1, 2. (a) Udat in advays wi nid fɔ fala? (b) Us kwɛstyɔn dɛn wi go tɔk bɔt insay dis chapta?

WE YU bin smɔl, i go mɔs bi se sɔntɛnde yu mama ɛn papa bin tɛl yu fɔ du sɔntin we yu nɔ bin want fɔ du. Yu bin lɛk yu mama ɛn papa ɛn yu bin no se yu fɔ obe dɛn. Bɔt pan ɔl dat, i go mɔs bi se yu nɔ bin want fɔ obe dɛn ɔltɛm.

² Wi no se wi Papa, Jiova lɛk wi. I de kia fɔ wi ɛn i de mek shɔ se wi gɛt ɔl wetin wi nid fɔ ɛnjɔy layf. I de gi wi di advays we wi nid fɔ mek wi bɛtɛ na layf ɛn i de gayd wi. Sɔntɛnde, i de yuz ɔda pipul dɛn fɔ sho wi wetin wi fɔ du. Wi nid fɔ rɛspɛkt Jiova. (Prɔvabs 24:​21) Bɔt wetin mek sɔntɛnde i nɔ kin izi fɔ wi fɔ fala di advays we dɛn de gi wi? Wetin mek Jiova tɛl wi fɔ fala advays? Ɛn aw wi go sho se wi de rɛspɛkt Jiova?—Luk Ɛndnot 9 na pej 241.

3, 4. Wetin mek mɔtalman nɔ pafɛkt igen? Wetin mek i nɔ kin izi fɔ wi fɔ alaw ɔda pipul dɛn fɔ dayrɛkt wi?

³ Wi kin want fɔ mek trangayes bikɔs wi nɔ pafɛkt. Dis na tin we bin dɔn de apin frɔm we di fɔs man ɛn  uman we na Adam ɛn Iv bin sin. Pan ɔl we Jiova bin mek dɛn pafɛkt, dɛn nɔ bin gri fɔ obe am. Frɔm da tɛm de, ɔl mɔtalman nɔ pafɛkt igen. Bikɔs wi nɔ pafɛkt, dat na wan rizin we mek i nɔ izi fɔ wi fɔ fala Jiova in advays ɛn di advays we ɔda pipul dɛn de gi wi. Wan ɔda rizin na dat, di wan dɛn bak we Jiova de yuz fɔ dayrɛkt wi nɔ pafɛkt.—Jɛnɛsis 2:​15-17; 3:​1-7; Sam 51:​5; Lɛta Fɔ Rom 5:​12.

⁴ Bikɔs wi nɔ pafɛkt, dat kin mek wi want fɔ mek prawd. Prawd kin mek i nɔ izi fɔ wi fɔ gri fɔ mek ɔda pipul dɛn dayrɛkt wi. Fɔ ɛgzampul, Jiova bin pik Mozis fɔ lid In pipul dɛn, we na di Izrɛlayt dɛn we bin de trade trade. Wan man we bin nem Kora we bin dɔn sav Jiova fɔ lɔng tɛm, bin bigin fɔ mek prawd ɛn i nɔ bin gɛt wan rɛspɛkt fɔ Mozis. Pan ɔl we na Mozis bin de lid Gɔd in pipul dɛn, i nɔ bin ɛva mek prawd. Infakt, di Baybul tɛl wi se Mozis bin ɔmbul pas ɔlman we bin de da tɛm de. Bɔt Kora nɔ bin de gri fɔ fala di we aw Mozis bin de dayrɛkt dɛn. I bin ivin mek bɔku pipul dɛn jɔyn am fɔ mek dɛn tɔn dɛn bak pan Mozis. Wetin bin apin to Kora ɛn di wan dɛn we bin tɔn dɛn bak pan Mozis? Dɛn ɔl bin day. (Di Nɔmba Dɛm 12:​3; 16:​1-3, 31-35) Insay di Baybul, wi kin lan bɔku ɛgzampul dɛn we de tich wi se i bad fɔ mek prawd.—Sɛkɛn Kronikul 26:​16-21; luk Ɛndnot 10 na pej 242.

5. Aw sɔm mɔtalman dɛn dɔn yuz dɛn pawa di rɔŋ we?

⁵ I go bi se yu bin dɔn yɛri dis tɔk fɔ se, “Pawa de mek pɔsin kɔrɔpt.” Frɔm di tɛm we mɔtalman dɔn de na dis wɔl, bɔku pipul dɛn dɔn yuz dɛn pawa di  rɔŋ we. (Rid Ɛkliziastis 8:​9.) Fɔ ɛgzampul, Sɔl na bin gud ɛn ɔmbul man di tɛm we Jiova bin pik am fɔ bi kiŋ na Izrɛl. Bɔt i bigin fɔ jɛlɔs ɛn mek prawd, ɛn dat bin mek i bin want fɔ kil wan inosɛnt man we nem Devid. (Fɔs Samiɛl 9:​20, 21; 10:​20-22; 18:​7-11) Leta, Devid bin bi kiŋ ɛn in na bin wan pan di bɛst kiŋ we bin ɛva rul na Izrɛl. Bɔt as tɛm de go, Devid insɛf bin yuz in pawa di rɔŋ we. I bin du mami ɛn dadi biznɛs wit Batshiba, we na bin wan man we nem Yuraya in wɛf. Dɔn i tray fɔ ayd di bad tin we i bin dɔn du bay we i sɛn Yuraya fɔ mek dɛn kil am pan wɔ.—Sɛkɛn Samiɛl 11:​1-17.

6, 7. (a) If wi lɛk Jiova, wetin dat go mek wi du? (b) Wetin go ɛp wi fɔ obe ilɛksɛf i nɔ izi fɔ wi?

⁶ Wi de rɛspɛkt di we aw Jiova de dayrɛkt wi bikɔs wi lɛk am. Wi want fɔ mek Jiova gladi bikɔs wi lɛk am pas ɛni ɔda tin ɔ ɛni ɔda pɔsin. (Rid Prɔvabs 27:​11; Mak 12:​29, 30.) Frɔm di tɛm we Adam ɛn Iv bin de na di gadin we bin de na Idɛn, Setan bin want pipul dɛn fɔ dawt if Jiova gɛt di rayt fɔ rul. Setan want mek wi tink se Jiova nɔ gɛt di rayt fɔ tɛl wi wetin fɔ du. Bɔt wi no se dis nɔto tru. Wi gri wit dɛn wɔd ya fɔ se: “Yu fit fɔ gɛt di prez, di ɔnɔ ɛn di pawa bikɔs na yu mek ɔltin.”—Rɛvɛleshɔn 4:​11, NW.

⁷ We yu bin smɔl, i go bi se yu mama ɛn papa bin tren yu fɔ obe dɛn ilɛksɛf sɔntɛnde yu nɔ bin want fɔ du am. Semweso, i nɔ kin izi sɔntɛnde fɔ mek Jiova in savant dɛn obe am. Bɔt wi lɛk Jiova ɛn wi rɛspɛkt am, so wi de du ɔl wetin wi ebul fɔ obe am. Jizɔs bin  sɛt di ɛgzampul fɔ wi. I bin obe Jiova pan ɔl we i nɔ bin izi fɔ am. Na dat mek i bin tɛl in Papa se: “Nɔ du wetin a want, du wetin yu want.”—Lyuk 22:​42; luk Ɛndnot 11 na pej 242.

8. Us we dɛn Jiova de dayrɛkt wi tide? (Luk di bɔks we se “ Lisin to Advays.”)

⁸ Tide, Jiova de yuz difrɛn we dɛn fɔ dayrɛkt wi. Fɔ ɛgzampul, i dɔn gi wi di Baybul. I dɔn gi wi bak di ɛlda dɛn na di kɔngrigeshɔn. Wi de sho se wi rɛspɛkt Jiova bay we wi de rɛspɛkt di wan dɛn we i de yuz fɔ dayrɛkt wi. If wi nɔ gri fɔ mek dɛn ɛp wi, dat de sho se wi nɔ want fɔ mek Jiova ɛp wi. We di Izrɛlayt dɛn nɔ bin want Mozis igen fɔ bi dɛn lida, Jiova bin rili tek am siriɔs. I bin si am se na in di Izrɛlayt dɛn nɔ want igen.—Di Nɔmba Dɛm 14:​26, 27; luk Ɛndnot 12 na pej 242.

9. Aw lɔv go mek wi du wetin dɛn de tɛl wi fɔ du?

⁹ We wi de obe di wan dɛn we de oba wi, wi de sho se wi lɛk wi brɔda ɛn sista dɛn. Tink bɔt dis. We bad bad tin lɛk atkwek ɔ ebi ebi ren kin apin, bɔku tɛm, sɔm pipul dɛn kin kam togɛda fɔ sev bɔku bɔku pipul dɛn we de na di say dɛn we di atkwek ɔ ebi ebi ren dɔn pwɛl. Fɔ lɛ dɛn pipul dɛn de go wok fayn fayn wan as tim, sɔmbɔdi nid fɔ ɔganayz dɛn ɛn ɔlman na di tim nid fɔ fala wetin da pɔsin de de tɛl dɛn. Bɔt wetin go apin if wan pɔsin na di tim nɔ gri fɔ du wetin dɛn tɛl am ɛn du wetin i want fɔ du? Ilɛksɛf i gɛt gud rizin fɔ du dat, di gri we i nɔ gri fɔ fala wetin dɛn tɛl am fɔ du go mek in kɔmpin dɛn we de na di tim gɛt prɔblɛm dɛn ɛn sɔntɛm dɛn go ivin wund bad bad wan. Semweso, if wi nɔ du wetin  Jiova ɛn di wan dɛn we i dɔn put oba wi de tɛl wi fɔ du, ɔda pipul dɛn go sɔfa. Bɔt we wi obe Jiova, wi de sho se wi lɛk wi brɔda ɛn sista dɛn ɛn wi de rɛspɛkt Jiova in arenjmɛnt.—Fɔs Lɛta Fɔ Kɔrint 12:​14, 25, 26.

10, 11. Wetin wi go tɔk bɔt?

¹⁰ Ɛnitin we Jiova de tɛl wi fɔ du na fɔ wi yon gud. We wi de sho rɛspɛkt fɔ di wan we de oba wi na wi famili, insay di kɔngrigeshɔn, ɛn fɔ gɔvmɛnt wokman dɛn, wi ɔl go bɛnifit.—Ditarɔnɔmi 5:​16; Lɛta Fɔ Rom 13:​4; Lɛta Fɔ Ɛfisɔs 6:​2, 3; Di Ibru Pipul Dɛn 13:​17.

¹¹ We wi ɔndastand wetin mek Jiova want wi fɔ sho rɛspɛkt to ɔda pipul dɛn, dat go ɛp wi fɔ du am. Lɛ wi tɔk mɔ bɔt tri we dɛn aw wi kin sho rɛspɛkt.

12. Aw maredman go sho se i rɛspɛkt Jiova?

¹² Na Jiova mek di famili ɛn i gi ɔlman na di famili wok fɔ du. We ɔlman na di famili no wetin Jiova want am fɔ du, di famili arenjmɛnt go fayn ɛn ɔlman na di famili go bɛnifit. (Fɔs Lɛta Fɔ Kɔrint 14:​33) Jiova dɔn mek di man fɔ de oba di famili. Dis min se Jiova want am fɔ kia fɔ in wɛf ɛn pikin dɛn ɛn sho lɔv to dɛn. So maredman dɛn gɛt fɔ ansa to Jiova fɔ di we aw dɛn de kia fɔ dɛn famili. Maredman we na Kristian fɔ gud, i fɔ de sho lɔv ɛn trit in famili di we aw Jizɔs bin de trit di kɔngrigeshɔn. We di man de du dis, i de sho se i rɛspɛkt Jiova.—Lɛta fɔ Ɛfisɔs 5:​23, NW; luk Ɛndnot 13 na pej 243.

13. Aw mareduman kin sho rɛspɛkt fɔ in man?

 ¹³ Mareduman we na Kristian insɛf gɛt impɔtant wok fɔ du na di famili. I de sɔpɔt in man as i de wok tranga wan fɔ bi gud edman na di famili. In ɛn in man gɛt di wok fɔ tren dɛn pikin dɛn. Wan we we i go tich di pikin dɛn fɔ sho rɛspɛkt na bay in yon ɛgzampul. (Prɔvabs 1:​8) I fɔ rɛspɛkt in man ɛn sɔpɔt am we i disayd fɔ du sɔntin. Ilɛksɛf i nɔ gri wit in man pan sɔntin, i fɔ tek tɛm ɛksplen to am wit rɛspɛkt di we aw i de fil. We wi Kristian sista mared to pɔsin we nɔ de sav Jiova, i kin gɛt bɔku prɔblɛm dɛn. Bɔt if i kɔntinyu fɔ trit in man wit lɔv ɛn rɛspɛkt, sɔntɛm wan de insɛf go want fɔ no bɔt Jiova ɛn kam wɔship am.—Rid Pita In Fɔs Lɛta 3:​1.

14. Aw pikin dɛn kin sho rɛspɛkt fɔ di wan dɛn we de oba dɛn?

¹⁴ Pikin dɛn valyu na Jiova in yay, ɛn wi nid fɔ protɛkt dɛn ɛn gayd dɛn. We pikin dɛn de obe dɛn mama ɛn papa, dat de mek dɛn mama ɛn papa gladi. Di tin we impɔtant pas ɔl na dat, we pikin dɛn de obe dɛn mama ɛn papa, dat de sho se dɛn rɛspɛkt Jiova ɛn dɛn de mek i gladi. (Prɔvabs 10:​1) Insay bɔku famili dɛn, na di mama ɔ papa nɔmɔ de wit di pikin dɛn ɛn na in wangren de mɛn dɛn. Dis nɔ kin rili izi fɔ di mama ɔ papa ɛn ivin di pikin dɛn. Bɔt we di pikin dɛn de obe ɛn sɔpɔt dɛn mama ɔ papa, di famili go gɛt gladi-at. Ilɛk wetin apin, no famili nɔ de we pafɛkt. Bɔt ɔlman na di famili go gladi if dɛn ɔl de fala wetin Jiova de tɛl dɛn. Dis de briŋ prez to Jiova, we na di Wan we mek ɔl di famili dɛn.—Lɛta fɔ Ɛfisɔs 3:​14, 15, NW.

15. Aw wi go sho se wi de rɛspɛkt di wan dɛn we de oba wi na di kɔngrigeshɔn?

¹⁵ Jiova de yuz di Kristian kɔngrigeshɔn fɔ dayrɛkt wi, ɛn i dɔn gi Jizɔs ɔl di pawa fɔ de oba di kɔngrigeshɔn. (Lɛta Fɔ Kɔlɔse 1:​18) Jizɔs insɛf dɔn gi “di slev we fetful ɛn gɛt sɛns” di wok fɔ kia fɔ Gɔd in pipul dɛn na dis wɔl. (Matyu 24:​45-47, NW) Tide, “di slev we fetful ɛn gɛt sɛns” na di Gɔvnin Bɔdi. Di Gɔvnin Bɔdi de gi wi wetin wi nid di rayt tɛm fɔ ɛp wi fɔ kɔntinyu fɔ gɛt fet mɔ ɛn mɔ. Di ɛlda dɛn, ministerial savant dɛn, ɛn di sakit ovasia dɛn de sɔpɔt di kɔngrigeshɔn dɛn ɔlsay na di wɔl ɛn dɛn de du wetin di Gɔvnin Bɔdi de tɛl dɛn fɔ du. Ɔl dɛn brɔda dɛn ya gɛt di wok fɔ kia fɔ wi. Dɛn gɛt fɔ ansa to Jiova fɔ aw dɛn dɔn de du di wok we dɛn gɛt. So we wi rɛspɛkt dɛn man dɛn ya, dat de sho se wi de rɛspɛkt Jiova.—Rid Fɔs Lɛta Fɔ Tɛsalonayka 5:​12; Di Ibru Pipul Dɛn 13:​17; luk Ɛndnot 14 na pej 243.

16. Wetin mek wi se na di oli spirit de pik ɛlda ɛn ministerial savant dɛn?

¹⁶ Di ɛlda dɛn ɛn di ministerial savant dɛn de ɛp di kɔngrigeshɔn fɔ kɔntinyu fɔ gɛt fet ɛn wanwɔd. Na tru se, dɛn nɔ pafɛkt jɔs lɛk wi. So aw dɛn kin pik dɛn? Dɛn brɔda dɛn ya nid fɔ gɛt di kwaliti dɛn we de na di Baybul. (Fɔs Lɛta To Timoti 3:​1-7, 12; Taytɔs 1:​5-9) Jiova bin yuz in oli spirit fɔ ɛp di wan dɛn we rayt di Baybul fɔ ɛksplen dɛn kwaliti dɛn ya. Di ɛlda dɛn de pre to Jiova fɔ in oli spirit we dɛn de tɔk bɔt udat fɔ pik fɔ bi ɛlda ɔ ministerial savant. Fɔ tru, na Jiova ɛn Jizɔs de dayrɛkt di kɔngrigeshɔn. (Di Apɔsul  Dɛn Wok [Akt] 20:​28) Di man dɛn we dɛn de pik na gift frɔm Gɔd, ɛn dɛn de sɔpɔt ɛn kia fɔ wi.—Lɛta Fɔ Ɛfisɔs 4:​8.

17. Sɔntɛnde, wetin sista nid fɔ du fɔ sho rɛspɛkt?

¹⁷ Sɔntɛnde, no ɛlda ɔ ministerial savant nɔ go de fɔ du di wok dɛn na di kɔngrigeshɔn. Ɔda brɔda dɛn we baptayz kin ɛp, bɔt if dɛn nɔn nɔ de, wan sista kin du di wok we baptayz brɔda fɔ du. If na so i bi, di sista go nid fɔ kɔba in ed, sɔntɛm i kin yuz ɛnkicha ɔ kap. (Fɔs Lɛta Fɔ Kɔrint 11:​3-10) We di sista kɔba in ed, i de sho se i rɛspɛkt Jiova in arenjmɛnt bɔt di wan dɛn we de oba wi, na di famili ɛn di kɔngrigeshɔn.—Luk Ɛndnot 15 na pej 244.

18, 19. (a) Wetin wi lan frɔm Lɛta fɔ Rom 13:​1-7 (NW)? (b) Aw wi go sho rɛspɛkt fɔ gɔvmɛnt wokman dɛn?

¹⁸ Tide, Jiova de alaw gɔvmɛnt wokman dɛn fɔ de oba wi ɛn wi fɔ rɛspɛkt dɛn. Na dɛn de ɔganayz di kɔntri ɛn di eria dɛn usay wi de fɔ mek ɔltin kɔmɔt fayn ɛn dɛn de gi di pipul dɛn wetin dɛn nid. Kristian dɛn de obe wetin de na Lɛta fɔ Rom 13:​1-7, NW. (Rid.) Wi de rɛspɛkt “dɛn wan we de rul na di kɔntri” ɛn obe di lɔ dɛn we de na di kɔntri ɔ di eria we wi de. Dɛn lɔ dɛn ya kin afɛkt wi famili, di biznɛs we wi de du, ɔ wi prɔpati dɛn. Fɔ ɛgzampul, wi de pe wi taks dɛn ɛn rayt di kɔrɛkt tin na pepa bɔt ɛnitin we di gɔvmɛnt de aks wi. Bɔt wetin wi go du if di gɔvmɛnt tɛl wi fɔ du sɔntin we de agens Gɔd in lɔ dɛn? Di apɔsul Pita bin tɔk se: “Wi fɔ du wetin Gɔd tɛl wi fɔ du, wi nɔ gɛt fɔ du  wetin mɔtalman tɛl wi fɔ du.”—Di Apɔsul Dɛn Wok [Akt] 5:​28, 29.

¹⁹ If wi gɛt ɛnitin fɔ du wit gɔvmɛnt wokman dɛn lɛk jɔj ɔ polisman, wi want fɔ rɛspɛkt dɛn ɔltɛm. Yɔŋ wan dɛn we na Kristian kin sho rɛspɛkt fɔ dɛn ticha dɛn ɛn fɔ ɔda pipul dɛn we de wok na dɛn skul. We wi de na wokples, wi de sho rɛspɛkt fɔ wi bɔs ivin we wi kɔmpin wokman dɛn nɔ de du so. We wi de du dis, wi de falamakata di apɔsul Pɔl we bin de sho rɛspɛkt to gɔvmɛnt wokman dɛn pan ɔl we sɔntɛnde i nɔ bin izi fɔ am. (Di Apɔsul Dɛn Wok [Akt] 26:​2, 25) Ilɛksɛf ɔda pipul dɛn nɔ de trit wi fayn, wi fɔ kɔntinyu fɔ sho rɛspɛkt.—Rid Lɛta fɔ Rom 12:​17, 18 (NW); Pita In Fɔs Lɛta 3:​15, 16.

20, 21. Us gud tin kin apin we wi sho rɛspɛkt fɔ ɔda pipul dɛn?

²⁰ Ɔlsay na di wɔl, pipul dɛn nɔ de sho wan rɛspɛkt fɔ dɛn kɔmpin dɛn. Bɔt Jiova in pipul dɛn difrɛn. Wi want fɔ sho rɛspɛkt to ɔlman. Wi de fala di advays we di apɔsul Pita bin gi we i se: “Rɛspɛkt ɔlman.” (Pita In Fɔs Lɛta 2:​17) We wi de rɛspɛkt pipul dɛn, ɔda pipul dɛn de notis wetin wi de du. Jizɔs bin tɛl wi se: “Una layt fɔ shayn so dat ɔlman go si di gud we una de du, ɛn dɛn go se, ‘Una Papa, we de na ɛvin, wɔndaful!’”—Matyu 5:​16.

²¹ We wi de sho rɛspɛkt insay wi famili, wi kɔngrigeshɔn, ɛn ɔda say dɛn, wi gud ɛgzampul de mek ɔda pipul dɛn want fɔ lan bɔt Jiova. Ɛn we wi de sho rɛspɛkt fɔ ɔda pipul dɛn, dat de sho bak se wi rɛspɛkt Jiova. Dis de mek Jiova gladi ɛn wi de sho se wi lɛk am.