1, 2. Wetin mek wi fɔ tek tɛm we wi de pik di we aw wi de ɛnjɔy wisɛf?

IMAJIN se yu want bɛt wan frut, dɔn yu notis se wan pat pan am rɔtin. Wetin yu go du? Yu go it am so? Yu go trowe am? Ɔ yu go kɔt di rɔtin pat ɛn it di pat we gud?

² Semweso, di tin dɛn we wi de tek fɔ ɛnjɔy wisɛf kin tan lɛk da frut. Yu kin ɛnjɔy sɔm pan dɛn, bɔt bɔku pan dɛn kin rɔtin bikɔs dɛn gɛt sɔntin fɔ du wit di bad we aw pipul dɛn de liv, fɛt fɛt, ɔ juju  biznɛs. So we yu de pik di we aw yu fɔ ɛnjɔy yusɛf, yu kin tɔk se: “I lɛf to mi. A kin pik ɛnikayn we we a want fɔ ɛnjɔy misɛf”? Ɔ yu kin tɔk se: “Fɔ se ɔl we fɔ ɛnjɔy wisɛf bad”? Ɔ yu na pɔsin we kin tek tɛm pik di we aw yu de ɛnjɔy yusɛf bay we yu de avɔyd di bad we fɔ ɛnjɔy yusɛf ɛn pik di gud we fɔ ɛnjɔy yusɛf?

3. Wetin wi fɔ tink bɔt we wi de pik di we aw fɔ ɛnjɔy wisɛf?

³ Wi ɔl nid fɔ de ɛnjɔy wisɛf sɔntɛnde ɛn wi fɔ tek tɛm pik di tin dɛn we wi de yuz fɔ ɛnjɔy wisɛf. Wi nid fɔ aks wisɛf, aw di tin dɛn we wi de pik fɔ ɛnjɔy wisɛf gɛt sɔntin fɔ du wit wi padi biznɛs wit Jiova.

4. Us advays [prinsipul] na di Baybul we go ɛp wi fɔ pik di we aw wi de ɛnjɔy wisɛf?

⁴ We wi gi wi layf to Jiova, wi de prɔmis am se wi go yuz wi layf fɔ sav am. (Rid Ɛkliziastis 5:​4.) Wi de prɔmis se wi go du ɔltin “fɔ mek Gɔd gɛt di prez.” (Fɔs Lɛta Fɔ Kɔrint 10:​31) Dis min se ivin we wi de ɛnjɔy wisɛf, wi fɔ mɛmba se wi dɔn gi wi layf to Gɔd, nɔto jɔs we wi de na mitin ɔ we wi de prich.

5. Uskayn we wi fɔ wɔship Jiova?

⁵ Ɔltin we wi de du na layf gɛt sɔntin fɔ du wit wi padi biznɛs wit Jiova. Pɔl bin ɛksplen dis we i se: “Una gi una layf lɛkɛ sakrifays to Gɔd fɔ du in wok, ɛn fɔ du ɔl wetin i lɛk.” (Lɛta Fɔ Rom 12:​1) Jizɔs bin se: “Yu fɔ lɛk Jiova we na yu Gɔd wit ɔl yu at, wit ɔl yu layf, wit ɔl yu maynd, ɛn wit ɔl yu trɛnk.” (Mak 12:​30, NW) Wi want fɔ gi Jiova wi bɛst ɔltɛm. Trade, we di Izrɛlayt dɛn bin de sakrifays animal to Jiova, dɛn fɔ gi am wan we nɔ gɛt wan bɔt. If di animal gɛt  bɔt pan am, Gɔd nɔ go gladi fɔ am. (Lɛvitikɔs 22:​18-20) Semweso, i pɔsibul se Jiova nɔ go gladi fɔ wi wɔship. Aw dat kin bi?

6, 7. Aw di we aw wi de ɛnjɔy wisɛf kin afɛkt wi wɔship to Jiova?

⁶ Jiova tɛl wi se: “Una fɔ oli, bikɔs a oli.” (Pita in Fɔs Lɛta 1:​14-16, NW; Pita In Sɛkɛn Lɛta 3:​11) Jiova go gladi fɔ wi wɔship if i oli, ɔ klin. (Ditarɔnɔmi 15:​21) Wi wɔship nɔ go klin if wi de du tin dɛn we Jiova et, lɛk di bad we aw pipul dɛn de liv, fɔ put an pan fɛt fɛt, ɔ fɔ gɛt sɔntin fɔ du wit juju biznɛs. (Lɛta Fɔ Rom 6:​12-14; 8:​13) If wi de ɛnjɔy wisɛf wit dɛn kayn tin dɛn ya, dat go mek Jiova vɛks pan wi. Dis go mek wi wɔship nɔ klin, Jiova nɔ go gladi fɔ wi, ɛn wi padi biznɛs wit Jiova go pwɛl.

⁷ So aw wi go tek tɛm pik fayn we fɔ ɛnjɔy wisɛf? Us advays dɛn go ɛp wi fɔ no aw fɔ ɛnjɔy wisɛf we go mek Jiova gladi, ɛn us wan dɛn go mek i vɛks pan wi?

8, 9. Uskayn we dɛn wi de avɔyd fɔ ɛnjɔy wisɛf? Wetin du?

⁸ Tide, bɔku we dɛn de fɔ ɛnjɔy wisɛf. Sɔm pan dɛn fayn fɔ Kristian dɛn, bɔt bɔku pan dɛn nɔ fayn fɔ Kristian dɛn. Fɔs, lɛ wi no us we dɛn wi fɔ avɔyd fɔ ɛnjɔy wisɛf.

⁹ Bɔku fim dɛn, wɛbsayt dɛn, tɛlivishɔn sho dɛn, vidio gem dɛn, ɛn siŋ dɛn de sho ɔ tɔk bɔt di bad we aw pipul dɛn de liv, fɛt fɛt, ɛn juju biznɛs. Dɛn kin sho bad tin dɛn lɛk se natin nɔ bad bɔt dɛn, ɛn dɛn kin ivin mek dɛn lɛk se dɛn fɔni. Bɔt Kristian dɛn de  avɔyd ɛni we fɔ ɛnjɔy dɛnsɛf we nɔ klin na Jiova in yay. (Di Apɔsul Dɛn Wok [Akt] 15:​28, 29; Fɔs Lɛta Fɔ Kɔrint 6:​9, 10) We wi avɔyd dɛn we dɛn de fɔ ɛnjɔy wisɛf, wi de sho Jiova se wi et wetin bad.—Sam 34:​14; Lɛta Fɔ Rom 12:​9.

10. Wetin kin apin we wi ɛnjɔy wisɛf wit tin dɛn we Jiova nɔ lɛk?

¹⁰ Bɔt sɔm pipul dɛn kin fil se natin nɔ bad fɔ ɛnjɔy yusɛf wit tin dɛn we gɛt fɔ du wit fɛt fɛt, di bad we aw pipul dɛn de liv dɛn layf, ɔ juju biznɛs. Dɛn kin tink se: ‘Wetin bad pan dat? A nɔ go ɛva du dɛn tin ya.’ If wi de tink dis kayn we, wi de ful wisɛf. Di Baybul tɔk se: “Mɔtalman at disitful pas ɔltin, ɛn i kɔrɔpt in kayn nɔ de.” (Jɛrimaya 17:​9) If wi de ɛnjɔy wisɛf wit tin dɛn we Jiova nɔ lɛk, aw wi go tɔk se wi et dɛn tin dɛn de? Di mɔ wi de ɛnjɔy wisɛf wit tin dɛn we Jiova nɔ lɛk, na di mɔ wi go de tink se na nɔmal tin dɛn. As tɛm de go, wi kɔnshɛns go wik ɛn i go lɛf fɔ wɔn wi we wi want disayd fɔ du tin we rɔŋ.—Sam 119:​70; Fɔs Lɛta To Timoti 4:​1, 2.

11. Aw Lɛta Fɔ Galeshya 6:​7 de ɛp wi fɔ pik di we aw wi de ɛnjɔy wisɛf?

¹¹ Gɔd in Wɔd tɛl wi se: “Na wetin una plant, una go gɛt.” (Lɛta Fɔ Galeshya 6:​7) Di tru na dat if wi de ɛnjɔy wisɛf wit tin dɛn we bad, as tɛm de go wi go bigin fɔ du dɛn tin dɛn de. Fɔ ɛgzampul, sɔm Kristian dɛn dɔn du mami ɛn dadi biznɛs di we aw Gɔd nɔ want bikɔs dɛn bin de ɛnjɔy dɛnsɛf wit tin dɛn we de sho mami ɛn dadi biznɛs. Bɔt Jiova de gi wi di ɛp we wi nid fɔ tek tɛm pik fayn we dɛn fɔ ɛnjɔy wisɛf.

12. Wetin go ɛp wi fɔ disayd fɔ du di rayt tin we i kam pan di we aw wi de ɛnjɔy wisɛf?

¹² Sɔm we dɛn fɔ ɛnjɔy wisɛf de sho klia wan se dɛn bad na Jiova in yay ɛn wi no se wi fɔ avɔyd dɛn. Bɔt wetin go apin if wi nɔ rili ɔndastand wetin fɔ du? Jiova nɔ gi wi list we de sho wetin wi fɔ wach, lisin to, ɛn rid ɔ wetin wi nɔ fɔ wach, lisin to, ɔ rid. Bɔt i want wi fɔ yuz wi kɔnshɛns we di Baybul dɔn tren. (Rid Lɛta fɔ Galeshya 6:​5, NW.) Jiova dɔn gi wi advays dɛn we go gayd wi [prinsipul], dat na tru tin dɛn we impɔtant fɔ tich wi di we aw i de tink. Dɛn tin dɛn ya de ɛp fɔ tren wi kɔnshɛns. Dɛn de ɛp wi fɔ no wetin Jiova want so dat wi go disayd fɔ du tin dɛn we go mek i gladi.—Lɛta Fɔ Ɛfisɔs 5:​17.

13. Wetin mek Kristian dɛn kin disayd fɔ du difrɛn tin dɛn fɔ ɛnjɔy dɛnsɛf? Wetin impɔtant to ɔlman we na Kristian?

¹³ Bɔku tɛm, wetin wan Kristian kin du fɔ ɛnjɔy insɛf kin difrɛn frɔm wetin ɔda wan kin du. Wetin mek? Wɛl na bikɔs wi ɔl lɛk difrɛn tin dɛn. Di ɔda rizin na dat wetin kin fayn na wan pɔsin in yay nɔ kin fayn to ɔda pɔsin. Pan ɔl dat, fɔ disayd fɔ du di rayt tin, ɔl Kristian dɛn nid fɔ alaw di advays dɛn na di Baybul fɔ gayd dɛn. (Lɛta Fɔ Filipay 1:​9) Dɛn go ɛp wi fɔ pik we dɛn fɔ ɛnjɔy wisɛf we go mek Gɔd gladi.—Sam 119:​11, 129; Pita In Fɔs Lɛta 2:​16.

14. (a) Wetin mek i impɔtant fɔ tink bɔt aw wi de yuz wi tɛm? (b) Us advays Pɔl bin gi to Kristian dɛn?

¹⁴ Wan ɔda tin fɔ tink bɔt na ɔmɔs tɛm wi de  yuz fɔ ɛnjɔy wisɛf. Dis go sho aw i impɔtant to wi fɔ ɛnjɔy wisɛf. As Kristian dɛn, wi savis to Jiova fɔ bi di tin we impɔtant pas ɔl na wi layf. (Rid Matyu 6:​33, NW.) Bɔt if wi nɔ tek tɛm, di we aw wi de ɛnjɔy wisɛf go tek bɔku pan wi tɛm. Pɔl bin advays Kristian dɛn se: “Una tek tɛm aw una liv una layf, una nɔ du lɛkɛ dɛn pipul we nɔ gɛt sɛns. Ɛni chans we una gɛt fɔ du gud, una du ɔl wetin una ebul du.” (Lɛta Fɔ Ɛfisɔs 5:​15, 16) So wi nid fɔ sɛt ɔmɔs tɛm wi de tek fɔ ɛnjɔy wisɛf ɛn mek shɔ se wi savis to Gɔd impɔtant pas ɔltin na wi layf ɔltɛm.—Lɛta Fɔ Filipay 1:​10.

15. Aw wi go protɛkt wisɛf frɔm ɛnjɔymɛnt dɛn we go ambɔg wi padi biznɛs wit Jiova?

 ¹⁵ Fɔ tru, wi fɔ avɔyd fɔ ɛnjɔy wisɛf di we we wi no se nɔ fayn na Jiova in yay. Bɔt wetin wi go du if wi gɛt dawt bɔt sɔm we dɛn fɔ ɛnjɔy wisɛf? Wi stil nid fɔ tek tɛm? Tink bɔt dis. If yu de waka na wan smɔl rod na wan mawnten, yu go go nia di ɛj? Nɔ. If yu valyu yu layf, yu nɔ go go nia di ɛj. Na di sem tin wi fɔ du we i kam pan wetin wi de pik fɔ ɛnjɔy wisɛf. Gɔd in Wɔd tɛl wi se: “Nɔ fala fɔ du bad.” (Prɔvabs 4:​25-27) So wi nɔ de jɔs avɔyd fɔ ɛnjɔy wisɛf di we we wi no se bad. Wi fɔ tray fɔ avɔyd ɛni we we wi kin ɛnjɔy wisɛf we wi tink se nɔ fayn fɔ wi, ɛn we go ambɔg wi padi biznɛs wit Jiova.

16. (a) Wetin na sɔm pan di tin dɛn we Jiova et? (b) Aw wi go sho se wi et di tin dɛn we Jiova et?

¹⁶ Wan pan di man dɛn we rayt di Sam buk bin tɔk se: “Lɛ ɔl udat se i lɛk PAPA GƆD, [“Jiova,” NW] et bad.” (Sam 97:​10) Di Baybul de tich wi aw Jiova de tink ɛn fil. Aks yusɛf aw di tin dɛn we yu de lan de ɛp yu fɔ si tin dɛn di we aw Jiova de si dɛn. Fɔ ɛgzampul, wi lan se Jiova et “pɔsin we lɛk fɔ lay, pɔsin we de kil fɔ natin, dɛn at we de plan bad tin, fut we de magomago fɔ du bad.” (Prɔvabs 6:​16-19) Wi lan se wi fɔ avɔyd “fɔ du mami ɛn dadi biznɛs di we aw Gɔd nɔ want, . . . fɔ wɔship aydɔl, fɔ put an pan juju biznɛs, . . . fɔ jɛlɔs, fɔ vɛks kwik kwik wan, . . . fɔ milɛ, fɔ drink ɛn chak, fɔ go dɛn wayl pati dɛn, ɛn tin dɛn lɛk dis.” (Lɛta fɔ Galeshya  5:​19-21, NW) Yu de si aw dɛn advays dɛn ya na di Baybul de ɛp yu fɔ pik di we aw yu de ɛnjɔy yusɛf? Wi want fɔ fala di we aw Jiova de du tin pan ɔl wetin wi de du na wi layf, we wi de wit pipul dɛn, ɛn we wi de wi wan. (Sɛkɔn Lɛta fɔ Kɔrint 3:​18, NW) Infakt, di tin dɛn we wi de disayd fɔ du we wi de wi wan, kin sho di kayn pɔsin we wi rili bi.—Sam 11:​4; 16:​8.

17. Bifo wi pik ɛnitin fɔ ɛnjɔy wisɛf, us kwɛstyɔn dɛn wi fɔ aks wisɛf?

¹⁷ So we yu de pik tin dɛn fɔ ɛnjɔy yusɛf, na fɔ aks yusɛf dɛn kwɛstyɔn dɛn ya: ‘Aw di tin dɛn we a de pik de afɛkt mi padi biznɛs wit Jiova? Aw i go afɛkt mi kɔnshɛns?’ Lɛ wi luk sɔm ɔda advays dɛn we go ɛp wi we wi de pik tin dɛn fɔ ɛnjɔy wisɛf.

18, 19. (a) Us advays Pɔl bin gi Kristian dɛn? (b) Us advays dɛn na di Baybul we go ɛp wi fɔ pik di we aw wi de ɛnjɔy wisɛf?

¹⁸ We wi de pik tin dɛn fɔ ɛnjɔy wisɛf, wi de pik tin dɛn we go ful-ɔp wi maynd. Pɔl bin rayt se: “Mi Kristiɛn brɔda dɛn, na di las tin dis we a want tɛl una na dis lɛta: dɛn tin we tru, dɛn tin we rayt na Gɔd in yay, dɛn tin we gud we nɔ de mek pipul sin, dɛn tin we de mek pɔsin lɛk in kɔmpin mɔtalman, ɛn dɛn tin we ɔlman si se gud; na dɛn nɔmɔ una fɔ de mɛmba ɛn ɔl dɛn tin we pɔsin kin prez Gɔd fɔ.” (Lɛta Fɔ Filipay 4:​8) We wi ful-ɔp wi maynd wit dɛn gud tin dɛn ya, wi go ebul fɔ se: “E PAPA GƆD, [“Jiova,” NW] a de pre se mek ɔl wetin de kɔmɔt na mi mɔt, ɛn ɔl wetin de na mi at, bi wetin yu go gladi fɔ tek na mi an.”—Sam 19:​14.

¹⁹ Aks yusɛf dɛn kwɛstyɔn dɛn ya: ‘Wetin a de  ful-ɔp mi maynd wit? A kin tink bɔt gud ɛn fayn tin dɛn afta a dɔn fɔ wach wan patikyula fim ɔ sho? A kin gɛt kolat bikɔs a gɛt gud kɔnshɛns? (Lɛta Fɔ Ɛfisɔs 5:​5; Fɔs Lɛta To Timoti 1:​5, 19) A kin fil fri fɔ pre to Jiova? Ɔ a kin fil bad? Di we aw a de ɛnjɔy misɛf kin mek a tink bɔt fɛt-fɛt ɔ mami ɛn dadi biznɛs di we we Gɔd nɔ lɛk? (Matyu 12:​33; Mak 7:​20-23) Di tin dɛn we a pik fɔ ɛnjɔy misɛf wit de sho se a “de du lɛkɛ aw di pipul dɛn na dis wɔl de du”?’ (Lɛta Fɔ Rom 12:​2) Di ɔnɛs ansa dɛn we wi go gɛt to dɛn kwɛstyɔn dɛn de go ɛp wi fɔ no wetin wi fɔ du fɔ mek wi padi biznɛs wit Jiova kɔntinyu fɔ tayt mɔ ɛn mɔ. Wi want fɔ pre lɛk aw wan pan di man dɛn we rayt di Sam buk tɔk we i se: “Nɔ mek fulish tin ful mi yay.” *—Sam 119:​37.

20, 21. Wetin mek wi nid fɔ tink bɔt aw ɔda pipul dɛn de fil bɔt wetin wi pik fɔ ɛnjɔy wisɛf?

²⁰ Wan impɔtant tin we wi fɔ de mɛmba na dis: “Wi kin du ɛnitin, bɔt nɔto ɔltin we [wi] de du, go ɛp ɔda pipul. Ɔlman nɔ fɔ jɛs de luk fɔ dɛn yon bɛtɛ wan nɔmɔ, dɛn fɔ de tray fɔ mek bɛtɛ fala dɛn kɔmpin.” (Fɔs Lɛta Fɔ Kɔrint 10:​23, 24) So jɔs bikɔs wi gɛt di fridɔm fɔ du sɔntin nɔ min se wi fɔ du am. Wi fɔ tek tɛm tink bɔt aw di tin dɛn we wi de disayd fɔ du de afɛkt wi brɔda ɛn sista dɛn.

 ²¹ Ɔlman nɔ gɛt di sem kɔnshɛns. Fɔ ɛgzampul, yu kɔnshɛns go alaw yu fɔ wach wan patikyula tɛlivishɔn program. Bɔt we yu kam fɔ no se da sem tɛlivishɔn program de ambɔg yu brɔda ɔ yu sista in kɔnshɛns, wetin yu go du? Pan ɔl we yu go gɛt di rayt fɔ wach am, yu go disayd nɔ fɔ wach am. Wetin mek? Na bikɔs yu nɔ want fɔ “sin agens yu brɔda” ɔ ivin “agens Krays.” (Fɔs Lɛta fɔ Kɔrint 8:​12, NW) Wi nɔ want fɔ du ɛnitin we go ambɔg wi kɔmpin Kristian.—Lɛta Fɔ Rom 14:​1; 15:​1; Fɔs Lɛta Fɔ Kɔrint 10:​32.

22. Aw wi go sho se wi nɔ de pin pan wetin wi want we i kam pan wetin ɔda Kristian dɛn de pik fɔ ɛnjɔy dɛnsɛf?

²² Dɔn bak, wetin yu go du if yu kɔnshɛns nɔ alaw yu fɔ wach, rid, ɔ du sɔntin we ɔda pɔsin in fil se natin nɔ rɔŋ wit am? Bikɔs yu lɛk ɛn rɛspɛkt yu brɔda, dat go mek yu nɔ go mɔna am fɔ du di sem tin dɛn we yu lɛk fɔ du. Pɔsin we de drayv motoka no se ɔda pipul dɛn go drayv fast ɔ slo pas aw in de drayv ɛn dɛn kin stil bi gud drayva dɛn. Semweso, yu ɛn ɔda brɔda go de fala di advays dɛn we de na di Baybul, bɔt una nɔ go tink di sem we bɔt di rayt we aw una fɔ ɛnjɔy unasɛf.—Ɛkliziastis 7:​16; Lɛta Fɔ Filipay 4:​5.

23. Wetin go ɛp wi fɔ pik di rayt we fɔ ɛnjɔy wisɛf?

²³ So wetin go ɛp wi fɔ pik di rayt we dɛn fɔ ɛnjɔy wisɛf? We wi yuz wi kɔnshɛns we di Baybul dɔn tren ɛn wi rili bisin bɔt wi brɔda ɛn sista dɛn, dat go ɛp wi fɔ pik di rayt we fɔ ɛnjɔy wisɛf. Ɛn wi go gladi fɔ we wi de du ɔltin fɔ “mek Gɔd gɛt di prez.”