1. Wetin wi nid fɔ du so dat wi go wɔship Jiova di we we go mek i gladi? Wetin mek?

JIZƆS bin tɔk se: “Di wan dɛn we de wɔship di Papa di rayt we go wɔship am wit spirit ɛn tru. Fɔ tru, di Papa de luk fɔ dɛn kayn pipul ya fɔ wɔship am.” (Jɔn 4:​23; 6:​44, NW) Wi ɔl fɔ tray ‘lan wetin di Masta want wi fɔ du.’ (Lɛta Fɔ Ɛfisɔs 5:​10) Dis nɔ kin izi ɔltɛm. Setan kin tray fɔ ful wi so dat wi go du di tin dɛn we go mek Jiova nɔ gladi.—Rɛvɛleshɔn 12:​9

2. Ɛksplen wetin bin apin nia Mawnt Saynay.

² Aw Setan kin tray fɔ ful wi? Wan we na bay we i de mek wi kɔnfyuz bɔt wetin rayt ɛn wetin nɔ rayt. Notis wetin bin apin to di Izrɛlayt dɛn di tɛm we dɛn bin de nia Mawnt Saynay. Mozis bin dɔn go ɔp di mawnten ɛn di pipul dɛn bin de wet fɔ mek Mozis kam bak na di kamp. As tɛm de go, dɛn bin taya fɔ wet ɛn dɛn bin tɛl Erɔn fɔ mek gɔd fɔ dɛn. Erɔn bin yuz gold fɔ mek kaw pikin. Dɔn, di pipul dɛn bin gɛt sɛlibreshɔn. Dɛn bin dans rawnd di kaw pikin ɛn butu bifo am. Dɛn bin biliv se dɛn de wɔship Jiova bay we dɛn bin de butu bifo di kaw pikin. Bɔt  jɔs bikɔs di pipul dɛn biliv se wetin dɛn de du na “big sɛlibreshɔn fɔ ɔna PAPA GƆD [“Jiova,” NW]”, nɔ min se na di rayt tin dɛn bin de du. Jiova bin si am se na aydɔl wɔship, ɛn bɔku pan dɛn bin day. (Ɛksodɔs 32:​1-6, 10, 28) Us lɛsin wi lan frɔm dis? Nɔ alaw fɔ mek dɛn ful yu. Wi nɔ fɔ “tɔch natin we dɔti na PAPA GƆD in yay,” ɛn wi fɔ alaw Jiova fɔ tich wi wetin rayt ɛn wetin rɔŋ.—Ayzaya 52:​11; Izikɛl 44:​23; Lɛta Fɔ Galeshya 5:​9.

3, 4. Wetin mek i fayn fɔ lɛ wi no bɔt usay sɔm pan dɛn sɛlibreshɔn ɛn ɔlide dɛn we bɔku pipul dɛn no bɔt, kɔmɔt?

³ We Jizɔs bin de na dis wɔl, i bin tren in apɔsul dɛn fɔ sɛt fayn ɛgzampul fɔ wɔship Gɔd di rayt we. Afta Jizɔs day, di apɔsul dɛn bin kɔntinyu fɔ tich di nyu disaypul dɛn wetin Jiova want dɛn fɔ du. Bɔt afta di apɔsul dɛn day, lay lay ticha dɛn bin bigin fɔ tich di rɔŋ tin, ɛn briŋ pegan kɔstɔm ɛn sɛlibreshɔn dɛn insay di kɔngrigeshɔn. Dɛn bin ivin gi nyu nem to dɛn pegan sɛlibreshɔn dɛn ya fɔ mek i tan lɛk se na Kristian sɛlibreshɔn dɛn. (Sɛkɛn Lɛta Fɔ Tɛsalonayka 2:​7, 10; Jɔn In Sɛkɛn Lɛta 6, 7) Bɔku pipul dɛn stil de mek dɛn sɛlibreshɔn dɛn ya, ɛn i stil de mek pipul dɛn biliv lay lay tin, ivin dɛbul biznɛs. *—Rɛvɛleshɔn 18:​2-4, 23.

⁴ Tide, ɔlsay na di wɔl, sɛlibreshɔn ɛn ɔlide dɛn na impɔtant tin dɛn na pipul dɛn layf. Bɔt as yu de kɔntinyu fɔ lan bɔt aw Jiova de si dɛn tin dɛn ya, yu  go nid fɔ ajɔst di we aw yu de tink bɔt sɔm pan dɛn sɛlibreshɔn dɛn ya. Dis nɔ kin rili izi, bɔt yu fɔ biliv tranga wan se Jiova go ɛp yu. Lɛ wi tɔk bɔt usay sɔm pan dɛn sɛlibreshɔn ɛn ɔlide dɛn we bɔku pipul dɛn no bɔt kɔmɔt, so dat wi go ɔndastand aw Jiova kin fil bɔt dɛn.

5. Wetin ɛp wi fɔ no se nɔto Disɛmba 25 dɛn bɔn Jizɔs?

⁵ Na bɔku say dɛn na di wɔl, plɛnti pipul dɛn kin sɛlibret Krismas Disɛmba 25 bikɔs dɛn biliv se na da de de dɛn bɔn Jizɔs. Di Baybul nɔ tɛl wi di de ɔ ivin di mɔnt we dɛn bɔn Jizɔs, bɔt i tɛl wi sɔntin bɔt di tɛm insay di ia we i bɔn. Lyuk bin rayt se di tɛm we dɛn bin bɔn Jizɔs na Bɛtliɛm, “sɔm shɛpad dɛn bin de na do” de kia fɔ dɛn ship dɛn. (Lyuk 2:​8-11, NW) Insay Disɛmba, Bɛtliɛm kin kol, ren kin kam, ɛn ivin sno kin fɔdɔm, so shɛpad dɛn nɔ kin de na do na nɛt wit dɛn ship dɛn dɛn tɛm dɛn de. Wetin wi lan frɔm dis? Wi lan se dɛn nɔ bin bɔn Jizɔs insay Disɛmba, dɛn bin bɔn am di tɛm we di wɛda fayn. Di Baybul ɛn ɔda pipul dɛn we de tɔk bɔt istri bin tɔk se na bitwin di mɔnt dɛn we wi kin kɔl naw Sɛptɛmba ɛn Ɔktoba dɛn bin bɔn Jizɔs.

6, 7. (a) Aw di tin dɛn we bɔku pipul dɛn kin du Krismas tɛm, bigin? (b) Wetin fɔ bi di rizin we mek wi de gi gift to ɔda pipul dɛn?

⁶ So aw Krismas bigin? Krismas kɔmɔt frɔm pegan ɔlide dɛn lɛk di Roman Satɔnalia, we na sɛlibreshɔn we dɛn kin mek fɔ Satɔn we na dɛn gɔd we dɛn biliv se de gi dɛn tin fɔ it. The Encyclopedia Americana tɔk se: “Satɔnalia na Roman ɔlide we dɛn bin de  sɛlibret midul Disɛmba, ɛn na frɔm dis ɔlide bɔku tin dɛn we pipul dɛn kin du Krismas tɛm, kɔmɔt. Fɔ ɛgzampul, na frɔm dis ɔlide bɔku pipul dɛn lan fɔ mek big big pati, gi gift, ɛn bɔn kandul Krismas tɛm.” Dɔn bak, di Pashian dɛn kin sɛlibret di gɔd we de fɔ di san we nem Mitra in batde insay Disɛmba 25.

⁷ Bɔt bɔku pipul dɛn we de sɛlibret Krismas tide nɔ no se na frɔm pegan ɔlide dɛn i kɔmɔt. Dɛn kin jɔs si Krismas as we fɔ spɛn tɛm wit dɛn famili, ɛnjɔy gud  it, ɛn fɔ gi gift dɛn. Fɔ tru, wi lɛk wi famili ɛn padi dɛn, ɛn Jiova want in savant dɛn fɔ gɛt fri-an. Sɛkɛn Lɛta Fɔ Kɔrint 9:​7 tɛl wi se “Gɔd lɛk pɔsin we gladi fɔ gi wetin i de gi.” Jiova nɔ want wi fɔ gi gift to ɔda pipul dɛn wan patikyula de ɔ tɛm nɔmɔ. Jiova in pipul dɛn kin lɛk fɔ gi gift to ɔda pipul dɛn, ɛn mek gɛt-to-gɛda wit dɛn padi ɛn fambul dɛn ɛnitɛm insay di ia, ɛn dɛn nɔ kin tink se ɔda pipul dɛn fɔ du gud to dɛn bak. Dɛn kin fri-an bikɔs dɛn lɛk ɔda pipul dɛn.—Lyuk 14:​12-14.

8. Fɔ se di man dɛn we de stɔdi bɔt sta dɛn bin briŋ gift to Jizɔs di tɛm we in na yɔŋbebi? Ɛksplen.

⁸ Fɔ sɔpɔt di we aw pipul dɛn de tink bɔt fɔ gi gift Krismas tɛm, bɔku pipul dɛn se tri man dɛn we gɛt sɛns, bin kɛr go gift di tɛm we Jizɔs na bin yɔŋbebi, we bin de na di say usay dɛn bin de mɛn animal dɛn. Na tru se sɔm man dɛn bin go fɛn Jizɔs ɛn dɛn kɛr gift dɛn fɔ am. Di tɛm we dɛn bin de rayt di Baybul, i kɔmɔn fɔ lɛ sɔmbɔdi kɛr go gift we i de go fɛn impɔtant pɔsin. (Fɔs Kiŋ 10:​1, 2, 10, 13) Bɔt yu no se di Baybul tɔk se dɛn man dɛn ya na pipul dɛn we de stɔdi bɔt di sta dɛn, dɛn bin de ple majik, ɛn dɛn nɔ bin de ivin wɔship Jiova? Dɔn bak, dɛn nɔ bin go fɛn Jizɔs di tɛm we in na bin yɔŋbebi we de na di say usay dɛn kin put it fɔ animal dɛn. Dɛn bin go fɛn am leta we in na bin smɔl “pikin” we de na os.—Matyu 2:​1, 2, 11.

9. Us batde sɛlibreshɔn dɛn tɔk bɔt na di Baybul?

⁹ Di de we dɛn bɔn pikin na de we ɔlman kin gladi.  (Sam 127:​3) Bɔt dat nɔ min se wi fɔ sɛlibret batde. Tink bɔt dis: Na tu batde dɛn nɔmɔ di Baybul tɔk bɔt. Di wan na Fɛro in batde, ɛn di ɔda wan na Kiŋ Ɛrɔd Antipas in batde. (Rid Jɛnɛsis 40:​20-22; Mak 6:​21-29.) Nɔn pan dɛn kiŋ dɛn ya nɔ bin de sav Jiova. Infakt, wi nɔ wande rid na di Baybul se di wan dɛn we de sav Jiova bin sɛlibret batde.

10. Aw di fɔstɛm Kristian dɛn bin de si batde?

¹⁰ The World Book Encyclopedia tɔk se di fɔstɛm Kristian dɛn “bin fil se fɔ mek pɔsin in batde na tin we pegan dɛn de du.” Dɛn kɔstɔm dɛn de kɔmɔt frɔm lay lay tin dɛn we pipul dɛn bin biliv. Fɔ ɛgzampul, di Grik pipul dɛn we bin de trade trade, bin biliv se ɔlman gɛt spirit we de protɛkt am di tɛm we dɛn bɔn am. Dɛn biliv se dis spirit gɛt sɔntin fɔ du wit di gɔd we dɛn bɔn di sem de we dɛn bɔn di pɔsin. Apat frɔm wetin di pegan dɛn biliv, batde gɛt sɔntin fɔ du wit fɔ luk di sta dɛn fɔ no wetin go apin tumara bambay.

11. Aw Jiova de fil we wi gɛt fri-an?

¹¹ Bɔku pipul dɛn fil se dɛn batde na spɛshal de we pipul dɛn fɔ sho se dɛn lɛk dɛn ɛn kia fɔ dɛn. Bɔt wi kin sho se wi lɛk wi famili ɛn padi dɛn ɛnitɛm insay di ia, nɔto jɔs wan patikyula de nɔmɔ. Jiova want wi fɔ de du gud ɛn fɔ gɛt fri-an ɔltɛm. (Rid Di Apɔsul Dɛn Wok [Akt] 20:​35.) Wi de tɛl Jiova tɛnki ɛvride fɔ di layf we i gi wi, nɔto jɔs di de fɔ wi batde.—Sam 8:​3, 4; 36:​9.

12. Aw wi go se di de we pɔsin day bɛtɛ pas di de we dɛn bɔn am?

¹² Ɛkliziastis 7:​1 tɔk se: “Gudnem bɛtɛ pas dia dia pafyum; ɛn di de we pɔsin day bɛtɛ pas di de we i bɔn.” Aw di de we pɔsin day bɛtɛ pas di de we dɛn  bɔn am? Di tɛm we dɛn bɔn pɔsin, i nɔ du ɛnitin yet na layf, i nɔ du gud ɔ bad. Bɔt we i yuz i layf fɔ sav Jiova ɛn du gud to ɔda pipul dɛn, i de gɛt “gudnem,” ɛn Jiova go mɛmba am ivin afta we i day. (Job 14:​14, 15, NW) Jiova in pipul dɛn nɔ de sɛlibret dɛn yon batde ɔ Jizɔs in batde. Infakt, di wangren tin we Jizɔs bin tɛl wi fɔ de du na di Mɛmorial fɔ mɛmba in day.—Lyuk 22:​17-20; Di Ibru Pipul Dɛn 1:​3, 4.

13, 14. Usay Ista ɔlide kɔmɔt?

¹³ Plɛnti pipul dɛn kin sɛlibret Ista fɔ mɛmba di tɛm we Jizɔs gɛt layf bak. Bɔt yu tink se Jizɔs bin tɛl wi fɔ de sɛlibret di tɛm we i gɛt layf bak? Nɔ, i nɔ bin ɛva tɔk so. Buk dɛn we de tɔk bɔt istri bin tɔk se dɛn fɔstɛm Kristian dɛn nɔ bin de sɛlibret Ista, ɛn Ista bin kɔmɔt frɔm dɛn pegan pipul dɛn. The Encyclopædia Britannica tɔk se: “Nɔsay nɔ de [frɔm Matyu to Rɛvɛleshɔn] we de tɔk bɔt Ista . . . Dɛn fɔstɛm Kristian dɛn nɔ bin de tink bɔt ɛni spɛshal de we oli.”

¹⁴ Yu tink se Jiova gladi we i de si we pipul dɛn de miks lay lay tichin wit di tɛm we in pikin gɛt layf bak? Nɔ, i nɔ gladi. (Sɛkɛn Lɛta Fɔ Kɔrint 6:​17, 18) Infakt, Jiova nɔ ɛva tɛl wi fɔ sɛlibret di tɛm we Jizɔs gɛt layf bak.

15. Usay Nyu Ia Iv ɛn Nyu Ia De ɔlide kɔmɔt?

¹⁵ Pan ɔl we difrɛn kɔntri dɛn gɛt dɛn yon kɔstɔm, na bɔku say dɛn Disɛmba 31, na kɔmɔn tin fɔ lɛ pipul dɛn nɔ slip te 12 oklok na nɛt. Dɛn kin du dat bikɔs dɛn biliv se dɛn fɔ wach “we di ia de dɔn.” Da ivintɛm de, bɔku pipul dɛn kin drink pasmak, du mami ɛn dadi biznɛs di we aw Gɔd nɔ want, gi gift dɛn, ɛn mek prɔmis dɛn bɔt wetin dɛn go du insay di nyu ia. Di tin we pipul dɛn de du tide na bɔku say dɛn gɛt sɔntin fɔ du wit pegan sɛlibreshɔn. Wan ɔda tin we pipul dɛn kin du na we dɛn kin faya banga bikɔs dɛn biliv se dat go drɛb dɛbul dɛn. Di 1966  World Book Encyclopedia, Volume 14, pej 237 tɔk se: “Trade trade insay Rom, di fɔs de insay di ia na fɔ ɔnɔ Janus we na di gɔd fɔ get ɛn domɔt dɛn ɛn di gɔd fɔ biginin ɛn ɛndin. Insay di ia 487, di Kristian Chɔch bin anawns se Nyu Ia De na de we oli bikɔs na da de de dɛn de sɛlibret wan ɔlide we nem Feast of the Circumcision. Fɔs, dɛn nɔ bin de gri fɔ mek pati dis de bikɔs di pegan dɛn bin de du di sem tin. Bɔt as tɛm de go, dɛn bin chenj ɛn dɛn bin stat fɔ mek pati.”

16, 17. Wetin wi fɔ tink bɔt we wi de plan wi mared?

¹⁶ Ɔlman kin gladi di de we pɔsin de mared. Na bɔku say dɛn na di wɔl, dɛn gɛt difrɛn we aw dɛn kin mek mared. Bɔku tɛm, pipul dɛn nɔ kin tink bɔt usay di tin dɛn we dɛn kin du pan mared kɔmɔt, so dɛn nɔ kin no se sɔm pan di tin dɛn we dɛn kin du na tin dɛn we kɔmɔt frɔm pegan dɛn. Bɔt tu pipul dɛn we na Kristian dɛn we de plan fɔ mared fɔ mek shɔ se dɛn du am di we we go mek Jiova gladi. If dɛn no usay dɛn kɔstɔm dɛn ya kɔmɔt, dɛn go ebul fɔ disayd fɔ du di rayt tin.—Mak 10:​6-9.

¹⁷ Sɔm pipul dɛn kin du sɔm tin dɛn pan mared bikɔs dɛn biliv se dɛn tin dɛn de go mek di ɔkɔ ɛn yawo gɛt ‘gudlɔk.’ (Ayzaya 65:​11, NW) Fɔ ɛgzampul, na kɔmɔn tin fɔ lɛ di yawo trowe in flawa bikɔs pipul dɛn biliv se di uman we go kech am na in go bi di nɛks yawo. Dɔn bak, i kɔmɔn fɔ lɛ ɔkɔ ɛn yawo go na di mɔdɛnlɔ ɔ di gɔdmami in os fɔ go drink wata bifo dɛn go di risɛpshɔn. Dɛn biliv se if dɛn drink da wata de, dat go mek di yawo ɛn ɔkɔ dɛn go gɛt gudlɔk ɛn  kolat na dɛn mared-os. Bɔt tru Kristian dɛn de tek tɛm fɔ lɛ dɛn nɔ du ɛnitin we gɛt fɔ du wit lay lay rilijɔn.—Rid Sɛkɛn Lɛta Fɔ Kɔrint 6:​14-18.

18. Us advays di Baybul gi wi bɔt mared?

¹⁸ Kristian dɛn want di de we dɛn de mared fɔ bi de we ɔlman go gladi, we dɛn go gɛt rɛspɛkt ɛn ɛnjɔy. Dɛn nɔ de alaw di wan dɛn we de go di mared fɔ tɔk tin dɛn we nɔ fayn, tin dɛn we gɛt fɔ du wit mami ɛn dadi biznɛs, ɔ tin dɛn we nɔ go briŋ rɛspɛkt to di yawo ɛn ɔkɔ ɔ ɔda pipul dɛn. (Prɔvabs 26:​18, 19; Lyuk 6:​31; 10:​27) Tru Kristian dɛn nɔ de mek dɛn mared fɔ sho-ɔf. (Jɔn In Fɔs Lɛta 2:​16) If yu de plan fɔ mared, mek shɔ se afta di mared yu go gladi fɔ tink bɔt wetin apin da de de.—Luk Ɛndnot 28 na pej 251.

19, 20. Usay tost kɔmɔt?

¹⁹ Wan ɔda tin we plɛnti pipul dɛn kin du di de we dɛn de mared ɔ we dɛn kin gɛt ɔda program dɛn, na fɔ tost. We dɛn de tost, wan pɔsin de wish gud fɔ ɔda pipul dɛn ɛn di pipul dɛn we dɛn kin mek di wish fɔ kin es dɛn kɔp dɛn ɔp. Aw Kristian dɛn fɔ si tost?

²⁰ Di International Handbook on Alcohol and Culture tɔk se sɔntɛm fɔ tost kɔmɔt frɔm fɔstɛm pegan kɔstɔm usay “dɛn bin de tɔn sɔntin we oli to dɛn gɔd dɛn.” Dɛn bin de du dis “so dat dɛn gɔd dɛn ya go gi dɛn ɛnitin we dɛn want, ɛnitin we dɛn de pre fɔ, ɛn dɛn kin pre se mek dɛn gɛt ‘lɔng layf!’ ɛn ‘wɛlbɔdi!’” Trade trade, pipul dɛn bin de es dɛn kɔp dɛn fɔ aks dɛn gɔd dɛn fɔ blɛsin. Bɔt nɔto so Jiova de gi blɛsin.—Jɔn 14:​6; 16:​23.

21. Us ɔda kayn sɛlibreshɔn dɛn Kristian dɛn fɔ avɔyd?

²¹ We yu de disayd if yu go put an pan ɛni sɛlibreshɔn, tink bɔt usay da sɛlibreshɔn de kɔmɔt ɛn uskayn we pipul dɛn kin biev. Fɔ ɛgzampul, insay sɔm sɛlibreshɔn ɛn kanival dɛn, pipul dɛn kin dans dɛn rud rud dans dɛn, pipul dɛn kin chak, ɛn ivin du mami ɛn dadi biznɛs di we aw Gɔd nɔ want. Dɛn sɛlibreshɔn dɛn ya kin ɛnkɔrej omo biznɛs ɔ we uman de ledɔm wit in kɔmpin uman, ɔ i kin mek pipul dɛn put dɛn kɔntri fɔs. If wi de put an pan dɛn sɛlibreshɔn dɛn ya so, yu tink se wi rili de et wetin Jiova et?—Sam 1:​1, 2; 97:​10; 119:​37.

22. Wetin kin ɛp Kristian fɔ disayd if i go put an pan sɛlibreshɔn?

²² Kristian dɛn nid fɔ tek tɛm so dat dɛn go avɔyd ɛni sɛlibreshɔn we go briŋ badnem pan Gɔd. Di apɔsul Pɔl bin rayt se: “Ɛnitin we una de du, if una de it ɔ una de drink, una fɔ mek Gɔd gɛt di prez.” (Fɔs Lɛta Fɔ Kɔrint 10:​31; luk Ɛndnot 29 na pej 252.) Fɔ tru, nɔto ɔl sɛlibreshɔn dɛn gɛt sɔntin fɔ du wit mami ɛn dadi biznɛs di we aw Gɔd nɔ want, lay lay rilijɔn, ɔ fɔ put wi kɔntri fɔs. If sɛlibreshɔn nɔ ambɔg wetin Jiova want wi fɔ du, na wi go nid fɔ disayd if wi go put an pan am ɔ if wi nɔ go put an pan am. I fayn fɔ mɛmba aw wetin wi de disayd fɔ put an pan go afɛkt ɔda pipul dɛn.

23, 24. Aw wi go ɛksplen wetin mek wi nɔ de put an pan sɔm sɛlibreshɔn dɛn to wi fambul dɛn we nɔto Jiova Witnɛs?

²³ I go mɔs bi se yu dɔn stɔp fɔ put an pan sɛlibreshɔn dɛn we de briŋ badnem pan Jiova. Bɔt sɔm pan yu fambul dɛn we nɔto Jiova Witnɛs dɛn go  de tink se yu nɔ lɛk dɛn ɛn yu nɔ want fɔ spɛn tɛm wit dɛn igen. Dɛn go de fil se na ɔlide tɛm nɔmɔ di famili gɛt fɔ spɛn tɛm togɛda. So wetin yu go du? Bɔku we dɛn de we yu go mek dɛn no se fɔ tru tru, yu lɛk dɛn ɛn dɛn impɔtant to yu. (Prɔvabs 11:​25; Ɛkliziastis 3:​12, 13) Sɔntɛm yu kin invayt dɛn fɔ spɛn tɛm wit yu ɔda tɛm dɛn we nɔto ɔlide.

²⁴ If yu fambul dɛn want fɔ no wetin mek yu nɔ de put an igen pan sɔm ɔlide dɛn, i go fayn fɔ mek yu rid mɔ frɔm wi buk ɛn magazin dɛn ɛn na di jw.org wɛbsayt we go ɛp yu fɔ ɛksplen to dɛn. Nɔ mek lɛk se yu want fɔ win dɛn pan agyumɛnt ɔ yu de fos dɛn fɔ tink di we aw yu de tink. Ɛp yu famili fɔ si se yu bin tink bɔt bɔku tin dɛn fɔs bifo yu disayd fɔ du wetin yu de du so naw. Nɔ vɛks, bifo dat, “tɛl dɛn tin we go mek dɛn gladi fɔ yɛri wetin [yu] de tɔk ɛn we go mek dɛn want fɔ yɛri mɔ.”—Lɛta Fɔ Kɔlɔse 4:​6.

25, 26. Aw mama ɛn papa dɛn go ɛp dɛn pikin dɛn fɔ lɛk di we aw Jiova want wi fɔ du tin?

²⁵ I rili impɔtant fɔ mek wi ɔl ɔndastand klia wan wetin mek wi nɔ de put an pan sɔm sɛlibreshɔn dɛn. (Di Ibru Pipul Dɛn 5:​14) Wi gol na fɔ mek Jiova gladi. If wi na mama ɔ papa, i fayn fɔ mek wi tek wi tɛm fɔ ɛp wi pikin dɛn fɔ ɔndastand ɛn lɛk wetin Jiova want wi fɔ du. We dɛn si Jiova as dɛn padi, dɛnsɛf go want fɔ du tin we go mek Jiova gladi.—Ayzaya 48:​17, 18; Pita In Fɔs Lɛta 3:​15, 16.

²⁶ Jiova kin gladi we i de si we wi de du ɔl wetin wi ebul fɔ ɔnɛs we wi de wɔship am di rayt we. (Jɔn 4:​23) Bɔt bɔku pipul dɛn tink se pɔsin nɔ go ɔnɛs na dis wɔl. Na so i bi? Lɛ wi tɔk bɔt dis na di nɛks chapta.