Fɔ Kɔrint 13:​5) Stil wi nɔ fɔ jɔs gɛt strɔng fet nɔmɔ. Di we aw wi lɛk Jiova ɛn wi brɔda ɛn sista dɛn fɔ kɔntinyu fɔ gro. Pɔl bin tɔk se: “If a kin ɔndastand ɔltin; if a ebul muf ay ay il bikɔs a biliv Gɔd lɛkɛ aw a fɔ biliv am, ɛn a nɔ lɛk mi kɔmpin mɔtalman, ɔl dɛn tin ya we a ebul du nɔ min natin.”—Fɔs Lɛta Fɔ Kɔrint 13:​1-3.

16. Aw Setan want wi fɔ tink?

¹⁶ Setan want wi fɔ tink se wi nɔ go ɛva du tin we go mek Jiova gladi. I want fɔ lɛ wi at pwɛl ɛn fɔ lɛ wi tink se wi prɔblɛm dɛn nɔ go ɛva dɔn. I nɔ want wi fɔ biliv wi kɔmpin Kristian dɛn, ɛn i nɔ want wi fɔ gɛt gladi-at. (Lɛta Fɔ Ɛfisɔs 2:​2) Setan no se we wi de tink bɔt bad tin dat go ambɔg wi ɛn wi padi biznɛs wit Gɔd. Bɔt Jiova dɔn gi wi sɔntin we go ɛp wi fɔ fɛt  dis kayn we aw wi de tink. I dɔn gi wi op fɔ tumara bambay.

17. Wetin mek op impɔtant?

¹⁷ Insay Fɔs Lɛta Fɔ Tɛsalonayka 5:​8, di Baybul kɔmpia wi op to di ɛlmɛt we sojaman de wɛr fɔ protɛkt in ed we i de fɛt, dat na di op “fɔ no se Gɔd dɔn sev wi.” Di op we wi gɛt pan Jiova in prɔmis dɛn de protɛkt wi maynd ɛn ɛp wi fɔ lɛ wi nɔ tink bɔt bad tin dɛn.

18, 19. Aw di op we Jizɔs bin gɛt bin ɛp am fɔ gɛt trɛnk?

¹⁸ Di op we Jizɔs bin gɛt bin mek i strɔng. Di las nɛt bifo dɛn kil am, i bin gɛt difrɛn prɔblɛm dɛn we nɔ bin izi fɔ am. In tayt padi bin kɔmɔt biɛn am. Di ɔda wan dinay se i nɔ ivin sabi am. Di ɔda wan dɛn bin rɔnawe lɛf am. In yon Ju pipul dɛn tɔn agens am  ɛn tɔk se dɛn fɔ mek i sɔfa te i day. Wetin bin ɛp Jizɔs fɔ bia ɔl dɛn tin ya? “Fɔseka di op we bin de bifo am, dat bin mek i bia di tɛm we dɛn bin nel am na di stik, i nɔ shem atɔl, ɛn i dɔn sidɔm na Gɔd in rayt an, nia di chia we Gɔd sidɔm.”—Di Ibru Pipul Dɛn 12:​2, NW.

¹⁹ Jizɔs bin no se if i fetful, i go briŋ prez to in Papa ɛn i go sho se Setan na layman. Dis op we i bin gɛt bin mek i gladi. I no bak se i nɔ go te igen, i go de wit in Papa bak na ɛvin. Dis op bin ɛp am fɔ bia. Jɔs lɛk Jizɔs, wisɛf fɔ put wi maynd pan di op we wi gɛt. Dis go ɛp wi fɔ bia ilɛk wetin apin.

20. Wetin go ɛp yu fɔ de tink bɔt gud tin?

²⁰ Jiova de si di kayn fet we yu gɛt ɛn di bia we yu de bia. (Ayzaya 30:​18; rid Malakay 3:​10.) I prɔmis  se “i go gi yu wetin yu want.” (Sam 37:​4) So na fɔ kɔntinyu fɔ pe atɛnshɔn pan di op we yu gɛt. Setan nɔ want yu fɔ gɛt op ɛn i want fɔ mek yu tink se Jiova in prɔmis dɛn nɔ go ɛva bi. Bɔt dat nɔ fɔ mek yu bigin fɔ tink bɔt bad tin! If yu notis se yu nɔ gɛt bɛtɛ op igen, aks Jiova fɔ ɛp yu. Mɛmba di wɔd dɛn we de na Lɛta Fɔ Filipay 4:​6, 7: “Una nɔ mek ɛnitin wɔri una, bɔt una fɔ de pre bɔt ɔltin. Wɛn una de pre, una fɔ aks Gɔd fɔ ɛnitin we una want ɛn una fɔ tɛl am tɛnki. Gɔd go gi una kol at, we mɔtalman nɔ ebul ɔndastand, we nɔ go mek ɛnitin wɔri una, bikɔs una gɛt wanwɔd wit Jizɔs Krays.”

21, 22. (a) Wetin mek Jiova mek di wɔl? (b) Wetin yu dɔn mekɔp yu maynd fɔ du?

²¹ Go de tink ɔltɛm bɔt di fayn fayn tin dɛn we gɛt fɔ apin tumara bambay. I nɔ go te igen ɔl mɔtalman go de wɔship Jiova. (Rɛvɛleshɔn 7:​9, 14) Jɔs tink bɔt layf na di nyu wɔl. I go fayn pas ɛnitin we wi go imajin! Setan, in dɛbul dɛn, ɛn ɔlkayn wikɛd tin nɔ go de igen. Yu nɔ go sik ɛn yu nɔ go day. Bifo dat, yu go grap ɛvride wit bɔku trɛnk ɛn yu go gladi fɔ de alayf. Wi ɔl go wok togɛda fɔ mek di wɔl bi Paradays. Ɔlman go gɛt gud it fɔ it ɛn sef say fɔ de. Pipul dɛn nɔ go wikɛd ɔ lɛk fɛt fɛt igen, bɔt dɛn go de du gud to dɛnsɛf. As tɛm de go, ɔl mɔtalman “go fri lɛk aw Gɔd in pikin dɛn dɔn fri.”—Lɛta Fɔ Rom 8:​21.

²² Jiova want yu fɔ bi in bɛst Padi. So du ɔl wetin yu ebul fɔ obe Jiova ɛn fɔ kam nia am ɛvride. Mek wi ɔl kɔntinyu fɔ du sɔntin we go mek Gɔd kɔntinyu fɔ lɛk wi!—Jud in Lɛta 21, NW.